RALRING TEIN UM U!
Scientist Pawl Nih Vawlei Rawh Caan Kha An Thawn—Baibal Nih Zeidah A Chim?
2023, January 24 ah scientist pawl nih Vawlei Rawh Caan a cu zanṭim ah a phan cang tiah an ti. Mah zanṭim nih langhternak in vawlei dongh caan kha a aiawhmi a si.
“ ‘Vawlei Rawh Caan’ nih ṭih nung a simi, mi nih anmah le anmah an i hrawh lai caan kha a langhter duhmi a si. Nihnih Ni ah scientist pawl nih Ukraine ah raldohnak, nuclear raldohnak ṭihnak le ṭih a nungmi vawlei khuacaan ti bantuk thil sining ruang ah a hlan nakin vawlei rawh caan kha zanṭim ah an hun thawn deuh.”—AFP International Text Wire.
“Scientist pawl nih Nihnih Ni ah ‘Vawlei Rawh Caan’ kha zanṭim hlan second 90 ah kan thawn i minung nih anmah le anmah an i hrawh dih cikcek lai caan cu a naih chin cang tiah an ti.”—ABC News.
“Vawleicung pummi scientist pawl nih mi nih anmah le anmah an i hrawh lai caan cu a hlan nakin a naih chin cang tiah ralrin an pek hna.”—The Guardian.
Minung nunnak le kan vawlei cu a rauhhlan ah a dong cang lai maw? Hmailei ah a cang dingmi kong kha kan ṭih a hau maw? Baibal nih zeidah a chim?
Hmailei ah a cang dingmi
Baibal chimmi ning in ‘vawlei cu a hmun zungzal lai’ i mah ah mi pawl cu “zungzal in” an um lai. (Phungchimtu 1:4; Salm 37:29) Cucaah mi nih vawlei cu an hrawk kho lai lo i kan vawlei zong minung um khawh lonak hmun ah an canter kho lai lo.
Asinain Baibal nih donghnak caan kong he aa tlaiin a chimmi a um. Tahchunhnak ah, ‘vawlei le a chung i a ummi thil hi an lo cuahmah cang’ tiah a ti.—1 Johan 2:17.
Vawlei donghnak kong he aa tlaiin Baibal chimmi kong hngalh awkah “A Rauhhlan Ah Vawlei Hi A Dong Lai Maw? Apocalypse Timi Cu Zeidah A Si?” timi capar kha rel.
A cang dingmi vawlei thil sining kong he aa tlaiin Baibal chimmi kong hngalh awkah “Vawlei Zeitikah Dah A Dongh Lai?” timi [Myanmar] capar kha rel.
A ṭhatnaklei in hmuhnak ngei peng
Atu kan vawlei ah buaibainak tampi a um ko nain a ṭhatnaklei in hmuhnak ngeih peng awkah Baibal nih a kan bawmh khawh. Zeitin in dah?
Baibal nih a ṭha tukmi ruahnak a kan cheuh. (2 Timote 3:16, 17) Tahchunhnak ah, kan nunnak ah buaibainak kan tong ko nain a ṭhatnaklei in hmuhnak ngeih peng awkah Baibal nih zeitindah a kan bawmh khawh timi kong hngalh awkah “Lungretheihnak Zorter Khawh Ning” timi capar kha rel.
Baibal nih hmailei kong he aa tlaiin ruahchannak taktak a kan pek. (Rom 15:4) Mah ah atu le hmailei ah kan i ruahchan khawhmi kong le tuchan vawlei ah zei bantuk thil a can hmanh ah zumhnak ngeih peng awkah a kan bawm khomi kong kha a fianter.
Baibal in a kong tam deuh hngalh awkah man loin cawnpiaktu he Baibal cawnnak program i ruahceihṭi awkah kan in sawm.
a “Vawlei Rawh Caan a langhtermi suimilam cu kanmah nih kan sermi ṭih a nungmi sehlei fimthiam in kan vawlei hrawhnak caan a naih tuk cang timi kong mipi ralrin peknak phun in sermi a si. Mah cu vawlei ah nun rih kan duh ahcun kan tawnghtham awk a simi ṭih a nungmi thil hna caah ralrin petu thil a si.”—Bulletin of the Atomic Scientists.