“Kan ca a relmi tampi cu mitcaw mi hna he aa theihngalmi an si,” tiah 1912, June 1, Vennak Innsang nih a ti. “Mitcaw mi caah rel dingmi ca hna kha man loin hmuh khawh a si. . . . Mah ca hna cu a mit a cawmi nih rel khawh dingin cafang a bomi in nammi a si.” Vennak Innsang nih hitin a ti chap: “Mitcaw mi tampi nih a ra laimi vawlei thar i a ṭha tukmi thluachuah kong aa tel caah an sunsak tuk.”

 Mah lioah Mirang holh in vawleicung pumpi hmanmi mitcaw ca system a rak um rih lo. Asinain Jehovah Tehte Hna nih Baibal biatak kha “cafang a bomi” mitcaw ca in an rak ngei cang. Atu zongah kan tuah rih ko! Atu ahcun mitcaw ca kha holh phun 50 leng in kan ngei cang. Mah cu zeitindah tuah a si?

 Mitcaw ca chuahnak i a hmasa bik kehlan cu ca kha mitcaw ca in thlen a si. New York, Patterson i Text Processing Services ah rian a ṭuanmi Michael Millen nih hitin a ti: “Hlan ahcun mitcaw ca ṭialnak caah a leng nih an tuahmi software kha kan rak hman, asinain kan herhmi holh vialte caah kan hmu kho lo. Atu cu Vennak Innsang Lehnak System kha kan hman i vawleicung holh phun tam deuh in mitcaw ca kha kan chuah khawh cang. Khoika hmanhah mah bantukin chuahmi a um lai lo tiah ka zumh.”

 Mitcaw ca ah ca lawng si loin hmanthlak langhternak zong aa tel. Tahchunhnak ah, Nunnak Kha Zungzal In I Nuamhpi! timi mitcaw cauk i a phaw hmanthlak kha hitin langhter a si: “Mipa pakhat cu aa dawh tukmi hramhkung, thingkung le tlang hrawn hna lakah a ummi lam ah a kal.” Bu rianṭuantu le hmaikal rian a ṭuanmi, a mit a cawmi Jamshed nih “Mah hmanthlak langhtermi cu ka caah man a ngei tukmi a si” tiah a ti.

 Mitcaw ca in thlen a si hnuah file kha a bomi mitcaw ca in tuah awkah zung ṭengnge zung hna ah an kuat. Mah ca hna kha catlap a chahmi cungah a bo tete in a chuah nakhnga an tuah. Mah cu fawi tein a rawk kho lomi, a bomi a deh tete an si. Mah hnuah cahmai pawl kha an fonh, an ṭhit i a dang ca hna he Khrihfabu ah an kuat. Asiloah carek zung in “mitcaw caah” timi milubenh in an kuat. A herh tikah zung ṭengnge hna nih a mit a cawmi asiloah ṭha tein khua a hmu lomi unau pawl nih pumhnak caah a herhmi ca pawl an hmuh khawh nakhnga khulrang in kuatnak hmanh an timhtuah.

 Mah rian vialte ṭuannak caah a caan le tangka tampi a herh. A tak ti ahcun New York, Wallkill i kan cauk namnak ah Baibal cauk sawhsawh 50,000 an nam lioah mitcaw Baibal cauk cu 2 lawng an tuah khawh. Mirang holh in chuahmi mitcaw Baibal pakhat ah uk 25 a um, mah kha chuah awkah a dihmi cu Baibal cauk sawhsawh chuahnak ah a dihmi nakin a let 123 in a tam deuh. a Uk 25 a ummi, Baibal pakhat i a phaw ca lawngah $150 (U.S.) hrawng a dih!

 Mitcaw cauk pawl chuahnak ah a bawmmi hna nih an rian kha zeitindah an hmuh? Thlanglei Africa zung ṭengnge ah a ṭuanmi Nadia nih hitin a chim: “A mit a cawmi le ṭha tein khua a hmu lomi unau pawl i an nunnak cu a har tuk, cucaah anmah bawmhnak caanṭha ka hmuhmi cu thluachuah taktak a si. Jehovah nih a dawt tuk hna ti cu a fiang.”

 Asinain a mit a cawmi pakhat nih mitcaw ca a rel khawh lo ah tah zeitin? A luancia kum tlawmpal lioah Mitcaw Ca Rel Khawh Dingin Cawng timi cauk kha kan chuah i mah cawnnak cauk ah mitcaw ca he, nammi ca he aa tel. Mah cu a mit a cawmi he, a caw lomi he hman khawhmi phun in chuahmi a si. Mah brochure he mitcaw ca ṭialnak calung le fung zum zong aa tel. Mitcaw ca a cawngmi nih mah thilri hna kha hmangin mitcaw cafang a bomi kha an tuah khawh. Mah nih cafang hna kha cinken khawh deuh awkah a fawiter. Kut tawnghnak in zei cafang dah ti kha thleidan khawh awkah a bawmh.

 A mit a cawmi le ṭha tein khua a hmu lomi unau pawl nih mah cauk hna in zeitindah ṭhatnak an hmuh? Haiti ah a ummi Ernst cu Khrihfabu pumhnak ah aa pum lengmang ko nain mitcaw caah chuahmi cauk pakhat hmanh a ngei lo. Cucaah siangngakchia rian a hmuhmi ṭuan khawh ding le biahalnak le phitnak ṭhen ah a phi pek khawh dingin baihat in a ciah tawn. Hitin a ti: “Asinain atu cu zeitik caan paohah ka kut ka thliar i a phi ka pek khawh cang. Unau pawl he aa khatmi in kaa hmu cang. Kan dihlak in thlarau rawl aa khat in kan hmu!”

 Vennak Innsang le Khrihfabu Baibal Cawnnak a tlaimi, Austria i ṭha tein a mit khua a hmu lomi Khrihfa upa Jan nih hitin a ti: “Kan cauk pawl cu ka relmi balmi a dang mitcaw ca hna nakin an fiang deuh tuk. Tahchunhnak ah, cahmai number le a tanglei fianternak hna aa tel i kawl awkah a fawi, cun hmanthlak caah aw in langhternak zong aa tel.”

 Thlanglei Korea ah hmaikal a ṭuanmi Seon-ok cu a mit a caw i a hna a chet. A hlan ahcun pumhnak ah a kut in an tlaih i kut hmelchunhnak an piahmi lawng kha a rak i bochan, asinain atu cu mitcaw ca kha amah theng nih a rel khawh cang. Hitin a ti: “A dang mitcaw ca cu rel awkah a har, zeicatiah a deh tete a bau, catlang a ngawi i catlap zong a pan tuk. Asinain Jehovah Tehte Hna cu catlap ṭhaṭha an hmang i a deh tete kha fiang tein an tuah, mah nih rel awkah a fawiter deuh. A hlan ahcun Baibal hrambunhmi ca hna kha midang bawmhnak lawngin ka hlathlai khawh. Asinain atu ahcun keimah tein ka hlathlai khawh cang. Zarhtin Khrihfabu pumhnak caah kaa timhtuah kho i pumhnak ah tling tein kaa tel khawh caah kaa lawm tuk. Mitcaw ca in chuahmi kan cauk vialte kah ka rel dih. Mah cauk hna kha rel loin ka um kho ti lo.”

 Nammi kan cauk pawl bantukin mitcaw cauk hna zongah mah langhternak hi aa tel ve: “Mah cauk hi zuar awk a si lo. Lungtho tein pekmi thawhlawm in chuahmi a si. Vawleicung pumpi ah Baibal kong hngalh awk mi bawmhnak ah hmanmi a si ve.” donate.pr418.com ah langhtermi lam hna in thawhlawm nan pekmi cungah kan i lawm tuk. Siang ngaiin nan pekmi nih a mit a cawmi le ṭha tein khua a hmu lomi hna i telin kan dihlak in thlarau rawl hmuh awkah a kan bawmh.