RALRING TEIN UM U!
Zeicah Mah Tluk In Huatnak A Tam?—Baibal Nih Zeidah A Chim?
Huatnak bia, huatnak ruang ah a chuakmi zaangennak, miphun zaangennak le raldohnak hna ti bantuk thawngpang in a khat.
“Israel le Gaza raltuknak ruang ah mi nih zaangennak le huatnak an karhter. Cucaah social media ah a hlan nakin atu ah huatnak bia hna cu a tam chinchin.”—The New York Times, 2023, November 15.
“October ni 7 thawk in vawleicung ah huatnak bia le huatnak ruang ah a chuakmi zaangennak hna a tam chinchinmi kha hmuh khawh a si.”—Dennis Francis, president of the United Nations General Assembly, 2023, November 3.
Huatnak bia, zaangennak le raldohnak hna cu a hlan tein a um pengmi a si. Baibal ah “bia ṭhalo kha thal bantuk in [aa tinhmi]” hna le zaangennak le huatnak a karhtermi hna kong kha a langhter. (Salm 64:3; 120:7; 140:1) Asinain Baibal nih tuchan ah kan hmuhmi huatnak cu a biapimi sullam a ngei ti kha a fianter.
Huatnak—Kan chan hmelchunhnak
Tuchan ah huatnak a umnak a ruang pahnih kha Baibal ah a langhter.
1. Mah ah ‘mi tampi cu an dawtnak a kih lai’ caan kong kha a chimchung. (Matthai 24:12) Mi nih dawtnak canah pakhat le pakhat huatnak a chuahtermi ziaza tu an langhter lai.—2 Timote 3:1-5.
2. Tuchan ah huatnak a tam tukmi nih a ṭha lo tukmi Satan Khuachia kut tang ah kan um ti kha a langhter.Baibal nih “vawlei hi a pumpi in mi ṭhalopa kuttang ah a um” tiah a ti.—1 Johan 5:19; Biathlam 12:9, 12.
Asinain Baibal ah a rauhhlan ah Pathian nih huatnak hrampi cu zungzal in a hloh cang lai timi kong zong a langhter. Mah lawng si loin huatnak a chuahtertu sifah harnak vialte zong a hrawh dih cang lai. Baibal ah hitin bia a kan kamh:
Pathian nih “An mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang a ti.”—Biathlam 21:4.