“Mino hna karlak ah lungthinlei zawtnak cu a biapi tukmi a hung si—cutin a bik in an zawtnak cu social media ruang ah a si.”—2024, June 17, Dr. Vivek Murthy, U.S. surgeon general, New York Times.

 Nulepa hna nih an fale kha social media in zeitindah an kilven khawh hna? Baibal nih a ṭhami ruahnak a kan cheuh.

 Mah Baibal phunglam hna hi ruat.

 “Mifim nih cun a lamh ding kha ṭha tein a zoh.”—Phungthlukbia 14:15.

 Thil ṭihnung pawl a um caah na fa kha social media hmanter awkah tih hlah. Asinain na hmanter hlanah a caan rikhiah in a hmang kho cang maw, a ṭhami hawikom a ngei maw asiloah aa tlak lomi a kong pawl a hrial kho cang maw timi a kong pawl kha ruahpiak hmasa.

•   A kong tam deuh in hngalh awkah “Ka Fale Nih Social Media An Hman Awk A Si Maw?” timi le “Him Tein Social Media Hman Ning” timi capar kha rel.

 “A caan kha a ṭha bik in hmang u.”—Efesa 5:16.

 Na fa kha social media hman ding in nawl na awnh ahcun mah hmannak kong he aa tlaiin phunglam chuahpiak law mah nih zeitindah a himter khawh ti kha chim. Na fa umtu ziaza kha zoh law social media a hmannak ah ri ka khiahpiak lai maw, khiak lai lo ti kha ruat.

•   Social media hmannak ah a caan rikhiah zeicah a herh timi na fa nih a hngalthiam nakhnga Internet In Pehtlaihnak Ah A Fimmi Si timi muiṭawn video kha hmang.

 Baibal nih “harnak caan” ah kan nung tiah a ti. (2 Timote 3:1-5) Mah leng ah Baibal ruahnak cheuhnak nih harnak tawnghtham khawh awkah a kan bawmh khawh. Nulepa le an fale caah chuahmi Baibal hrambunhmi capar 20 leng cu kumhra fai lungthinlei zawtnak he aa tlaimi capar hna ah hmuh khawh a si.