Rian sunghnak nih tangkalei lawng si loin chungkhar nunnak, lungthinlei le ruahnaklei zongah harnak aan pek khawh. Baibal chungah hrambunhmi a tanglei i a ṭha tukmi phunglam hna nih rian sunghnak kha tawnghtham awkah aan bawmh khawh.

•   Na intuarnak kong kha midang chim hna.

   Baibal chimmi: “Hawikom nih cun zeitik paoh ah dawt zungzal a si.”—Phungthlukbia 17:17.

   Rian na sungh tikah na ngaih a chia, na thin a hung, zei tuah awk hngal loin na um men lai asiloah a sungmi pakhat bantukin naa ruat men lai. Na intuarnak kha na chungkharmi le na hawikom ṭha pawl sinah na chimh hna ahcun na intuarnak cu a ṭha deuh lai. A ṭhami ruahnak an in cheuh khawh lengah rian thar hmuh ding zongin an in bawmh khawh.

•   A hleihluat tuk in lungretheih kha hrial.

   Baibal chimmi: “Thaizing kong ah lungrethei in um hlah u; thaizing nih cun lungretheihnak cu a zaa in aa ngeih ve ko lai.”—Matthai 6:34.

   Baibal nih a hlankan in timhtuahnak ngeih awkah a kan forh. (Phungthlukbia 21:5) Asinain hmailei kong ah a hleihluat tukin lungretheih asiloah thinphan kha hrial ding zongin ruahnak a kan cheuh. A si kho lo dingmi thil kong he aa tlai zongin kan lungre a thei tawn. Atu ah kan tuah khawhmi thil cungah lungthin pek cu a ṭha deuhmi a si.

   Baibal nih atu na tonmi lungretheihnak hna tawnghtham ning he aa tlaiin a ṭha tukmi ruahnak tampi a kan cheuh. “Lungretheihnak Tawnghtham Ning” [Myanmar] timi capar kha rel.

•   Tangka na hmanning kha a herh ningin thlennak tuah.

   Baibal chimmi: “Tlawm tuk ka ngeih ah siseh, lungsi hnangam tein um kha ka thiam cang.”—Filipi 4:12.

   Atu i na sining cungah i hngat in thlennak tuah. Mah ah na ngeihmi lengin hman lo awkah tangka na hmanning thlennak aa tel lai. A herh loin leiba ngeih lo awkah i zuam.—Phungthlukbia 22:7.

   Atu lio i na ngeihmi tangka in zeitindah na nun khawh timi kong he aa tlaiin ruahnak cheuhnak kong kha tam deuh in hngalh awkah “Tangka Tlawm Tein Nun Khawh Ning” timi capar kha rel.

•   Na caan kha fimkhur tein hmang.

   Baibal chimmi: “caanṭha nan hmuhmi paoh kha ṭha tein hman i zuam u.”—Kolose 4:5.

   A hlan bantukin rianṭuan awkah kal a herh ti lo hmanhah na caan kha ṭha tein hman peng awkah i zuam. Cutin tuahnak nih lungdai tein um awk le man ka ngei timi ruahnak ngeih awkah aan bawmh lai.

•   A tlarimi si.

   Baibal chimmi: “Rianṭuan harnak nih hin ṭhathnemnak a chuahpi.”—Phungthlukbia 14:23.

   A hlan i na ṭuan bal lomi rian kha ṭuan duhnak ngei. Rian niam in na rak hmuhmi rian le a hlan nakin lahkhah a tlawm deuhmi rian hna kha ṭuan awkah na ruah khawh.

•   Na lungdong hlah

   Baibal chimmi: “Zinglei ah thlaici tuh ko, zanlei zongah ngol hlah; zeicahtiah an dihlak in an ṭhat lai le an ṭhat lai lo kha na hngal lo.”—Phungchimtu 11:6.

   Rian kha kawl peng. Cun rian na kawlnak kong kha midang chim hna. Na rualchan, na theihhngalh, rian nan rak ṭuanṭimi pawl le na innpa pawl kha chim hna. Rian kawlpiaktu pawl kha hal hna, rian an auh le auh lo na hngalh khawh nakhnga website hna ah kawl. Rian na hmuh hlan tiang interview phit awk le form phih awkah i timtuah.