A Dingmi Chawlehnak Cu A Um Khote Hnga Maw?
Ram tampi ah mi nih a ding lomi chawlehnak ruangah lam zawh in duh lonak an langhter. COVID-19 pulrai ruangah chawlehnak cu a har chinchin. Lockdown le thilri chambaunak ruangah thil sining cu a chia chin. Mah lengah ngandamnak kong he aa tlaiin ṭha tein zohkhenhnak a um lomi zong nih misifak le mirum an i thleidannak kha a langhter chinchin.
Vawleicung pumpi ah tonmi mah chawlehnak harnak hi a ṭha ṭhan te hnga maw? A ṭha ṭhan ko lai. Baibal nih kan tonmi harnak vialte hi Pathian nih a kan tawnghthampiak lai tiah a ti.
Pathian Nih A Tawnghtham Dingmi Chawlehnak Buaibainak Hna
Buaibainak: Mikip herhmi a ngeihter khomi chawlehnak phun kha mi nih an tuah kho lo.
Tawnghtham Ning: Pathian nih minung uknak kha Pathian Pennak tiah auhmi cozah pakhat in a airolh cang lai. Mah cozah nih vancung in vawleicung pumpi kha a uk lai.—Daniel 2:44; Matthai 6:10.
A Phichuak: Pathian Pennak cozah nih vawleicung pumpi kha a uk cang lai caah vawleicung buaibainak vialte kha a tawnghtham cang lai. Mi cu sifah harnak an tong ti lai lo i tangkalei chambaunak zong an ngei ti lai lo. (Salm 9:7-9, 18) An ṭuanmi rian theitlai kha an hmuh lai i an chungkhar he lungsi hnangamnak a pemi nunnak an ngei lai. Baibal nih hitin bia a kan kamh: “Mi nih inn an i sak lai i an umnak hna lai, midang nih an hmankanh hna lai lo. Mitsur dum kha an i ser lai i a mitsur hang kha an din hna lai, midang nih an dinkanh hna lai lo.”—Isaiah 65:21, 22.
Buaibainak: Mi nih sifah harnak le herhbaunak hna kha an hrial kho lo.
Tawnghtham Ning: Ṭihnak le himlonak ruangah a chuakmi thil vialte kha Pathian Pennak thawngin hrawh dih a si cang lai.
A Phichuak: Kan nunnak ah a hrampi kan herhmi thil hna a kan sunghter khomi thil sining hna kha kan ton ti nakhnga lo Pathian nih a kan zohkhenh lai. Tahchunhnak ah, raltuknak, mangṭam le zawtnak a um ti lai lo. (Salm 46:9; 72:16; Isaiah 33:24) Pathian nih hitin bia a kan kamh: “Pathian mi hna cu an inn ah khan daihnak le himnak a um lai i lungretheihnak in an luat lai.”—Isaiah 32:18.
Buaibainak: Mi pawl cu anmah zawnlawng aa ruatmi le a hak a kaumi hna i hneknak an tong.
Tawnghtham Ning: Pathian Pennak uknak tangah a ummi hna nih anmah zawn nakin midang zawn kha an ruah deuh hna lai.—Matthai 22:37-39.
A Phichuak: Pathian Pennak nih a uk tikah mikip nih Pathian nih a langhtermi ‘amah zawn lawng aa ruat lomi’ dawtnak kha an langhter lai. (1 Korin 13:4, 5) Baibal nih hitin a ti: “Zion Tlang, Pathian tlang thiang chungah cun thil ṭihnung le thil ṭhalo zeihmanh a um lai lo. Rili cu ti in a khah bantukin hi ram cu Bawipa hngalhnak in a khat lai.”—Isaiah 11:9.
Baibal nih kannih cu hi vawlei donghnak caan ah kan nung i chawlehnak harnak hna kaan tawnghthampiak hna lai timi biakam kha Pathian nih a rauhhlan ah a tlinter cang lai tiah a ti. a (Salm 12:5) Atu ah kan tonmi chawlehnak harnak hna kha tawnghtham awkah Baibal nih a kan bawmh khawh. Tahchunhnak ah “Tangka Tlawmte In Nun Khawh Peng Ning” “Tangka He Aa Tlaiin A Tlairimi Hmuhnak” timi capar ah zoh.
a Baibal kha zeicah na zumh khawh timi kong hngalh awkah “Baibal— Zumhawk a Tlakmi Biatak Hrampi” timi capar ah zoh.
Mah Kong Hna Zong Hi Na Duh Khawh Men
VENNAK INNSANG
Pathian Pennak Nih Zeidah A Liim Lai?
Pathian Pennak lawng nih vawleicung buaibainak vialte a hrawh khawh dih ti kha Jesuh nih a hngalh. Kan zumhnak a feh nakhnga Pennak nih zeidah a tuah cang?
