Ram tampi i hruaitu hna nih ral i doh lo dingin an i zuam ko nain 2022, February 24 zinglei ah Russia nih Ukraine kha a doh. Mah raldohnak nih vawleicung pumpi kha zeitindah a hnorsuan khawh? United Nation ah secretary a ṭuanmi António Guterres nih a luanciami ni ah hitin a ti: “Mah raldohnak nih zeitluk in dah harnak le rawhralnak a chuahter lai ti le Europe ram hna le vawleicung pumpi himnak a hnorsuan lai ti kha kan hngal kho lo.”

•   Jesuh nih “ram khat le ram khat an i do lai, peng khat le peng khat an i tu lai” tiah a chimchung. (Matthai 24:7) Tuchan raldohnak nih Jesuh chimchungbia a tlinter ning kong Baibal chimmi kha “‘Ni Hmanung Bik’ asiloah ‘Donghnak Caan’ Hmelchunhnak Cu Zeidah A Si?” timi capar ah rel.

•   Biathlam Baibal cauk nih raldohnak kha “rang sen” aa citmi le “ral thawhternak ṭhawnnak” a ngeimi in a langhter. (Biathlam 6:4) Mah chimchungbia le tuchan raldohnak aa pehtlaih ning kong hngalh awkah “Rang Aa Citmi Pali—Ahote Dah An Si?” timi capar kha rel.

•   Daniel Baibal cauk nih “chaklei siangpahrang” le “thlanglei siangpahrang” an i entainak kong kha a chimchung. (Daniel 11:25-45) A Tling Cangmi Chimchungbia—Daniel Dal 11 timi video kha zoh law Russia le amahlei a ṭangmi hna cu zeicah chaklei siangpahrang in langhter khawh an si timi kong kha hlathlai. a

•   Biathlam Baibal ah “Lianngan Bik Pathian ni lianngan ni ah [raldohnak, NW]” kong zong kha a langhter. (Biathlam 16:14, 16) Asinain mah cu atu ah kan hmuhmi ramkhat le ramkhat i dohnak bantuk hi a si lo. Hmailei ah a cang dingmi kong tam deuh in hngalh awkah “Armageddon Raldohnak Timi Cu Zeidah A Si?” timi capar kha rel.

•   Baibal ah Pathian nih “vawleicung pumpi ah ral cu a daihter dih” hna lai tiah a ti. (Salm 46:9) Hmailei kong he aa tlaiin Pathian biakam kha “A Ṭha Deuhmi Hmailei Ruahchannak Taktak” timi capar ah rel.

•   Jesuh nih a zultu hna kha Pathian Pennak a rat nakhnga thlacam awkah a cawnpiak hna. (Matthai 6:9, 10) Mah Pennak cu vawlei daihnak i telin vawlei ca i Pathian duhnak a tlinter dingmi vancung cozah a si. Mah Pennak nih zeitindah aan ṭhathnemh khawh timi kong hngalh awkah Pathian Pennak Cu Zeidah A Si? timi video kha zoh.

 Ukraine ah Jehovah Tehte 129,000 leng an um. A dang ram i Jehovah Tehte Hna bantukin raldohnak ah an i tel lo i ramkhel lei ah khoikalei hmanh an ṭan lonak thawngin Jesuh kha an i zohchunh. (Johan 18:36) Vawleicung pumpi ah a ummi Jehovah Tehte Hna nih raldohnak i telin minung buaibainak vialte a tawngtham dih dingmi “vancung Pennak kong thawngṭha” kha an chim peng. (Matthai 24:14) Baibal chimmi ruahchannak kong tam deuh in hngalh awkah kan sinah pehtlaihnak tuah dingin kan in sawm.