Pengkomh civui i video hna nih kan lung a suk i Baibal cawnpiaknak kha ṭha deuh in hngalhthiam awkah a kan bawmh. 2020 “I Lawm Zungzal Ko U” timi Pengkomh Civui ah Uktu Bu le a bawmtu hna nih an chimmi phungchimnak 43 i telin video 114 aa tel. Mah video a chuah khawh nakhnga zeitlukin dah an i zuam i zeitlukin dah tangka a dih ti kha na ruat bal maw?

 Vawleicung pumpi i unau 900 deng nih mah video a chuah khawh nakhnga an caan le an thiamnak kha an hman. Mah video caah kum hnih chung leng ah suimilam 100,000 dengmang an hman. Nehemiah: “Jehovah ah Nan i Lawmhnak cu Nan Thazaang A Si” timi minit 76 a raumi Baibal drama an chuah khawh nakhnga caah suimilam 70,000 an hman.

 Mah lungtho tein aa telmi hna nih an herhmi lengah rian a dih khawh nakhnga sehlei fimthiamnak, thilri le umnak ti bantuk bawmh khawh awkah zeitlukin dah tangka a dih lai ti cu a fiang ko.

 Audio/Video rian a ṭuanmi unaupa Jared Gossman nih hitin a ti: “Uktu Bu i Cawnpiaknak Kawmiṭi nih video caah nunphung a phunphun le hmunhma a phunphun i tel seh ti an duh. Annih nih kannih cu vawleicung pumpi unau rual kan si ti kha langhter an duh caah a si. Mah timhtuahnak ningin a si khawh nakhnga ram 11 in phu 24 cu hmunkhat ah rian an ṭuanṭi. Vawleicung pumpi i unau hna nih rian an ṭuanṭi khawh nakhnga timhtuahnak, tlangtlaknak le tangka tampi kan herh.”

 Video tam deuh caah a ṭha deuhmi thilri le timhtuahnak hna a hau. Tahchunhnak ah, Nehemiah: “Jehovah ah Nan i Lawmhnak cu Nan Thazaang A Si” timi video cu U.S.A, New York, Patterson pawng i Mt. Ebo studio ah an thlakmi a si. Video kha tuanbia ningin a si khawh nakhnga an i zuam lengah thawhlawm kha ṭha tein an hman khawh nakhnga unaupa hna nih hlanlio Jerusalem vanpang bantuk si khawh awkah an tuah chommi vanpang deu hna kha an timhtuah. Vanpang deu pakhat cio i a san cu meter 6 (pe 20) a si i mah kha thing in a tlang an kamh i lung he aa lawh nakhnga sii an thuh. Mah “vanpang” deu kha an duhnak hmun ah an ṭhial i video ṭhen a phunphun caah an hman khawh, cucaah a herh ningin a tlawmtam kha ṭhumh khawh a si. Cucaah drama pakhat timhtuahnak ca lawng hmanhah $100,000 (U.S.) dengmang a hau. a

 Mah a dikthliar kong kha kan theih cang caah tukum pengkomh civui nih kan i lawmhnak kha a karhter chin. Mah timhtuahnak ca i an i zuamnak nih vawleicung pumpi ah Jehovah thang a ṭhatter lai ti kha kan zumh. donate.pr418.com le a dang lam hna in vawleicung pumpi i rianṭuannak caah unau hna nih lungtho tein thawhlawm an pek caah kan i lawm tuk.