“Uktu Bu nih zei bantuk cozah khenkhamnak hmanh a um ti lo ahcun April 1 zarh thawkin Khrihfabu dihlak ah minung in i pumhnak kha thawk dingin bia an khiah.” 2022, March thla hramthawk ah jw.org ah taarmi mah thawngthanhnak nih vawleicung pumpi i Jehovah Tehte Hna kha an lung a cawlcanghter tuk. Asinain COVID-19 pulrai cu a dih rih lo. a Aa pummi hna nih mah virus an i chawnh nakhnga lo zei bantuk thlennak, bawmhnak le thilri hna dah a herh? Kumhnih hrawng minung in kan i pumh ti lo hnuah Biakinn cu pumhnak caah timhcia a si lai maw?

 A tak ti ahcun unau pawl nih Biakinn ah pumhnak tuah ṭhan khawh a si nakhnga thla tampi chung timhtuahnak an rak ngei cang.

 2020 ah minung in i pumhnak ngol a si in thlakhat hnuah New York, Warwick i Vawleicung Pumpi Design/Innsaknak Department (WDC) nih zeitindah COVID-19 nih Biakinn kan hman ning a hnorsuan khawh i pumhnak inn hna a him nakhnga zei hna dah tuah a herh ti kha an hun tuaktan.

 Vawleicung hmun cheukhat i a herhmi le a dang hmun i a herhmi cu aa lo tawn lo. WDC ah rian a ṭuanmi Matthew De Sanctis nih hitin a ti: “Ram cheukhat nih an tonmi buaibainak pakhat cu kutṭawlnak kong kha a si. Biakinn ah ti a um lo tikah ti cawk a herh asiloah tiva le tikhor hna ah ti than a herh. A dang ram cheukhat ahcun cozah nih air-con, thli luhchuahnak, ngandamnak le thianhhlimhnak kong he aa tlaiin ralrin peknak cataar ti bantuk kongah a herh ningin thlennak an tuah.”

 Unau pawl nih mah zuamcawhnak hna kha zeitindah an tawnghtham? Matthew nih Biakinn tampi caah “a sawhsawhte a si i tangka a dihmi a tlawmmi lam in tawnghtham ning hna cu hmual an ngei tuk” tiah a ti. Tahchunhnak ah, Papua New Guinea ah kutṭawlnak hmun hna ah ti merh aa bunhmi, liter 20 (gal 5.3) plastic pung hna kha an hman. Cucaah unau pawl nih khuate i Biakinn pakhat caah US dollar 40 lawng an hman. Africa i Biakinn pawl caah a ṭhami kutṭawlnak 6,000 leng kha Asia i thilzuartu pakhat sinin an cawk.

 Biakinn ah thli thiang ṭha tein a luh nakhnga pangka (fan) le thli luhchuahnak hna kha an bunh asiloah an remh. Khrihfabu tampi ah aa pummi hna nih microphone an tawngh nakhnga lo a fung a saumi kha an cawk. Virus i chawnh khawh a sinak kutka tlaihnak le ti merh ti bantuk kha kut in tawngh hau lo phun in an tuah i hmaan tein sii in an thianh. Khrihfabu cheukhat nih zunput hna ah amah tein aa awngmi sensor hna kha an bunh. Chile ram ah a herhmi thlennak tuahnak ah Biakinn pakhat caah buaktlak in US dollar 1,400 kha an hman.

 Biakinn himnak ca kha biapi ah chiah a si buin unau pawl nih thawhlawm kha fimkhur tein hman awkah an i zuam. Tahchunhnak ah, ram cheukhat ahcun kutṭawlnak le microphone bunhnak fung a saumi cawknak ah cozah sinin bawmhnak an hmu. Zung ṭengnge hna nih tangka a dihmi a tlo deuh nakhnga voidang tawn nakin thilri pawl kha tam deuhpi in an cawk. Zung ṭengnge le Vawleicung Pumpi Thil Cawknak Department nih man fawi deuh in an cawk khawh nakhnga le khulrang in an kuat khawh nakhnga a herhmi thilri pawl kha a chuahtu hna sinah direct in cawk awkah an timhtuah.

 Biakinn a him nakhnga timhtuahnak cu minung in aa pummi hna caah hupphengtu taktak a si. Peru ah a ummi unaunu Dulcine nih Biakinn ah i pumh ṭhan a si cang lai ti ka theih tikah “ṭihphannak tlawmpal” ka ngei tiah a ti. Hitin a ti: “Pulrai aa thawk hnu tlawmpal ah COVID-19 in ka zaw. Cucaah mah virus in ka zaw ṭhan kho ti ka hngalh caah Biakinn ah i pumh ding cu a fawi lo tiah ka ruah. Asinain Biakinn ka phanh tikah Khrihfa upa nih kan him nakhnga caah kutṭawlnak le a fung a saumi microphone ti bantuk thil tampi an timhtuahmi kha ka hmuh, cun pumh hlan le pumh dih hnu paohah sii in thianhhlimhnak an tuahmi zong ka hmuh. Mah vialte cu himnak caah ka herhmi an si.” b

 Zambia ah a ummi unaunu Sara cu a dang zuamcawhnak a tong. Hitin a ti: “A luancia thla tampi lioah ka vapa nih COVID-19 ruangah a ka thihtak. Amah tel loin minung in a hmasa bik kaa pumh tikah zeitindah ka um lai ti kha ka thin a rak phang.” Asinain Biakinn ah i pumhnak kha atu ah zeitindah a hmuh cang? Hitin a ti: “Hi donghnak caan chungah Jehovah nih a kan umpi ti kha minung in i pumhnak nih a langhter. Cun a hlan nakin atu ah Khrihfa upa le unau pawl sinin thazaang peknak, dawtnak le ka herhmi bawmhnak hna ka hmu deuh tiah ka ruah.”

 Vawleicung pumpi i zumtukhat unau pawl nih Biakinn ah i pumh ṭhan khawhnak caanṭha an hmuh caah an i lawm tuk. donate.pr418.com hmangin nan pekmi thawhlawm cungah kan i lawm tuk. Mah nan pekmi thawhlawm nih a thiangmi biaknak ah a biapimi hmun ah siarem tein le him tein i pumh khawh awkah a kan bawmh.