2021, January ah Uktu Bu nih Baibal cawnpiaknak caah bawmtu a simi Nunnak Kha Zungzal In I Nuamhpi! a timi cauk thar chuah a si tiah an rak thanh. Mah thawngthanhnak kha zeitindah na lehrulh? Canada ah a ummi Matthew nih hitin a ti: “Ka lung a cawlcang tuk! Zeicah mah cauk cu chuah a si i zeitindah an hmanter chunh hna timi kong a fiantermi phungchimnak le video hna an piah tikah ka lung a cawlcang chinchin. Mah cauk kha hmuh lai le hman lai kaa ngaih tuk.”

 Nunnak Kha Zungzal In I Nuampi! timi cauk nih Baibal cawnpiaknak tuah ning thar kha a langhter. Asinain cauk thar le a hmasa ah rak hmanmi cawnpiaknak caah bawmtu cauk pawl an i dannak cu mah ruangah lawng a si lo. Nunnak Kha Zungzal In I Nuampi! timi cauk kha nammi in na hman ahcun a dang aa thleidannak zong na hmuh lai. A ruang hngalh awkah mah cauk cu zeitindah timhtuah a si ti kha ṭha tein zohhmanh hna u sih.

 A chahmi catlap. Mah cu zeicah a herh? Nunnak Kha Zungzal In I Nuampi! timi cauk ah a rong phunphun a ummi hmanthlak 600 leng aa tel, mah cu A Kan Cawnpiak timi cauk nakin let hra hrawngin a tam deuh. Mah cauk thar i catlap hna ah ca le hmanthlak a um lonak, a lawngmi hmun zong a tam deuh. Mah a kong pahnih ruangah buaibainak pakhat a chuak kho: Catlap a pan ahcun a hnulei catlap i hmanthlak pawl cu a thlam an lang men lai. Cutin a si nakhnga lo, U.S.A., New York , Wallkill i Ramkomh Cauk Namnak Department (IPD) i unaupa pawl nih naiah hmanmi catlap phunli kha an hneksak. Uktu Bu i Caṭialnak Kawmiṭi nih mah catlap hna kha ṭha tein an zoh i a thlam a lang lo bikmi catlap kha an thim. Cucaah Nunnak Kha Zungzal In I Nuampi! timi cauk ah hmanmi catlap cu a dang kan cauk pawl caah hmanmi catlap nakin a man zatuak 16 hrawng a dih deuh. Asinain mah nih Baibal a cawngmi hna kha catlap a hnulei i hmanthlak ruangah lungvaivuanh loin rel khawh awkah a bawmh hna.

 Aa thleidangmi a phaw. Mah cauk thar i a phaw cu a dang kan cauk pawl i a phaw he aa dang. Zeicahtiah fawi tein a rawk kho lomi, a pan ngaingaimi plastic in khuh a si. Cauk thar i a phaw caah a tleumi kha hman loin a tleu lomi thil kha hman a si, mah nih a phaw hmanthlak kha a cuanter. Cun atu le atu hman ruangah a hlunh colh nakhnga lo zong a kilven. Asinain a tleu lomi a phaw man cu a tleumi nakin let nga lengin a dih deuh. Cucaah zung ṭengnge tampi cu a man a fawi deuhmi, a tleu lomi a phaw hmuh awkah an i zuam.

 A man a fak deuhmi cu bantuk thil cu zeicah thim a si? IPD ah a ṭuanmi unaupa nih hitin a fianter: “Mah cauk hi ṭha tein hman khawh awkah kan i ruahchan, cucaah voi tampi hman hnu hmanhah a ṭhami le zoh aa dawhmi siseh ti kan duh.” Brazil zung ṭengnge i Cauk Namnak ah a ṭuanmi Eduardo nih hitin a chim: “Jehovah bupi nih thawhlawm kha fimkhur tein an hman buin mah cauk kha aa dawhmi, saupi a nguhmi le hman a nuammi a si nakhnga a ṭhami thilri pawl an hman caah kan i lawm tuk.”

 Nunnak Kha Zungzal In I Nuampi! timi cauk cu 2021, March thla in nam a si. COVID-19 pulrai chung a si caah harnak tampi a um. Bethel cu khar a si caah cauk namnak ah a lenglei in bawmtu an ra kho lo i Bethel ah rianṭuan ding zongin unau thar pawl sawm khawh an si lo. Cucaah cauk namnak cheukhat ah minung kan i za lo i a dang cauk namnak cu cozahlei khamnak ruangah chikkhat khar a si.

 Mah zuamcawhnak hna cu zeitindah tawnghtham a si? Cauk namnak ah rianṭuan khawh a si tikah Bethel a dang department i unau pawl cu cauk namnak ah chikkhat bawmh dingin rian pek an si. IPD ah a ṭuanmi Joel nih hitin a ti: “Mah ca ṭhatnak hlawt duhnak lungput le rian thar cawn duhnak lungput an ngeihmi cu mah rian liim khawhnak caah man a ngei tuk.”

 Harnak tampi lakah Nunnak Kha Zungzal In I Nuampi! timi cauk cu nuai tampi kan nam cang. Cutin tuah khawh awkah namnak seh, plastic pan tein khuhmi a phaw, catlap, cahang le aa benh khomi thil hna i telin thilri tampi a herh. A hmasa thla nga chung i kan nammi thilri ca lawngah (U.S.) nuai 2.3  leng a dih. A dihmi tangka a tlo nakhnga Khrihfabu i cauk a herh taktakmi ca lawngah kan nam.

 Baibal cawnpiaktu le a cawngmi hna nih Baibal cawnpiaknak caah bawmtu a simi mah cauk thar kha zeitindah an hmuh? Australia i unaupa Paul nih hitin a ti: “Nunnak Kha Zungzal In I Nuampi! timi cauk kha ka duh tuk i Baibal cawnpiaknak ah hman lai kaa ngaih tuk. Cauk muisam cu lungthin a la tuk i, i ruahceihṭinak caah a ṭha tuk. A fiangmi a konglam, lung a sumi biahalnak, video, hmanthlak, cazin le a cawngtu caah hmuitinh hna an i pehtlaih ning cu a ṭha tuk. Ka cawnpiak ning ṭhancho awkah a ka bawmmi, zungmawi pakhat bantuk a si.”

 United States ah a ummi Baibal a cawngtu pa pakhat nih hitin a ti: “Mah cauk thar cu ka duh tuk. Hmanthlak nih a biapimi a kong hna hngalhthiam awkah a ka bawmh. Video nih ka lung a ka lak tuk i tuahsernak in langhter awkah a ka forh.” Mah pa cu zarhkhat ah voihnih Baibal a cawng i Khrihfabu pumhnak zongah aa pum peng.

 Nunnak Kha Zungzal In I Nuampi! timi cauk kha holh phun tampi in uk nuai tampi nam a herh rih. Uktu Bu nih mah cauk kha holh phun 710 in chuah awkah an hna a tla, mah cu A Kan Cawnpiak timi cauk nakin holh phun 340 lengin a tam deuh.

 Cauk namnak caah a dihmi tangka kha khoika in dah kan hmuh? Vawleicung pumpi rianṭuannak caah pekmi thawhlawm in a si, thawhlawm pek ning lam tampi kha donate.pr418.com ah hmuh khawh a si. Siannak nan langhtermi kha kan sunsak tuk, mah nih Jehovah kong le “nunnak kha zungzal in i nuamhpi” khawh awkah cawn a duhmi hna caah Baibal cawnpiaknak ah a bawmmi cauk chuah dingin a kan bawmh.—Salm 22:26, NW.