Ramkhel lei ṭhen cheunak cu vawleicung pumpi i miphun kip cung ah a karh. 2022 Pew Research Center nih an chimmi ning in “an hlathlaimi ram 19 ah upa zatuak ah 65 nih an ram ah ramkhel lei party a bawmmi hna kar ah lung i khah lonak tampi a um tiah an ti.”

 Na umnak ram ah ramkhel lei ṭhen cheunak a tam chinmi kha na hmu maw? Zeicah cutin a si? Tawnghtham khawh ning lam a um maw? Baibal chimmi kong kha ruathmanh.

 Baibal nih kan caan kha “ni hmanung bik” caan in a langhter i mi tampi cu lungrual awkah a hartermi lungput an ngei lai tiah a chimchung.

•   “Ni hmanung bik kha an phak tikah harnak caan a si lai ti kha philh hlah. Mi cu anmah zawn lawng aa ruatmi, . . . an si lai . . . mi zawnruahnak an ngei lai lo.”—2 Timote 3:1-3.

 Mi tampi nih cozah a hlawh a tlin nakhnga fakpi in an i zuam ko nain an hlawh a tling hlei lo. An hmuhnak aa khat lomi pawl hmunkhat ah rianṭuanṭi le buaibainak tawnghthamṭi cu a har i a si kho lo. Cucaah Baibal nih hlanliopi in a chimchung ciami bia cu a hmaan.

•   “Minung uknak nih harnak a chuahter.”—Phungchimtu 8:9, NW.

 Asinain Baibal nih tuchan ah kan tonmi harnak hna a chuahtertu buaibainak pawl a hrawk khomi cozah pakhat kong kha a langhter.

 Baibal ah aa thleidangmi sining a ngeimi hruaitu pakhat kong kha a langhter: Amah cu Jesuh Khrih a si. Jesuh cu ṭhawnnak le nawlngeihnak a ngei i minung dihlak cung ah lungrualnak le daihnak um seh ti a duh.

•   “A chan chungah dinnak kha karh sehlaw . . . rumnak kha hmun ko seh.”—Salm 72:7.

•   “Miphun vialte nih an rian an ṭuan lai.”—Salm 72:11.

 Jesuh cu zohchunhawk a ṭha tukmi hruaitu a si. Zeicahtiah a hleiin a ding loin pehtlaih a simi hna kha an zawn a ruah hna i bawmh a duh hna caah a si.

•   “Amah a autu sifakmi hna le retheimi hna, mi nih zei ah an rel lomi hna kha a chanh hna. A dermi le sifakmi cung ah zaangfahnak a ngei i retheimi kha an nunnak kha a khamh hna. Hremnak chung le serhsatnak chung in a khamh hna.”—Salm 72:12-14.

 Jesuh nih a hruaimi vancung cozah a simi, Pathian Pennak kong kha tam deuh in hlathlai. Mah uknak in zeitindah ṭhathnemhnak na hmuh khawh i na bawmh khawh ti kha hlathlai.

•   Pathian Pennak Cu Zeidah A Si? timi video kha zoh.

•   “Pathian Pennak—Ziknawh A Ei Lomi Cozah Pakhat” timi [English] capar kha rel.