2022, November 20, Zarhpi Ni ah COP27 United Nations Khuacaan Thlennak Kong I Ruahceihṭinak cu a dih. Mah i tonnak ah aa telmi hruaitu hna le fimthiamnak a ngeimi hna cu leiser ral ruangah harnak a tongmi ram sifak pawl kha tangka bawmh dingin an hna a tla. Asinain mah nih khuacaan thlennak buaibainak a tawngtham kho lai lo ti kha mi tampi nih an cohlan.

•   “Khuacaan thlennak ruangah harnak a tongmi tangka bawmh hna dingin biakhiahnak kan tuah khawh caah kaa lawm tuk. Asinain mah lawngin a za lo ti kha kan hngalh . . . Kan vawilei cu ṭih a nung tukmi thil sining ah a um peng rih ko” tiah 2022, November 19 ah United Nation i chungṭuan bawibik António Guterres nih a ti.

•   “A rauhhlan ah vawlei ah mikip harnak a pe khomi khuacaan thlennak nganpi a tlung kho men.”—Mary Robinson, Ireland president hlun le Minung Zalonnak caah UN Lutlai a rak ṭuanmi, November 20, 2022.

 A hleiin mino hna nih kan vawlei hmailei kong he aa tlaiin an thin a phang. Asinain ram hna cu hmunkhat ah rianṭuanṭi in khuacaan thlennak tawnghtham ding timi an biakam ningin an tuah kho lai maw? Baibal nih zeidah a chim?

 Cozah hna nih khuacaan thlennak kha tlawmpal an tawnghtham khawh hmanhah buaibainak kha a dihlak in cun an tawngtham kho lai lo tiah Baibal nih a ti. A ruang pahnih hi i cinken:

•   “A kawimi cu na dinter kho lai lo.”—Phungchimtu 1:15.

   A sullam: Cozah hna cu ri an ngei, zeicahtiah minung cu anmah tein i uk awkah ser an si lo. (Jeremiah 10:23) Ram hna cu hmunkhat ah rian an ṭuanṭi kho i zeitluk in an i zuam hmanhah vawlei buaibainak hna hi an tawngtham kho dih lai lo.

•   “Mi cu anmah zawn lawng aa ruatmi, a hak a kaumi, . . . an si lai; . . . mi zawnruahnak an ngei lai lo.”—2 Timote 3:2, 3.

   A sullam: Tuchan i mi tampi cu anmah zawn lawng an i ruat lai i midang ṭhatnak caah hmunkhat ah rianṭuanṭi kha an duh lai lo tiah Baibal nih fiang tein a chimchung.

 Asinain kan vawlei hmailei cu minung cozah biakamnak cungah aa hngat lo. Pathian nih thil a ti khomi vawlei Uktu Jesuh Khrih kha a kan timhpiak. Amah kong he aa tlaiin Baibal nih hitin a ti:

•   “Amah cu kan uktu bawi a si lai. Amah cu Fim Chimtu, A Ṭhawngmi Pathian, Zungzal Hmunmi Pa, Daihnak Bawi ti a si lai.”—Isaiah 9:6.

 Jesuh cu Pathian Pennak asiloah vancung cozah Siangpahrang a si. (Matthai 6:10) Amah cu ṭhawnnak le fimnak a ngei i vawlei le a chungah a ummi kha ṭha tein zohkhenh duhnak lungput zong a ngei. (Salm 72:12, 16) A uknak tangah a ummi vancung cozah nih “vawlei a hrawktu” kha a hrawh hna lai i a rawkmi vawlei kha a remh ṭhan lai.—Biathlam 11:18, Isaiah 35:1, 7.

 Rawhnak a chuahtermi khuacaan thlennak a ṭha bik in a tawngtham dingmi kong he aa tlaiin tam deuh in hngalh awkah “Khuacaan Hmaan Lonak Kong Le Hmailei Kong He Aa Tlaiin Baibal Nih Zeidah A Chim?” timi capar kha rel.