2022, June ah the World Bank Group hruaitu pakhat nih “vawleicung pumpi chawlehnak cu ṭih a nungmi thil sining ah a phan ṭhan” tiah a ti. Thil man cu a kai chinchin nain caankhatte ah mi nih an hmuhmi tangka cu a tlawm chin.”

 International Monetary Fund nih “datsi, dizel le rawl man hna cu khulrang in a hung kai, mah nih a si a fakmi ram hna kha a hleiin a hnorsuan hna” tiah a ti.

 Baibal nih zeicah cu bantuk chawlehnak buaibainak hna kan ton, zeitindah kan tawnghtham khawh i zungzal tawnghthamnak caah zei ruahchannak dah a um ti kha hngalhthiam awkah a kan bawmh khawh.

•   Baibal nih “ni hmanung bik” caan ah kan nung tiah a ti.—2 Timote 3:1.

•   Jesuh nih mah caan chungah “thil ṭihnung” asiloah ṭih a nungmi hmelchunhnak hna a um lai tiah a ti. (Luka 21:11) Thil man a kaimi nih mi kha ṭihnak a ngeihter hna. An hmailei ca le an chungkhar zohkhenhnak caah an thin a phang.

•   Biathlam cauk nih atu chan i rawl man a kai lainak kong kha a chimchung. “Aw a lomi aw pakhat ka theih i cu aw nih cun . . . ‘Ni khat ni hlawh caah changvut cu khiat khat, barli cu khiat thum’ . . . a ti.”—Biathlam 6:6.

 “Ni hmanung bik” kong le Biathlam Baibal i chimchungbia kong tam deuh in hngalh awkah 1914 Thawkin Vawlei Cu Aa Thleng timi video kha zoh law “Rang Aa Citmi Pali—Ahote Dah An Si?” timi capar kha rel.

•   “Mi nih inn an i sak lai i an umnak hna lai, midang nih an hmankanh hna lai lo. Mitsur dum kha an i ser lai i a mitsur hang kha an din hna lai, midang nih an dinkanh hna lai lo.”—Isaiah 65:21, 22.

•   “Ram chungah rawl tampi in um ko seh, . . . rawl kung ṭha bantuk nih tlang vialte cu tuam dih hna seh.”—Salm 72:16.

•   “BAWIPA nih aa thawh i sifakmi cu an hrem hna i retheimi cu aihram lengmang in an tuah hna caah atu cu ka ra lai.”—Salm 12:5. a

 Pathian nih a rauhhlan ah ramkhat lawngah si loin vawleicung pumpi ah a ummi a ding lomi chawlehnak vialte kha a donghter dih cang lai. Zeitindah a tuah lai timi kong hngalh awkah “A Dingmi Chawlehnak Cu A Um Khote Hnga Maw?” timi capar kha rel.

 Asinain tuchan hmanhah thil man kainak tawnghtham awkah Baibal nih a kan bawmh khawh. Zeiti lam in dah? Baibal ah zeitindah tangka kha fimkhur tein hman khawh a si timi kong he aa tlaiin a ṭha tukmi ruahnak cheuhnak a um. (Phungthlukbia 23:4, 5; Phungchimtu 7:12) Tam deuh in hngalh awkah “Na Tangka Le Na Thilri Kha Kilveng” timi le “Tangka Tlawm Tein Nun Khawh Ning” [Myanmar] timi capar kha rel.