2020 ah vawleicung pumpi ah leiser ral a phunphun le COVID-19 pulrai hna kan tong. Jehovah Tehte Hna nih mah harnak a tongmi hna kha zeitindah an bawmh hna?

 2020 rianṭuannak kum a chungah Uktu Bu i Khuakhangtu Kawmiṭi hna nih har tongmi hna bawmhnak caah dollar nuai 28 b hrawng hman dingin nawl an awnh. Cucaah COVID-19 pulrai, a lumnak ram i cyclone thlichia, Africa i tilian, Venezuela i mangṭam le Zimbabwe i khuakhennak i telin rai phun 200 leng ruangah harnak a tongmi hna kha an bawmh khawh hna. Rawl, ti, umnak inn, thilpuan le sii pawl lengah thianhhlimhnak, inn remhnak le innsaknak caah a hrampi a herhmi thil hna zong kha an bawmh hna. Mah bawmhnak rian kong kha tlawmpal in zohhmanh hna u sih.

 COVID-19. Mah pulrai ruangah vawleicung pumpi ah a ummi unau pawl cu pumsalei, lungthinlei le chawlehnaklei ah harnak an tong. Anmah bawmh awkah vawleicung pumpi ah Har Tongmi Hna Bawmhnak Kawmiṭi (DRC) 800 leng dirh a si. Mah kawmiṭi hna nih unau pawl herhmi kha an bawmh peng hna i Khuakhangtu Kawmiṭi hna nih har tongmi hna bawmhnak kha ṭha tein an ṭuan khawh nakhnga report an pek colh hna.

 Unau pawl nih rawl, ti, thianhhlimhnak caah hmanmi thilri hna le a hrampi a herhmi sii hna hmuh awkah DRC kawmiṭi hna nih an bawmh hna. Hmun cheukhat ahcun unau pawl nih cozah sinin bawmhnak an hmuh nakhnga DRC kawmiṭi pawl cu an hmunhma ah a ummi Khrihfa upa pawl he rian zong an ṭuanṭi.

 Har tongmi hna bawmhnak kan tuahmi kha Jehovah Tehte a si lomi hna nih an hmuh. Tahchunhnak ah, Zambia, Nakonde ah peng hruaitu a simi Field Simwinga nih hitin a ti: “Har tongmi hna kha a caante ah nan bawmh hna caah nan cungah kan i lawm tuk.”

 Angola i mangṭam. COVID-19 pulrai ruangah Angola ah eidin awk a hun har tuk i a man zong a fak tuk. Cucaah unau tampi nih tirawl cawk kha an i harh.

 Brazil zung ṭengnge cu Angolan i unau pawl sinah tirawl pawl kuat dingin hal an si. Har tongmi hna caah an pekmi thawhlawm kha a ṭha bik in an hman khawh nakhnga unau pawl nih tirawl cawk awk le funtom awkah a ṭha bikmi lam kha ṭha tein an dothlat. Rawl pawl kha voikhatte ah an cawk dih. Cucaah facang, pe le chiti ti bantuk a herhmi tirawl kilogram 20, (pound 44) dengmang aa telmi tirawl funmi pakhat caah a fun man a dihlak fonh ah $22 lawng a dih. Rawl funmi 33,544, a dihlak fonh ah 654 metric ton (U.S. ton 721) an kuat hna. Anmah hmun ah a chuakmi le an kuatmi hna rawl nih minung 50,000 leng kha a bawmh khawh hna.

 Mah har tongmi hna bawmhnak kong he aa tlaiin unau pawl cu zeitindah an um? Angola i amah te lawng a ummi khua ah a ummi Alexandre nih hitin a ti: “Mah nih Jehovah nih a ka dawt, keimah lawng ka si lo i a bupi nih an ka sunsak ti kha a langhter.” Nuhmei a simi Mariza nih hitin a ti: “Jehovah nih ka thlacamnak kha a ka theihpiak. Jehovah le a bupi cungah kaa lawm tuk.”

 Zimbabwe i khuakhennak. 2020 rianṭuannak kum chungah Zimbabwe ah fakpi in khuakhennak a um caah mi nuai tampi cu ṭam hal in an um. Zimbabwe i unau thong tampi zong rawl ei awk a za in an ngei lo.

 Unau pawl rawl in bawmhnak pek awkah Kawmiṭi panga dirh a si. Thawngthanhtu za leng nih rawl funtom awk le kuat awkah an bawmh hna asiloah an mawṭaw kha an hlanh hna. c 2020 rianṭuannak kum chungah minung 22,700 leng rawl in bawmhnak pek awkah $691,561 hman a si.

 Hmun cheukhat ahcun unau pawl rawl ei awk an ngeih lo caante ah bawmhnak kha a phan tawn. Cucaah an i nuamh tuk i Jehovah kha an thangṭhat. Unau cheukhat nih cun Pennak hla hmanh kha an hun sak.

 Hmun pakhat ah, Zatlang Nun He Aa Tlaimi Bu (NGO) nih an pekmi hna bawmhnak hmuh awkah i ruahceihṭinak meeting pakhat ah unaunu pahnih cu an kal ve. Asinain mah meeting ah ramkhellei kong hna aa hun i tel. Mah tikah unaunu hna nih mah bawmhnak kha cohlan lo awkah biakhiahnak an tuah i an chuak colh. Midang pawl nih “a hnuah kan sinah rak kan hal ṭhante hlah u” tiah an nihsawh hna. Asinain zarhhnih a rauh hnuah mah hmun ah unau pawl cu an phan i bawmhnak an pek hna. Mah caan tiang mah hmun ah NGO bawmhnak cu a phan rih lo.

 Zimbabwe i leiser ral a tongmi hna bawmhnak rian zongah a ṭhami tehte khaannak a um. Tahchunhnak ah, khuate ah a ummi Prisca kong hi ruathmanh. Khuakhennak ruangah harnak an tong ko nain Prisca cu Nithum Ni le Ninga Ni fatin phungchimnak ah aa tel peng. Cucaah an khuami pawl nih hitin an ti: “Phungchimnak lawngte ah na kal na chungkhar pawl cu an pawṭam in an thi dih cang lai.” Prisca nih hitin a leh hna: “Jehovah nih a salle pawl cu zeitikhmanh ah a kaltak bal hna lo.” A rauhhlan ah bupi sinin bawmhnak a hmuh. Mah tikah a innpa pawl cu an lung a suk tuk hna i Prisca kha hitin an ti: “Pathian nih aan kaltak bal lo, cucaah kannih zong mah Pathian kong kha hngalh kan duh ve.” Atu ah a innpa minung pasarih nih radio in an thlahmi pumhnak kha an ngaih ve cang.

 Donghnak caan a naih tuk cang caah leiser ral cu kan tong peng rih ko lai. (Matthai 24:3, 7) Internet i donate.pr418.com ah hmuhmi lam tampi kha hmangin siang ngaiin thawhlawm nan pek caah kan i lawm tuk. Harnak a tongmi hna kha a herh ningin bawmh awkah mah thlawhlawm hna kan hman lai.