Thla fatin thazaang a pemi JW Broadcasting program le video hna zoh lai kha kan i ngaih tuk. Asinain Africa ah a ummi unau tampi cu mah program hna kha Internet in an zoh kho lo. Zeicah?

 Africa i hmun tam deuh ahcun Internet line a ngah lo. A ngahnak hmun zongah a nuar tuk asiloah a man a fak tuk. Tahchunhnak ah, Madagascar ah peng zohkhenhtu pakhat nih Internet line in thla fatin JW Broadcasting pakhat download tuah awkah $16 a liam. Mah cu mi pakhat nih zarhkhat a hmuhmi tangka nakin a tam deuh. a

 Cu bantuk harnak hna a um ko nain Africa i unau nuai tampi cu atu ahcun Internet line loin JW Broadcasting kha an zoh khawh cang. Zeitin in dah?

 2017 thawkin Saharan thlanglei Africa ah a ummi hna caah JW Broadcasting kha satellite TV channel in an thlahpiak hna. Mah line kha holhphun 16 in zarhkhat ah suimilam 24 chung man loin an thlahpiak hna.

 Cutin an tuah khawh nakhnga TV thlahtu pawl he Jehovah Tehte Hna nih cabia hrennak an tuah. Cucaah mah line kha Saharan thlanglei Africa i ram 35 hrawng nih an zoh khawh. Thlakhat ah $12,000 leng an pek hna. A caan ah a dang line pakhat thlahpiak awkah tangka kha an pek chap hna. Mah timhtuahnak ruangah unau pawl nih civuipi asiloah zung ṭengnge lennak hna i telin a dang a ṭha tukmi program hna zong kha an zoh khawh.

 Jehovah Tehte a si lomi hna i telin mi tampi nih anmah inn cio in JW satellite channel kha an zoh khawh. Asinain unau tampi cu satellite channnel in zoh khawh awkah a herhmi seh thilri hna kha an i cawk kho lo. Cucaah Biakinn 3,670 lengah satellite channel a ngahmi seh kha an bunhpiak hna i cuticun unau pawl nih JW Broadcasting kha an zoh khawh. Biakinn ah TV asiloah projector a um cang ahcun a kuat man i telin satellite channel a ngahmi seh bunhnak caah $70 hrawng a dih. TV asiloah projector a um lo ahcun $530 hrawng tiang a dih.

 Satellite channel an bunhpiak hna caah unau pawl cu an i nuam tuk. Cameroon i Khrihfa upa pakhat nih hitin a ti: “Kan chungkhar caah thetse ram ah manna changreu a kan thlakpiakmi bantuk a si.” Nigeria ah a ummi unaupa Odebode nih hitin a ti: “Kan chungkhar in zarhkhat ah viothum kan zoh. Ka fale nih mah caan kha an i ngaih tuk. A dang caan hmanhah JW channel zoh dingin an ka hal.” Nigeria ah a ummi Rose zong nih hitin a ti: “Thawngpang zoh loin a um kho lomi keimah hmanh atu ahcun JW satellite channel lawng ka zoh cang. Thawngpang ka zoh lio ahcun ka hmuhmi thil ruangah ka thin a tawi, ka thin a hung i ka thi hmanh a kai. Asinain JW Broadcasting nih cun hrimnak le thazaang a ka pek. JW Broadcasting cu ka duh bikmi channel a si. Mah cu Jehovah sinin hmuhmi thluachuah a si.”

 Mozambique i peng zohkhenhtu pakhat nih a zohkhenhmi peng chung i Biakinn hna ah satellite channel pawl bunh a sinak kong le unau pawl cu satellite in JW Broadcasting zoh awkah pumh thawk hlan suimilam pakhat aa duh hrawng ah an phanhnak kong kha report a pek.

 Thlanglei Africa, Johannesburg ah tuahmi 2019 ramkomh civui ah Uktu Bu pakhat phungchimnak i telin a biapimi phungchimnak hna kha mah channel in hmunkua ah an thlahpiak hna. Thlanglei Africa zung ṭengnge i Broadcasting Department ah rian a ṭuanmi Sphumelele nih hitin a ti: “A hlan ahcun phungchimnak hna kha Internet in thlah a si. Asinain Internet line a ṭhat lawngah a ngah i a dihmi zong a tam tuk. JW satellite channel kan hman hnu cun a dihmi zong a tlawm i zumh khawh zong a si deuh.”

 Vawleicung pumpi rianṭuannak caah siang ngaiin thawhlawm nan pek caah Africa ah a ummi unau pawl nih JW Broadcasting kha an zoh khawh cang. Internet i donate.pr418.com ah hmuhmi lam tampi kha hmangin thawhlawm nan pek caah kan i lawm tuk.