RALRING TEIN UM U!
World Cup Nih Mi Pawl An Lung A Rualter Kho Taktak Maw?—Baibal Nih Zeidah A Chim?
2022, November 20 in December 18 tiang tuahmi FIFA World Cup cu mi billion panga hrawng nih an zoh lai tiah an i ruahchan. Mah lentecelhnak nih a zohtu hna kha an lung a rualter hna lawng si loin thil tampi a tuah khawh tiah mi tampi nih an ruah.
“Zaang lentecelhnak nih vawlei kha a thlen khawh. Mi pawl kha an lung a thawhter khawh hna i aa thleidangmi lam in an lung a rualter khawh hna.”—Nelson Mandela, Thlanglei Africa president hlun.
“Bawlung chuihnak nih mi pawl an lung a rualter hna, a ruang cu mah nih ‘midang kan dawt hna timi le pakhat le pakhat kan i lawhnak a um timi ruahnak a ngeihtermi ruahchannak, lawmhnak le lungthawhnak ngeih awkah a bawmh hna.’”—Gianni Infantino, FIFA president. a
World Cup asiloah a dang zaang lentecelhnak nih mah bantuk thil cu a tuah kho taktak maw? Daihnak le lungrualnak hmuh dingin kan i ruahchan kho maw?
Mah nih mi pawl an lung a rualter kho taktak maw?
Tukum World Cup cu bawlung chuih sawhsawh lawng a si lo. Mah zaang lentecelhnak nih minung zalonnak, miphun thleidannak le chawlehnak lei, i ruan lonak ti bantuk zatlang nun le ramkhel lei kongkau zong i ruahceih awkah a forh hna.
Asinain World Cup ti bantuk ramkomh zaang lentecelhnak cu lungthawh awk ngai a simi nuamhsaihnak a si tiah mi tampi nih an ruah. Mi nih an duh tuk ko nain mah nih zungzal lungrualnak a hmuhter kho hna lo. Mah canah Baibal nih “ni hmanung bik” tiah a auhmi caan hmelchunhnak in a langhtermi, ṭhencheunak a chuahtermi lungput le tuahsernak kha atu le atu an langhter.”—2 Timote 3:1-5.
Vawlei lungrualnak caah ruahchannak taktak
Baibal nih vawlei pumpi lungrualnak caah ruahchannak taktak kong a langhter. Baibal nih “Pathian Pennak” tiah auhmi vancung cozah nih vawleicung mi vialte kha an lung a rualter hna lai tiah bia a kan kamh.—Luka 4:43; Matthai 6:10.
Mah Pennak i Siangpahrang a simi Jesuh Khrih nih vawleicung pumpi ah daihnak a chuahter lai. Baibal nih hitin a ti:
“Dinnak kha karh sehlaw thlapa a ceu chung paoh cu rumnak kha hmun ko seh.”—Salm 72:7.
“Amah a autu sifakmi hna . . . kha a chanh hna . . . Hremnak chung le serhsatnak chungin a khamh hna.”—Salm 72:12, 14.
Tuchan hmanhah Jesuh cawnpiaknak nih ram 239 i mi nuai tampi kha an lung a rualter cang hna. Annih nih midang huatnak kha ngol dingin an cawn. A konglam tam deuh in hngalh awkah “Huatnak Donghternak” timi aa tlaimi capar kha rel.
a Fédération Internationale de Football Association, the international governing body for association football (soccer).