Tuchan Mangṭam Kong He Aa Tlaiin Baibal Nih Zeidah A Chim?
“Ṭamhalnak um ti lo ding.” Mah bia nih vawleicung hruaitu pawl nih tawnghtham awkah an i zuammi a ngan bikmi buaibainak lakah pakhat a simi vawleicung mi vialte ei awk pek ding timi an hmuitinh kha a langhter. a Asinain zeitik ah dah vawleicung ah ṭamhalnak a um ti lai lo? Baibal nih zeidah a chim?
Baibal nih tuchan mangṭam kong he aa tlaiin a chimchung
Baibal nih “ni hmanung bik” tiah auhmi atu kan chan ah mangṭam a tlung lai tiah a chimchung. (2 Timote 3:1) Mangṭam kong ah Pathian cu rian a ngei lo nain mah kong he aa tlaiin ralrin a kan pek. (Jeim 1:13) Baibal chimchungbia pahnih kha zohhmanh hna u sih.
“A kenkip ah mangṭam . . . a tlung lai.” (Matthai 24:7) Mah Baibal nih hmun tampi ah mangṭam a tlung lai tiah a chimchung. Nai ah rawl chuahnak le phawtzamhnak kong a hlathlaitu hna nih hitin an ti: “Mangṭam um ti lo ding le ngandamnak a pemi rawl asiloah vitamin a ummi rawl hmuhnak caah an i zuamnak cu man a ngei lo.” b Ram hleihnih leng ah a ummi minung nuai za leng cu an herhmi rawl an hmu kho ti lo. Ngaihchiat awk ngai a simi cu mi tampi cu mah ruang ah an thi.
“Ka hun zoh i rangnak pakhat ka hmuh. A cung i aa citmi nih cun cuai thlainak pakhat aa put.” (Biathlam 6:5) Mah chimchungbia ah a langhtermi rang le aa citmi nih ni hmanung bik ah a um dingmi mangṭam kha a aiawh. c Aa citmi nih cuaithlainak aa putmi cu rawl tlawmtete in tahnak caah a si. Rang aa citmi aa thawh tikah aw pakhat a thang. Rawl man a kai chin lai caah a hrampi rawl hna kha sawksam hlah u tiah mi pawl kha ralrin a pek hna. (Biathlam 6:6) Mah bia nih tuchan vawleicung pumpi ah rawl a har chin lai timi bia a hmaan kha a langhter. Atu ah mi nuai thong tampi cu ngandamnak a pemi rawl an hmu kho ti lo asiloah an i cawk kho ti lo.
Mangṭam a dongh lai ning
Mifim pawl nih kan vawlei nih a chung ah a ummi mi kip an i zat leng tiang hmanh in rawk a chuah khawh tiah an ti. A si ahcun mangṭam a tluntertu buaibainak cu zeidah a si? Mah buaibainak hna tawnghtham awkah a kan Sertu, Jehovah d nih a tuah dingmi kong he aa tlaiin Baibal nih zeidah a chim?
Buaibainak: Cozah pawl nih mangṭam le mi pawl ṭamhal in a umtermi dinlonak hna kha an hlo kho lo.
Tawnghtham ning: A tling lomi minung cozah kha a tlingmi Pathian Pennak cozah nih a airolh cang lai. (Daniel 2:44; Matthai 6:10) Tuchan ah mi sifak pawl cu rawl voikhat ei awk ca hmanh ah fakpi in an i zuam. Asinain Pathian Pennak ahcun thil sining cu aa thleng dih cang lai. Baibal ah Pathian Pennak Siangpahrang Jesuh Khrih kong he aa tlaiin hitin a ti: “Amah a autu sifakmi hna le retheimi hna mi nih zei ah an rel lomi hna kha a chanh hna . . . Ram chung ah rawl tampi in um ko seh; . . . tlang vialte cu tuam dih hna seh.”—Salm 72:12, 16.
Buaibainak: Raltuknak ruang ah a chuakmi rawhnak le chawlehnak harnak ruang ah mi nih an herhmi rawl kha hmuh awkah a har chinchin.
Tawnghtham ning: “[Jehovah nih] hi vawleicung pumpi ah ral cu a daihter dih ko hna, likuk cu a khiah hna i fei cu a hrawh dih hna phaw hna cu mei in a khangh dih hna.” (Salm 46:9) Pathian nih raltuknak hriamnam le raltuknak a chuahtertu mi pawl kha a hrawh dih cang hna lai. Mah tikah mi kip nih rawl kha fawi tein an hmuh cang lai. Baibal nih hitin bia a kan kamh: “Dinnak kha karh sehlaw thlapa a ceu chung paoh cu rumnak kha hmun ko seh.”—Salm 72:7.
Buaibainak: Ṭih a nungmi khuacaan le leiser ral nih thlai kheu pawl kha a hrawh i saram pawl kha a thihter hna.
Tawnghtham ning: Pathian nih kokek thil kha a uk lai i khuacaan a hmaan ahcun vawleicung ah rawl zong a chuak lai. Baibal nih hitin a ti: “[Jehovah nih] thlichia cu a daihter i tilet cu an dai . . . Thetse ram kha tili ah a canter hna i ramcar kha cerhti puut ah a canter hna. Cuka ahcun rawl a ṭaammi kha a umter hna . . . lo ah khan thlaici an tuh i mitsur ruang kha an phun hna.”—Salm 107:29, 35-37.
Buaibainak: A hak a kaumi le ziknawh ei a hmangmi hna nih ei awkah a him lomi rawl kha an chuah i a herhmi pawl sinah rawl a phanh nakhnga lo an i zuam.
Tawnghtham ning: Pathian Pennak nih a dingfel lomi le ziknawh ei a hmangmi hna kha a hrawh dih cang hna lai. (Salm 37:10, 11; Isaiah 61:8) Baibal ah Jehovah Pathian nih “a biakam kha a tlolh bal lo; hremmi hna ṭanh in bia kha a ceih i rawl a ṭammi kha rawl a pek hna” tiah a ti.—Salm 146:7.
Buaibainak: Kum fatin vawleicung rawlpeknak pathum lak ah pakhat cu pakpalawng ah a cang.
Tawnghtham ning: Pathian Pennak ahcun rawlpeknak kha aa tlak tein tawnghtham a si cang lai. Jesuh nih vawleicung a um lioah rawl sawksam lo awkah aa ralring. Tahchunhnak ah, voikhat cu pa 5,000 leng a simi mi bupi kha rawl a dangh hna. A dangh hna hnuah a zultu pawl kha hitin lamhruainak a pek hna: “An ei bang kha char dih hna u, pakhat hmanh hlolak hna hlah u.”—Johan 6:5-13.
Pathian Pennak nih ṭamhalnak a chuahtermi buaibainak kha a hrawh dih cang lai caah mikip nih a ṭhami le ngandamnak a pemi rawl kha an ei cang lai. (Isaiah 25:6) Pathian Pennak nih mah kha zeitik ah dah a tuah lai timi kong hngalh awkah “Pathian Pennak Nih Zeitikah Dah Vawlei A Uk Lai?” timi capar kha zoh.
a 2015 ah United Nations Member States dihlak nih 2030 Agenda for Sustainable Development phunglam kha an zulh.
b Food and Agriculture Organization of the United Nations, the International Fund for Agricultural Development, the United Nations Children’s Fund, the United Nations World Food Programme le the World Health Organization nih an pekmi report.
c Biathlam ah a langhtermi rang aa citmi pali kong tam deuh in hngalh awkah “Rang Aa Citmi Pali—Ahote Dah An Si?” timi capar kha zoh.
d Jehovah timi cu Pathian pumpak min a si. (Salm 83:18, NWT) “Jehovah Cu Ahodah A Si?” timi capar kha zoh.
Mah Kong Hna Zong Hi Na Duh Khawh Men
BAIBAL BIAHALNAK A PHI
“Ni Hmanung Bik” Asiloah “Donghnak Caan” Hmelchunhnak Hna Cu Zeidah An Si?
Baibal nih ni hmanung bik ah a cang dingmi thil kong kha a chimchung.
A KONG TAM DEUH
A Dingmi Chawlehnak Cu A Um Khote Hnga Maw?
Vawleicung ah kan tonmi sifah harnak le a ding lomi chawlehnak vialte tling tein a tawngtham kho dih dingmi cozah pakhat a um.
ESSENTIAL BIBLE TEACHINGS
Pathian Pennak Cu Zeidah A Si?
Jesuh nih vawleicung phung a chim lioah zeidang kong nakin Pathian Pennak kong kha a hleiin a rak cawnpiak hna. Kumzabu tampi chung Pennak a rat nakhnga mi tampi nih thla an rak cam.
