RALRING TEIN UM U!
Sianginn Ah Meithal Kahnak—Baibal Nih Zeidah A Chim?
2022, May 24 ah U.S.A, Texas, Uvalde khua fate pakhat ah ngaihchiat awk ngai thil pakhat a cang. The New York Times chimmi ningin “meithal aa tlaihmi pa pakhat nih Robb Sianginn ah . . . ngakchia 19 le sayamah pahnih a thah hna.”
Ngaihchiat awk ngai a simi cu mah bantuk thil ṭihnung hi a cang lengmang. USA Today report ningin United States lawngah, “a luanciami kum ah sianginn i meithal kahnak 249 a cang, a tlawm bik ah 1970 hnu i zeibantuk kum nak hmanh in a luanciami kum ah a cangmi cu a tam deuh.”
Zeicah mah bantuk ṭih a nungmi thil hi a can? Mah a ṭha lomi tuahsernak kha zeitindah kan tawnghtham khawh? Zaangennak hi a dong lai tiah zumh khawh a sinak a ruang a um maw? Baibal nih a phi a kan chimh.
Zeicah vawlei ah zaangennak hi a tam chin?
Kan caan he aa tlaiin Baibal nih “ni hmanung bik” ah mi hna cu “zaangfahnak an ngei lai lo” i “ruru-hranghrang in khua a sami” an si lai, zaangennak le ṭih a nungmi thil an tuah lai tiah a ti. Cu bantuk mi hna cu “a ṭha lo chin lengmang khan an um lai.” (2 Timote 3:1-5, 13) Tam deuh in hngalh awkah “Baibal nih Tuchan Mi hna Ruahnak le Tuahsernak he aa tlaiin a Chimchung maw?” timi capar kha rel.
Mi tampi nih ‘Sianginn ah meithal kahnak ti bantuk ṭih a nungmi thil hi zeicah Pathian nih a kham lo?’ tiah an ruah. Baibal chimmi kong hngalh awkah “Miṭha Pawl Cungah Zeicah Thil Ṭhalo A Can?” [Myanmar] timi capar kha rel.
Mah a ṭha lomi tuahsernak kha zeitindah kan tawnghtham khawh?
“Cathiang nih . . . lungthin ṭhawnnak a kan pekmi thawngin ruahchannak kha kan ngeih khawh nakhnga Cathiang chung i aa ṭialmi vialte cu kanmah cawnpiaknak caah a si.”—Rom 15:4.
Baibal phunglam hna nih vawleicung i zaangennak hna hi tawnghtham awkah aan bawmh khawh. A konglam tam deuh in hngalh awkah “Zaangennak Hna Hi A Dong Te Lai Maw?” [Myanmar] timi capar kha I Hlau! mekazin ah rel.
Nulepa nih an fale kha thawngpang ah an hmuhmi le an theihmi ṭih a nungmi thil hna tawnghtham awkah zeitindah an bawmh khawh hna timi ruahnak cheuhnak kong he aa tlaiin “Hnahnawhnak A Pemi Thawngzamhnak Le Na Fale Hna” [English] timi capar kha rel.
Zaangennak hi a dong te lai maw?
“Hremnak chung le serhsatnak chungin a khamh hna.”—Salm 72:14.
“Annih nih an vainam hna cu tuhmui ah an ser hna lai i an fei hna cu hlawhkawi ah an ser hna lai; Miphun pakhat nih miphun pakhat cungah a vainam kha a hler ti lai lo i, raltuk zong kha an i cawnpiak ti lai lo.”—Mikah 4:3.
Minung nih an tuah khawh lomi kha Pathian nih a tuah lai. Vancung a cozah nih hriamnam vialte kha a hrawh dih lai i zaangennak vialte kha a donghter dih lai. Pathian Pennak nih zeidah a liim lai timi kong tam deuh in hngalh awkah “Pathian Pennak Ah Daihnak A Karh Lai” timi capar kha rel.