“Mah cauk ka hngahnak hi kum 19 a si cang.” Kan unau hna nih mah can sau cu an hngahmi cu zeidah a si? Anmah holh a simi Bengali holh in lehmi Vawlei Thar Lehnak Baibal, Khrihfa Greek Baibal kha a si. Mi tampi zong nih anmah holh in Vawlei Thar Lehnak Baibal chuah a si tikah cutin an ti ve. Asinain mah Baibal pawl lehnak le chuahnak ah zeidah aa tel lai tiah na ruat bal maw?

 Pakhatnak ah, Uktu Bu i Caṭialnak Kawmiṭi lamhruainak ningin holhlettu phu pakhat kha rian an pek hna. Baibal holhleh awkah zei can dah a rauh tawn? New York, Warwick i Holhlehnak Rian a ṭuanmi unaupa Nicholas Ahladis nih hitin a ti: “Project caah holhlettu pa zeizat dah a hau lai? Holh cu zeitlukin dah a hnok? Baibal chan lio i hnulei sining kha careltu hna nih zeitlukin dah an hngalhthiam? Cun an miphun ning cio in an holh tah aa dang maw ti bantuk a kong lam hna kha ṭha tein ruahchih a hau. Zatuak in cun Khrihfa Greek Baibal leh awkah kumkhat in kumthum tiang a rau tawn i a uk ningin cun kumli asiloah mahnak tam a rau tawn. Kut holh a hmangmi hna caah cun a rau chinchin.”

 Baibal leh awkah holhlettu phu lawng in a za lo. Hnulei sining aa dangmi, a caan ah ramdang ah a ummi a lenglei i careltu hna nih tangka la loin holh kan lehmi a chiat, ṭhat kha an kan checkpiak. Mah nih a hmaan i a fiangmi Baibal chuah khawh awkah holhlettu pawl kha a bawmh hna. Thlanglei Africa ah a ummi Baibal lehnak ah cawnpiaktu a simi unaupa pakhat nih hitin a ti: “Holhlettu pawl nih Jehovah le Baibal reltu hna cungah rian nganpi kan ngei tiah an ruah.”

 Baibal an leh dih hnuah nam le ṭhit zong a hau. Cucaah canamnak ah a tlawm bik ah thilri phunhra “catlap, cahang, a bawm, kaw, a phaw liner, ngun rong cahnah, a hri, a lu kamh, a hnulei phaw le a tuamtu thil” hna an hau. 2019 ah Baibal chuah khawh awkah mah thilri hna ca lawngah dollar nuai 20 leng a dih. Mah kum chungah Baibal chuah awk le kuat awkah cauk namnak inn i rian a ṭuanmi hna nih suimilam 300,000 leng an hman.

 Mah rian caah zeicah a caan le tangka kha mah tluk tam in kan hman? Mah kong he aa tlaiin Ramkomh Cauk Chuahnak Depertment ah rian a ṭuanmi Joel Blue nih hitin a ti: “Baibal cu kan chuahmi cauk vialte lakah a biapi bikmi a si. Cucaah mah cauk nih kan chimmi thawngṭha le kan biakmi Pathian kha thangṭhatnak hmuhter hna seh ti kan duh.”

 Mah lengah a herh taktakmi careltu hna ca zongah Vawlei Thar Lehnak Baibal kha kan chuahmi a si. Tahchunhnak ah, mitcaw mi hna caah Vawilei Thar Lehnak Baibal kha holh phun pahra in chuah a si. Mitcaw mi ca Baibal pakhat ṭial awkah suimilam pariat hrawng a rau. Cun ṭhen tampi aa telmmi mitcawmi hna cauk chiah awkah a tlawm bik 2.3 meter (pe 7.5) a kaumi cauk chiahnak bizu pakhat a hau. Mah lengah catlap in chuahmi phun cauk lawng hman a ngahmi thongtla pawl hna ca zongah Baibal kha a hlei khun in chuahpiak an si ve.

 Vawilei Thar Lehnak Baibal nih a reltu hna i an nunnak ah ṭhatnak a chuahter. Congo i Democratic Republic ram, Tomne hmun ah a ummi, Kiluba timi Khrihfabu kong hi ruathmanh. Tombe cu khuapi in kilometer 1,700 (meng 1,000) leng aa hlatnak hmun ah a ummi a si. Mah ah a ummi unau pawl cu Baibal ukkhat lawng an ngei. An ngeihmi Baibal zong a hlun tukmi, Kiluba holh in ṭialmi a si. Pumhnak ca an i timhtuah tikah unau pawl nih mah Baibal ukkhat kha a changchang in an rel. Asinain 2018, August ah chanthar Kiluba holh in Vawlei Thar Lehnak Baibal kha a uk ning in unau pakhat cio nih an rak hmuh khawh.

 Vawlei Thar Lehnak Baibal kong he aa tlaiin German holh a hmangmi unaunu pakhat nih hitin a ti: “Baibal rel a hau tiah ka chim ti lo. Mah canah ‘zeitikah dah ka rel ṭhan ah a ṭhat lai’ ti tu in ka ruah cang.” Thongtlami pakhat zong nih hitin a ti: “Vawlei Thar Lehnak Baibal pakhat ka ngei. Mah nih ka nunning a thlen. Hlan ahcun Baibal ka rel tikah ka rak theithiam kho bal lo. Jehovah Tehte Hna i an kong le Jehovah Tehte pakhat si khawh ning hna kha hngalh ka hun duh.”

 Vawlei Thar Lehnak Baibal a relmi paoh cu mah Baibal chuahnak caah an pekmi thawhlawm caah an i lawm tuk. Vawleicung pumpi rian caah pekmi thawhlawm tam deuh cu donate.pr418.com ah pekmi a si. Siang ngaiin nan pekmi thawhlawm cungah kan i lawm tuk.