Holhlehnak phu ah caantling in rian a ṭuanmi zatuak ah 60 cu zung ṭengnge si loin holhlehnak zung (RTO) ah a ṭuanmi an si. Mah timhtuahnak cu zeicah a ṭhathnemh? RTO ah hmualngei tein rian an ṭuan khawh nakhnga zei hna dah a herh? Holhlettu phu hna i an umnak hmun cu an holhleh ning cungah zeitindah huham a ngeih?

 RTO dirh a si caah holhlettu pawl cu an lehmi holh a hmangmi mi tam deuh an umnak hmun ah umnak caan ṭha an hmu. Nitlaklei German holhlehnak ah rian a ṭuanmi Karin nih hitin a ti: “Mexico, Chihuahua peng Cuauhtémoc khua ah a ummi RTO i kan i ṭhial thawk in holhlettu kan hawile he bia kan i ruah tik, phungchim rianṭuannak kan i tel tik le dawr i kan kal tikah siseh, zeitik caan paohah Nitlaklei German holh lawng in kan holh. Kan holh a hmangmi hna nih an kan kulh. Cun kum saupi kan theih ti lomi nunphung holh hna kha kan hun thei i aa thlengmi biafang hna zong kha kan hun hngalh.”

 Ghana i Frafra holhlettu phu ah rian a ṭuanmi James nih a caan ah Bethel chungkhar kha ka ngai tuk tawn hna tiah a ti. Asinain hitin a ti chap: “RTO ah rian ṭuan kha ka duh tuk. An holh in phung ka chim tik le mi nih thawngṭha an lehrulhmi ka hmuh tikah kaa nuam tuk.”

 Unau pawl nih RTO hmunhma chiahnak kong he aa tlaiin zeitindah biakhiahnak an tuah? U.S.A, New York, Warwick i Vawleicung Pumpi Design/Inn Saknak Department chungtel a simi Joseph nih hitin a ti: “A harmi pakhat cu hmun cheukhat ahcun mei, ti asiloah holhleh dingmi ca hna hmuh awkah Internet ti bantuk a um lo. Cucaah hmun tampi kha tahchunh in kan thim i kan ruah.”

 A rang bik le a tlawm bik a dih nakhnga holhlettu pawl caah um kal a fawimi Pumhnak Tuahnak Hall, Biakinn asiloah missionary inn hna kha RTO caah hman a si. Cu bantuk inn a um lo ahcun holhlettu pawl umnak le rianṭuannak ah a ṭha dingmi ṭaih khaan le zung khaan hna cawk dingin nawl awnh a si. Hman a herh ti lo ahcun mah ṭaih khaan hna kha fawi tein zuar khawh a si i tangka kha a herh deuhnak hmun caah hman khawh a si.

 2020 rianṭuannak kum chungah RTO pawl rian an ṭuan khawh nakhnga (U.S.) dollar nuai 13 hman a si. Holhlettu phu caah computer, a ṭha deuhmi software, audio caah a herhmi thilri, Internet le a hrampi hman dingmi thilri hna kha a herh. Tahchunhnak ah, mi pakhat caah computer le a dang seh thilri hna bunh awkah (U.S.) $750 hrawng a dih. Computer chungah an cawkmi software le Vennak Innsang Holhlehnak System hna kha an rawn. Mah system nih holhleh dingmi pawl timhtuah awk le cherchanhmi pawl fawi tein rel khawh awkah a bawmh.

 Mah lengah zung khaan chungah awkhumh khawh a si nakhnga awkhumhnak thilri hna zong kha an bunh. Mah thilri hna cu COVID-19 pulrai aa thawk tikah man a ngei tuk. Holhlettu hna nih awkhumhnak thilri hna kha inn ah an i ṭinpi i holhlehmi cauk le video hna kha aw an i khumh.

 An hmun i mah lungtho tein aa pemi unau pawl nih holh an lehmi kha an relpiak hna i RTO inn pawl zong kha an zohkhenhpiak hna. Thlanglei Africa, Cape Town, Afrikaan RTO ah rian a ṭuanmi Cirstin nih “thawngthanhtu le hmaanhmaan hmaikal tampi cu rian bawmhnak caan ṭha an hmu” tiah a ti.

 Mah cu mah lungtho tein aa pemi hna caah tinvo sung taktak a si. Unaunu pakhat nih RTO ah rian ka bawmhmi nih “thazang le hrimhnak a ka pek” tiah a ti. Unau cheukhat nih awkhumh an bawmh hna. Mexico, Veracruz i Totonac holhlehnak ah rian a ṭuanmi Juana nih hitin a ti: “Atu ahcun kan leh dingmi holh a hmangmi hna he kan i naih deuh cang caah unau pawl caah aw rak i khumh zong a fawi deuh cang.”

 Asinain RTO dirh a simi nih holhleh ning kha a ṭhat deuh nakhnga a bawm taktak maw? Kan ca a relmi nuai tampi nih a bawmh tiah an ti. Congo, Democratic Republic i Kongo holhlehnak ah rian a ṭuanmi Cédric nih hitin a ti: “A hlan ahcun unau cheukhat nih Kongo holh kan leh ning kong he aa tlaiin ‘Kongo Vennak Innsang Cauk’ tiah an ti. A ruang cu ca kan leh ning cu a lengah an hmanmi Kongo holh he aa lawh lo caah a si. Asinain atu ahcun nifatin hmanmi chan thar Kongo holh a si cang tiah an ti.”

 Xhosa holhlehnak ah rian a ṭuanmi Andile nih Thlanglei Africa zongah cutin an lehrulh ve tiah a ti. “Mi tampi nih holh kan leh ning aa thlenmi kha an hmuh. A hlanah Mirang in Vennak Innsang a relmi ngakchia pawl hmanh nih atu ahcun Xhosa holh in an rel cang. Remh ṭhanmi Vawlei Thar Lehnak Baibal kha hmaan tein le fiang tein leh a si caah an duh tuk.”

 RTO dirh awk, kilven awk le mah ah rian a ṭuanmi hna caah a dihmi tangka kha vawleicung pumpi rianṭuannak caah pekmi thawhlawm chungin hman a si. Mah ah donate.pr418.com in hmuhmi thawhlawm zong aa tel.