“Khuacaan a chia chinmi caan ah kan nung cang. Khuapi hna cu ti chungah an pil. Kan ton bal lomi thli lum hrannak hna a um. Ṭih a nungmi thlichia hna a hrang. Ti a har i thingkung le saram nuai tampi cu an ci a mit. Mah cu phuahchommi asiloah bia perh in chimmi a si lo. Science lei nih atu lio i mei a chuahtertu thil (energy) kan hman ning ruangah a si tiah an ti.”— 2022, April 4 ah chuahmi Intergovernmental Panel on Climate Change timi thawngzamhnak ca ah United Nations ah chungṭuan a simi, António Guterres nih a chimmi a si.

 “Scientists pawl nih khuacaan thlennak ruangah United States i pangpar dum 423 hrawng cu a rauhhlan ah harnak nan tong kho tiah ralring an pek hna. A hleiin a linh tuk ruangah mah pangpar dum hna cu fakpi in a rawh khawh caah a si. Mah a cang khomi thil ṭha lo hna cu Baibal ah kan relmi leiser ral bantuk hi an si men lai: Mah cu mei kanghnak le ti lianhnak, ti khal tlang titnak, rili ti kainak le thli lum hrannak hna an si.”—“Flooding Chaos in Yellowstone, a Sign of Crises to Come,” 2022, June 15, The New York Times.

 Vawleicung i pawngkam buaibainak hna hi tawnghtham khawh a si maw? A si ahcun aho nih dah a tawnghtham lai? Baibal chimmi kha zohhmanh u sih.

 Pathian nih “vawlei a hrawktu hna” kha a hrawh hna lai tiah Baibal nih a chim. (Biathlam 11:18) Mah Baibal caang nih thil pathum kong a kan cawnpiak:

1.  1. Minung tuahsernak nih vawlei a hrawh lai.

2.  2. Vawlei hrawhnak a dong lai.

3.  3. Minung si loin Pathian nih vawleicung i pawngkam buaibainak kha a tawnghtham lai.

 Baibal nih ‘vawlei cu a hmun zungzal lai’ tiah a ti. (Phungchimtu 1:4) A zungzal in mi nih an umnak lai.

•   “A dingmi cu ram chungah him tein an um lai i ram cu zungzal in anmah ta a si lai.”—Salm 37:29.

 Kan vawlei cu remh ṭhan dih a si cang lai.

•   “Ramlak le ramcar hna cu an i lawm lai i thetse ram cu a par lai.”—Isaiah 35:1.