Baibal nih “ram khat le ram khat an i do lai” i “chan donghnak” ah leiser ral hna a um lai tiah a chimchung. (Matthai 24:3, 7) 2023 rianṭuannak kum chung ah mah chimchungbia a tlinmi kha kan hmuh. a Asinain ram 100 dengmang ah raldohnak le leiser ral hna a um lioah Jehovah Tehte Hna nih Jehovah dawtnak kha an i zohchunh. Zeitindah?

 2023 rianṭuannak kum chung ah kan unau hna nih leiser ral asiloah minung nih an chuahtermi harnak 200 leng an tong. Leiser ral a tongmi hna bawmh awkah Jehovah Tehte Hna i upadi hnatla in tuahmi bu hna nih vawleicung pumpi rianṭuannak caah thawhlawm kan pekmi in dollar b nuai hra leng an rak hman. Mah cu unau hna nih an umnak hmun i bawmh a herhmi unau hna kha bawmh ding in lungtho tein an pekmi tangka leng in an pek chapmi a si. Leiser ral a tongmi unau tampi lakah leiser ral pahnih a tongmi unau hna kha bawmh awkah zeitindah nan pekmi thawhlawm hman a si timi kha ruathmanh.

 Nigeria i hmun cheukhat ah kum fatin ti a lian tawn. Asinain kum hra chung ah Nigeria i a cangmi tilian vialte lakah 2022 October i a cangmi tilian cu a fak bikmi a si. Cin thlaknak hmun acre 1,670,432 (hectares 676,000) leng a rawk i mi nuai hnih leng nih an inn an chuahtak. Unau hna kha pumsalei le thlaraulei in bawmh awkah Nigeria zung ṭengnge nih Leiser Ral A Tongmi Bawmhnak Kawmiṭi pahnih kha rian a pek colh hna.

•   Thawngthanhtu 7,505 nih an inn an chuahtak

•   Inn 860 cu a rawk asiloah a rawk dih

•   Jehovah Tehte Hna Biakinn 90 le Civui Tuahnak Inn pakhat ah ti a lian

 Leiser ral a tongmi hna bawmhnak caah dollar 250,000 leng hman a si. Mah hna hi aa tel:

•   Facang, pe le khohsuai ti bantuk rawl

•   Ihphah le khiangthawng ti bantuk inn caah a herhmi thilri

•   A rawkmi inn rem ṭhannak asiloah sak ṭhannak

 Thawhlawm cu fimkhur tein hman a si nakhnga kan unau hna nih zeitindah an tuah? Lamkhat cu a rawkmi inn hna kha an zoh i remh ṭhan khawh a si maw a si lo ti kha ṭha tein an tuaktan. Inn pakhat cu sak ṭhan dih a herh ahcun a sawhsawh te le cuka hmun he aa tlak in sak ṭhan a si.

 Bawmhnak a hmumi kan unau hna cu an i lawm tuk. Unaunu pakhat nih hitin a ti: “Tilian ruang ah kan cin thlaknak hmun vialte a rawk i umnak inn kan ngeih ti lo caah kan nunnak cu a har tuk. Mah ni ah unau hna cu kanmah bawmh awk le a himmi umnak hmun pek awkah an rat caah kan hna a ngam. Zung ṭengnge nih a kan kuatmi tirawl kan hmuh tikah lungdaihnak kan hmu. Kan nunnak ah Johan 13:34, 35 a tlinmi kan mit in kan hmuh caah kan khuaruah a har. . . . A hmaanmi dawtnak a um taktak ko. Keimah le ka chungkhar dihlak nih a caan te ah a kan bawmmi unau hna cung ah kan i lawm tuk ti kha lungtak tein chim kan duh.”

 Cuka hmun i a ummi midang zong nih bawmhnak rian kan ṭuanmi kha an hmuh. Sabagreia, Bayelsa Peng ah a ummi nawlngeitu pakhat nih hitin a ti: “Vawleicung ah bu asiloah church tampi a um nain Jehovah Tehte Hna lawng nih mah bantuk thil hi an tuah. . . . [Nan] bu cu vawleicung i a ṭha bikmi bu lakah pakhat a si ve.”

 2023, February chung ah Chile ah meikanghnak 400 leng a chuah caah thil tampi a rawk. Ram acre  1,062,553 (hectares 430,000) leng le Chile ram ah hmanmi a biapi tukmi thilri cheukhat cu a rawk dih. Minung 8,000 hrawng an zam. Mei a kangh hnu tlawmpal ah zung ṭenge nih bawmh hram an thawk.

•   Thawngthanhtu 222 an zam

•   Inn 20 a rawk

 Leiser ral a tongmi hna bawmhnak caah dollar 200,000 leng hman a si. Mah hna hi aa tel:

•   Tirawl

•   Datsi, inn thianhhlimhnak thilri le sii hna

•   A rawkmi inn sak ṭhannak

 Chungkhar pakhat cu an inn le an rian i tel in an ngeihmi thil vialte a rawh dihmi kha an hmuh tikah an lau tuk. Mah nih rian ngei loin a umter hna. A hmasa ah mah chungkhar hna nih a lawngmi an inn hmun kha an hmuh tikah an ngeih a chia tuk. Asinain an inn an sakpiak ṭhanmi hna an hmuh tikah duhsah in an hun i nuam ṭhan. Mah lungtho tein aa pemi hna sinin dawtnak tampi an hmuh caah mah nih inkhawhnak ngeih awkah a bawmh hna. Mah hmuhtonnak nih an lung a suk tuk hna caah a dang unaupa inn saknak ah lungtho tein an i tel ve i an bawmh ve.

 Leiser ral a tongmi hna bawmhnak nih kan unau tampi kha an lung a suk hna. Unaupa pakhat nih hitin a ti: “Leiser Ral A Tongmi Bawmhnak Kawmiṭi hmang in Jehovah timhpiakmi cu khuaruahhar taktak a si. Leiser ral a can in a thaizing ah cuka hmun ah a herhmi thilri pawl kha an pek hna. Vawleicung i hmun dang ah leiser ral a tongmi hna bawmhnak kong kan relmi nih kan lung a kan suk. Asinain nangmah theng nih na ton ahcun aa phun dang tuk. Unau pawl nih Jehovah sining an i zohchunh ning le thilrilei, thlaraulei le lungthinlei in kan herhmi pawl kan hmuh nakhnga kan cung ah siaherhnak an langhtermi kan hmuh tikah bupi kha kan hun sunsak chinchin. Tuahsernak in langhtermi Jehovah dawtak kha kan mit in kan hmuh.”

 Hi vawlei chan donghnak ah leiser ral a tam chinchinmi kha kan hmuh lai. (Luka 21:10, 11) Asinain Khrihfabu hmang in a kan dawtu kan Siangpahrang Jesuh Khrih cu ‘chan dongh tiang kan sinah a zungzal in a um lai’ ti kha kan hngalh. (Matthai 28:20) Donate.pr418.com le a dang lam hna in vawleicung pumpi rianṭuannak caah siang ngai in nan pekmi thawhlawm, nan caan le nan thazaang nan hman ning nih Pennak le dawtnak in a khatmi Siangpahrang nan bawmh ti kha a langhter. Siannak nan langhter peng caah kan i lawm tuk.