Vawleicung i mi tampi nih tisik anhnah lawng einak kong kha hngalh an hun duh chinchin.

•   “Tisik anhnah lawng einak timi cu saram kha a sa ei awk, thil puan ca le a dang thilri caah hman asiloah harnak pek kha a si khawh chung in hrial timi ruahnak a si.”—Tisik Anhnah Lawng Einak Phu.

 Mi cheukhat nih tisik anhnah lawng an einak cu saram cung ah zawnruahnak an ngeih ca lawng ah si loin pawngkam thil sining kilven an duh ca, an ngandamnak i zohkhenh an duh ca le an biaknak ruang ah a si.

•   “Tisik anhnah lawng einak le a dang rawl ei ning aa lawh lonak cu mi nih mah kha zumhnak lei, ziazalei biakhiahnak le mi pakhat cio nih vawlei a ṭhat deuh nakhnga an tuah khawhmi thlennak lam pakhat in an hmuh caah a si.”—Britannica Academic.

 Tisik anhnah lawng einak nih vawlei a ṭhatter kho deuh lai maw? Baibal nih zeidah a chim?

 Baibal ah a kan Sertu Jehovah Pathian a nih minung kha saram nakin a sunglawi deuhmi in a kan hmuh i saram pawl kha uknak nawl a kan pek tiah a ti. (Genesis 1:27, 28) A hnuah Pathian nih minung kha saram kha a sa einak nawl a pek hna. (Genesis 9:3) Asinain saram kha puarhrangpi in pehtlaihnak nawl cu a pe hna lo.—Phungthlukbia 12:10.

 Baibal chimmi ning in sa kan ei lai maw, ei lai lo timi cu pumpak biakhiahnak a si. b Cutin kan i thimmi nih Pathian mithmuh ah miṭha a kan siter lai lo. (1 Korin 8:8) Cucaah mi pakhat nih sa ei ding in aa thimmi kha ahohmanh nih sual kan phawt awk a si lo.—Rom 14:3.

 Baibal nih kan i thimmi nunning nih vawlei buaibainak kha a tawngtham kho lai lo tiah a ti. Buaibainak tam deuh i a hrampi cu ramkhel lei, zatlang nun le chawlehnak ti bantuk ruang ah a si. Mah cu ahohmanh nih an tawngtham kho lo. Baibal nih hitin a ti:

•   “A kawimi cu na dinter kho lai lo.”—Phungchimtu 1:15.

 A kan Sertu nih kan tonmi buaibainak kha a kan tawnghthampiak lai. Baibal ah Pathian nih a tuah dingmi kong kha langhternak in a chim.

•   “Khi hnu ah van thar le vawlei thar kha ka hmuh hna. Van hmasa le vawlei hmasa kha an lo cang i rili kha a um ti lo.”—Biathlam 21:1.

 Pathian nih “van hmasa” a simi minung cozah kha “van thar” a simi vancung Pathian Pennak cozah in a airolh lai. A Pennak nih “vawlei hmasa” a simi miṭhalo pawl kha a hrawh hna lai i “vawlei thar” a simi a nawl ngaih a duhmi hna kha a uk hna lai.

 Mi nih Pathian Pennak uknak tang lawng ah saram le pawngkam thil sining he aa tlak in nun khawh ning kha an cawn khawh lai.—Isaiah 11:6-9.