Ukraine i raltuknak le a min a thangmi biaknaklei hruaitu pawl kong he aa tlaiin a tanglei kong hi zohhmanh:

•   “Russia Orthodox Church i hruaitu, Patriarch Kirill nih Russia tuahsernak cungah sualphawtnak bia a chim lo. . . . A Church nih Ukraine kong he aa tlaiin a hmaan lomi kong an karhter i Putin nih ral a dohnak he aa tlaiin runvennak bia chim awkah mah kha a hman.”—EUobserver, 2022, March 7.

•   “Patriarch Kirill . . . nih mah raldohnak cu sualnak dohnak ah aa telmi a si tiah a tinak thawngin Russia nih Ukraine a dohmi cu aa tlakmi a si kha a langhter.”—AP News, 2022, March 8.

•   “Ukraine Orthodox Church i hruaitu a simi, Kyiv ah a ummi Metropolitan Epiphanius I nih Nikhat Ni ah ‘Russia ral pawl doh awkah’ a miphun pawl kha thluachuah a pek hna . . . [Amah nih] Russia ralkap pawl thah cu sual a si lo ti zongin a ti.”—Jerusalem Post, 2022, March 16.

•   “Kanmah [UCCRO] nih Ukraine i kan ralkap pawl le kan ram kilven awkah ral a domi vialte kha kan bawmh hna. Ral pawl kut in Ukraine kilven awkah aa zuammi pawl kha thluachuah kan in pek hna i nan caah thla kan in campiak hna.”—UCCRO a Statement, 2022, February 24.

 Zeitindah na ruah? Jesuh Khrih hnu kan zul tiah aa timi biaknak pawl nih an mi pawl kha raltuk awkah an forh hna awk a si maw? Baibal nih zeidah a chim?

Raltuknak ah biaknaklei tuanbia

 Mah biaknak pawl nih raltuknak ah i tel cu cohlan khawhmi le a ṭhami a si i daihnak caah i tel hrimhrim ding a si ti hmanhin an chim tawn ti kha tuanbia nih a langhter. Jehovah Tehte Hna nih mah biaknak hna cu chungthu lengnal an si tiin an langhternak cu kumhrabu tampi a si cang. Kan cauk hna ah langhtermi tahchunhnak cheukhat hi zohhmanh.

•   “Biaknaklei Raldohnak—‘Ngaihchiat Awk A Simi Zumhnak’” [English] capar nih Pathian le Khrih min in mi tampi an thah hna caah Roman Catholic Church rian a ngeih ning kong kha a langhter.

•   “Africa Ram i Catholic Church” [English] timi capar ah biaknak nih miphun pakhat le pakhat i dohnak le miphun ningin thahnak an kham lonak kong a langhter.

•   “Biaknaklei Sualnak A Si Maw?,” [Myanmar] “Minung Raldohnak Ah Biaknak I A Rian” [English] le “Khatlei Ah A Ṭangmi Biaknak” [English] timi capar hna nih Catholic, Orthodox, le Protestant siangbawi hna nih raldohnak tampi ah kaphnih ningin an bawmh hna ning a fianter.

Khrihfa biaknak hna nih raltuknak kha an bawmh awk a si maw?

 Jesuh cawnpiakmi: “Na innpa cu nangmah naa dawt bantukin na dawt lai.” (Matthai 22:39) “Nan ral kha va daw hna u.”—Matthai 5:44-47.

 Jesuh chimmi: “Ka pennak cu hi vawlei ta hi rak si sehlaw cu . . . an ka tlaih khawh nakhnga lo ka zultu hna hi heh tiah an cawl ve hnga.” (Johan 18:36) “Hriamnam a lami cu hriamnam in an thi lai.”—Matthai 26:47-52.

 Ruathmanh: Khrihfa hna nih Jesuh kilven awk hmanhah ral an doh lo ahcun a dang kong ruangah tah ral an doh awk a si maw? A hmasa Khrihfa hna nih Jesuh nunning le cawnpiaknak zumhfek tein an zulh ning hngalh awkah “Khrihfa Biaknak Cu Raltuknak He An I Pehtlai Maw?” [Myanmar] timi capar kha rel.

Raltuknak tha a pemi biaknak hna nih zeidah an ton lai?

 Jesuh hnu zul kan si tiah aa ti nain Jesuh cawnpiakmi ningin a zul lomi biaknak hna kha Pathian nih a cohlang hna lo tiah Baibal nih a kan cawnpiak.—Matthai 7:21-23; Titas 1:16.

•   Pathian nih cu bantuk biaknak hna kha “vawleicung ah thah a simi vialte hna” an thihnak cungah rian a ngeimi in a hmuh hna ti kha Biathlam Baibal nih a langhter. (Biathlam 18:21, 24) A ruang hngalh awkah “A Liannganmi Babilon Timi Cu Zeidah A Si?” [Myanmar] timi capar kha rel.

•   Thei ṭha a tlai lomi kung chia cu ‘hau in mei chungah paih an si’ bantukin Pathian nih a cohlan lomi biaknak vialte cu a ṭha lomi an tuahsernak ruangah hrawh an si lai ti kha Jesuh nih a langhter. (Matthai 7:15-20) Mah cu zeitindah a can lai timi kong hngalh awkah “A Hmaan Lomi Biaknak Donghnak A Nai Cang!” [English] timi capar ah rel.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images