Jehovah Pathian nih zei bantuk sining a ngeimi an si ah mi vialte nih amah kong le a Pennak kong kha cawng hna seh ti a duh. (1 Timote 2:3, 4) Mah ruangah Jehovah Tehte Hna nih a hna a chet i a holh kho lomi i telin mi tam khawh chung tam caah Baibal le Baibal hlathlainak bawmtu cauk hna kha an chuah. Bupi nih kut holh video a in ca tampi an chuah i kut holh 100 lengin hmuh khawh a si. Mah ca hna cu zeitindah chuah a si i phawtzamh a si? Caan a liam thluahmah bantukin zei ṭhanchonak hna dah a um?

 Kut holh ca hna cu vawleicung pumpi ah a ummi holh lettu phu hna nih an chuah. Phu chungah aa telmi kip nih holh leh a haumi ca hna kha ṭha tein an dothlat. Mah hnuah kut holh in mah a konglam kha zeitindah a ṭha bikmi lam in kan langhter lai ti kha bia an khiah. Cutin an tuah dih hnuah mah ca kha video in an i thla. Atu ah phu 60 nih Baibal hlathlainak bawmtu cauk hna kha kut holh in hmaan tein an leh i a dang 40 nih a caan ah cutin an leh.

 A hlanah kut holh video chuahnak caah tangka tampi a rak dih. Video camera le a dang a herhmi thilri hna cu tuchan nakin a man a rak fak deuh tuk. A caan ah a um ciami inn hna kha kan remh i kanmah tein sakmi studio ah video hna kha kan thlak. Kut holh lettu phu pakhat nih an herhmi thil vialte caah $30,000 b leng a dih.

 Thawhlawm kha a ṭha bikmi lam in hman awkah bupi nih holh leh ning a ṭhancho nakhnga le a sawhsawh te a si nakhnga fakpi in an i zuam. Cucaah hman awk a tlak i a man a fawi deuhmi chanthar thilri hna kan hman. Studio hman canah holh lettu phu hna nih a hringmi screen tiah auhmi a hringmi background in an zungkhaan ah video an i thla. Kut holh a hmangmi mi tampi a herh tikah unau pawl nih cauk chung i anmah an i thlaknak ding zawn kha studio ah kal hau loin an zungkhaan asiloah an inn in an i thla kho.

 Kut holh a hmangmi hna i an rian bawmh awkah software zong kan chuah. Cucaah holh lettu pawl nih kut holh ca pakhat chuahnak caah an hman tawnmi a caan a cheu lawng a dih cang. Cu bantuk ṭhanchonak kha unau pawl nih an sunsak tuk. Alexander timi unaupa nih hitin a chim: “Kut holh video pawl cu a hlan nakin tam deuh in chuah a si. Mah caah kaa lawm tuk. Mah video hna kha nifatin ka zoh.”

 Atu ah holh lettu phu pakhat nih an herhmi thilri caah $5,000 hrawng lawng a dih cang. Cucaah kut holh video pawl kha holh phun tampi in kan chuah khawh cang.

 Kut holh ca pakhat kha phu pakhat nih an i thlak dih hnuah video pawl cu a herhmi hna sinah a phanh a hau. A hlanah videocassette le DVD hna in kan rak chuah, asinain mah cu a man a fak tuk, a caan zong tampi a dih i rian zong a tam. Mah an i thlakmi cu copy tuah awkah a lenglei company ah an kuat. A donghnak ah, videocassette le DVD pawl cu Khrihfabu ah kuat a si. 2013 kum ca lawngah kut holh DVD chuahnak ah $2,000,000 leng kan hman.

 A hna a chet i a holh kho lomi pawl cu mah timhtuahnak cungah an i lawm tuk. Asinain a hleiin cassette le DVD cu a tam thluahmah caah video pawl hman cu a zungzal in cun a fawi lo. Thil sining cheukhat ahcun Baibal cauk pakhat i thlaknak caah DVD tampi a hau. Brazil i unaupa Gilnei nih hitin a chim: “Baibal caang pakhat rel kan duh fatin mah Baibal caang a umnak videocassette le a umnak zawnte kha kawl a hau. Mah cu a har tuk.” Kut holh DVD a hmangmi unaunu Rafayane nih hitin a chim: “Mah cu pumpak hlathlainak tuahnak caah a har tuk. Baibal caang le cherhchanmi pawl kawlnak caah a caan tampi kan hman.” Cun unau pawl cu phungchim an kal tikah a lung a thomi hna i an TV ah DVD asiloah videocassette kha an piah khawh nakhnga an i ken. Unau cheukhat cu DVD piahnak seh hmanh kha an i put. Asinain tlawmpal ah screen a ummi kutput DVD piahnak seh a hung chuak i mah kha unau tampi nih an hman. United States ah a ummi Bobby nih hitin a ti: “Baibal caang pakhat na piah hnuah a dang pakhat piah na duh ahcun a dang DVD pakhat na thlen a hau. Mah cu a caan a dih tuk i biaruahnak ah Baibal hman awkah ri a ngeihter.”

 2013 ah Jehovah bupi nih JW Library Kut Holh app kha an chuah, mah nih unau pawl kha an phone asiloah tablet in kut holh video pawl kha download awk le piah awkah a bawmh hna. Mah app cu a hmasa bik ah American Kut Holh in chuah a si. Cun 2017 ah kut holh vialte in hmuh khawh awkah thar chuah a si. Cucaah vawleicung pumpi i unau pawl cu an i lawm tuk. Brazil i unaupa Juscelino nih hitin a ti: “Mah cu ka zum kho lo! Uktu Bu nih a hna a chet i a holh kho lomi kanmah pawl a kan dawt ning le a holh khomi hna bantukin biatak ah ṭhanchoter a kan duh ning kha ka ruat peng. Mah nih ka lung a cawlcanghter tuk i mah app nih Baibal kha tam chinchin in hlathlai awkah a ka forh.”

 Atu ah kut holh video vialte kha digital in chuah a si i kan website le JW Library Kut Holh app ah hmuh khawh a si. Cucaah kut holh ca hna kha holh leh khawh, i thlak khawh a si i a thla asiloah a kum in rauh ti loin ni tlawmpal chungah hmuh khawh a si cang. Kut holh tampi in ca hna kha a holh khomi caah chuahmi ca hna he caankhat te ah chuah a si.

 A hna a chet i a holh kho lomi unau cheukhat nih an chimmi hi zohhmanh u. Klízia timi unaunu nih hitin a chim: “A hna a chet i a holh kho lomi nih thlarau rawl fawi tein an hmuh khawh nakhnga mah tlukin a zohkhenhmi zei bu dah a um? Kan caah Jehovah bupi nih a kan tuahpiakmi he tahchunh khawhmi zei bu hmanh vawleicung ah a um lo.” Vladimir nih hitin a ti: “Jehovah nih a hna a chet lomi a zohkhenh hna bantukin a hna a chetmi pawl zong a kan zohkhenh ti kha mah video pawl nih a ka hngalhter.”

 Kut holh video pawl ah hitin langhter a si: “Mah cauk cu lungtho tein pekmi thawhlawm in chuahmi a si. Vawleicung pumpi ah Baibal kong hngalh awk mi bawmhnak ah hmanmi a si ve.” Thawhlawm nan pekmi cungah kan i lawm tuk. Thawhlawm pek ning lam tampi kha donate.pr418.com ah hmuh khawh a si. Mah thawhlawm hna kha kut holh a hmangmi i telin mi vialte caah Baibal le Baibal hlathlainak bawmtu ca hna chuahnak ah kan hman.