2021 rianṭuannak kum a chungah vawleicung pumpi ah COVID-19 pulrai a karh. “Vawleicung Pumpi Pulrai ruangah Hartongmi hna Bawmhnak” timi capar ah langhter a si bantukin pulrai ruangah harnak a tongmi hna bawmhnak caah dollar b nuai tampi hman a si i Leiser Ral A Tongmi Hna Bawmhnak Kawmiṭi 950 leng dirh a si.

 Pulrai ruangah harnak tampi ton a si lioah a dang leiser ral le minung chuahtermi thil ṭihnung hna ruangah vawleicung pumpi i unau pawl nih harnak an tong. Uktu Bu i Khuakhangtu Kawmiṭi nih COVID-19 pulrai ruangah hartongmi hna bawmhnak lengah cu bantuk phun harnak 200 leng tawnghthamnak caah dollar nuai 8 hman dingin an hna a tla. Nai ah a cangmi leiser ral pahnih ruangah harnak a tongmi hna bawmhnak caah nan pekmi thawhlawm hman a si ning hi ruathmanh.

 2021, May 22 ah Democratic Republic of the Congo ah a ummi Nyiragongo Mei Tlang cu a puak. Mei tlang in a luangmi a hang nih inn, sianginn le ti khonnak nganpi pakhat kha a hrawh. Asinain ṭih a nungmi cu mei tlang in a luangmi mah a hang lawng kha a si lo. Mei tlang a puah hnu ni tlawmpal ah siivai a ummi vutcam nih Goma khua kha a khuh dih i lihnin hmetete zong voi tampi aa hnin. Cucaah khuami hnar cheu leng cu a himnak hmun ah an i ṭhial. Mi thong tampi cu ramri kha tan in Rwanda lei ah an zam.

 Mah lakah Jehovah Tehte 5,000 hrawng an i tel. Cheukhat cu mei tlang puah ruangah an inn a rawk i cheukhat tu cu an um lo ruangah an thil fir duh ah an inn an baohpiak hna. Rwanda le Democratic Republic of the Congo ah a ummi hartongmi hna bawmhnak kawmiṭi cu hmunkhat ah rian an ṭuanṭi. Hartongmi hna bawmhnak kawmiṭi pakhat kong he aa tlaiin Congo (Kinshasa) zung ṭengnge nih hitin a ti: “Khua chungah buaibainak in a khat i a himnak hmun ah i ṭhial dingin thawngthanhnak a um hlan hmanhin mah kawmiṭi nih ti, rawl, ihnak le thilri pawl kha an phawtzamh cang hna.” Unau 2,000 leng an i ponnak khua pakhat ah hartongmi hna bawmhnak kawmiṭi nih umnak thlam an sakpiak hna, hmai huh an pek hna i COVID-19 pulrai le chungtlik zawtnak in i kilven khawh ning lam zong an chimh hna.

 Leiser ral a si in thla thum chungah unau pawl nih facang ton ruk, fangvoi dip ton ruk, chiti ton thum le ti ton thum leng an pek hna. Zung ṭengnge nih tangka a tlo deuh nakhnga a man a fakmi ramdang rawl cah canah ram chungah a ummi ei-din tu cawk awkah an timhtuah.

 Meitlang puah ruangah an inn thar te a rawkmi unaunu pakhat nih “kan lung a dong i kan ngaih a chia tuk” tiah a ti. Asinain an chungkhar cu pumsalei le thlaraulei in bawmhnak an rak hmu. Cucaah hitin a ti: “Jehovah bawmhnak thawngin kan herhmi kha kan ngei. Jehovah nih kan thilrit a kan phorhpiakmi kha kan hmuh i mah nih inkhawh awkah a kan bawmh.”

 Venezuela ram ah tangkalei buaibainak nganpi a umnak hi kum tampi a si cang. Cucaah cuka i a ummi unau pawl cu nun can harnak, ṭamhaalnak le zaangennak hna an tong. Asinain Jehovah bupi nih a hlaw hna lo.

 Nikum rianṭuanak kum chungah bawmh a herhmi chungkhar pawl caah rawl le chatpiat ti bantuk cawknak le kuatnak ah dollar nuai 1.5 leng hman a si. Venezuela zung ṭengnge nih hitin a ti: “Ram chung dihlak ah thla fatin rawl ton 130 kuat le bawmh a herhmi unau pawl kut cung phanh tiangin pek cu a fawimi a si lo.” Ei-din an kuatmi pawl a rawh nakhnga lo saupi chiah khawh a simi ei-din tu kha an kuat tawn hna. Zung ṭengnge nih hitin a ti: “Rawl kha voikhat ah tampi in kan cawk i a man a fawi bik caan, rawl ṭuan caan ah kan cawk. Mah hnuah a man a fawi bikmi lam hmangin rawl kha kan kuat.”

 Venezuela i Hartongmi Hna Bawmhnak Kawmiṭi chungtel a simi Leonel nih a rian kha a sunsak tuk. Hitin a ti: “Hartongmi hna bawmhnak rian cu a ṭha tukmi a si. COVID-19 ruangah ka dawtmi ka nupi nih a ka thihtak tikah mah a sunglawi tukmi rian nih thazaang a ka ngeihter ṭhan. Manh lo ngaiin rian ka ṭuan peng i bawmh a herhmi unau pawl caah man ka ngei timi ruahnak zong ka ngei. Jehovah nih ka miphun cu ka hlaw bal hna lai lo timi a biakam a tlintermi kha keimah theng nih ka hmuh.”

 A hlanah amah theng hartongmi hna bawmhnak kawmiṭi ah rian a ṭuan i atu ah bawmhnak a hmumi unaupa pakhat nih hitin a ti: “Atu cu keimah nih bawmhnak ka herh caan a si. Unau pawl nih pumsalei lawng si loin ka nupi he, keimah he kan lung a daih nakhnga an kan bawmh. An kan zohkhenh, an kan hnemh i thazaang an kan pek.”

 Leiser ral cheukhat cu ralrin peknak tlawmpal asiloah zeihmanh um loin a chuak kho. Asinain Jehovah bupi nih khulrang in hartongmi hna bawmhnak kha an hmuh khawh i an pek khawh colh hna. Cucaah vawleicung pumpi rianṭuannak caah nan pekmi thawhlawm cungah an i lawm tuk. Thawhlawm pek khawh ning lam cheukhat kha donate.pr418.com ah langhter a si. Siannak nan langhtermi cungah kan i lawm t uk.