Mi nuai za in an umnak Latin America ah anmah holh le anmah phunglam a ngeimi miphun tete nuai tampi an um. Mah miphun tete hna lakah tam deuh cu Jehovah Tehte an si i an nun phung kha an sunsak tuk. Annih nih mi pawl kha Baibal biatak kong hngalhter an duh hna caah Latin America ah an hmanmi miphun tete holh 130 lengin bupi chuahmi cauk hna kha an leh i an phawtzamh hna. a Asinain Jehovah an biak ca le Baibal he aa tlak lomi phunglam hna an zulh lo caah ralchanhnak an tong. Thawhlawm nan pekmi nih unau pawl kha zeitindah a bawmh hna?

 Mexico ram, Jalisco Peng, Huichol tlangram ah a ummi unau tampi nih mi sinah Baibal he aa tlak lomi biaknak phunglam hna ah an i tel lonak a ruang kha upatnak tein an chimh ko hna nain annih cu mi nih an huat hna. b 2017, December 4 ah Jehovah Tehte Hna le anmah he a um ṭimi midang kha a puarhrangmi phu pakhat nih an rak doh hna. An umnak hmun in an ṭhawl hna i an thilri kha an hrawh hna. Nan kir ṭhan ahcun kan in thah hna lai tiah an ti hna.

 An pawng ah a ummi Jehovah Tehte Hna nih unau pawl herhmi kha an bawmh hna. Asinain inn ṭin ṭhan awkah tah zeitin? Unaupa Agustín nih “sihni kha an hlang kho lo i upadi kong he aa tlaiin a ho sinah dah ruahnak cheuhnak kan hal lai ti kha an hngalh lo” tiah a ti.

 Unau pawl i zalong tein biaknak nawl an ngeihmi kha a hnorsuan caah Central America i zung ṭengnge nih an rak tawnghthampiak colh hna. Hmasa bik ah mah harnak a petu hna kong dothlatpiak awkah mah hmun i nawlngeitu pawl kha an fial hna. Mah hnuah Jehovah Tehte Hna i Uktu Bu Chungtel a simi Khuakhangtu Kawmiṭi sinah nawl an hal. Mah cu vawleicung pumpi i Upadilei Department he rianṭuanṭi awk le Huichol unau pawl aiawh in report tuah awkah a si. A donghnak ah mah kong kha Mexico ram i a sang bikmi biaceihnak zung a simi Miphun Biaceihnak Zungpi tiang a phan.

 Miphun tete hna i an nunphung kha midang nih an upat bantukin anmah miphun tete hna zong nih midang miphun pawl zalonnak kha an upat lai i an kilven lai tiah ram kip i sihni pawl nih fiang tein an chim. Khoika hmun i a ummi an si hmanhah mi kip nih minung zalonnak timi cu an ngei cio.

 2020, July 8 ah Biaceihnak Zung nih Jehovah Tehte pawl kha teinak an pek hna. An ṭhawlmi hna dihlak kha kirter ṭhan dingin nawl an pek hna. A hmasa ah langhtermi Agustín nih amah le a dang pawl intuarnak kong he aa tlaiin hitin a ti: “Unau pawl tuahmi thil ruangah kan i lawm tuk. Unau pawl nih kan bawm hna hlah sehlaw zeihmanh kan tuah thiam lai lo.”

 A bik in Ecuador ram, San Juan de Ilumán khua i Otavalo Nelrawn ah miphun tete tampi an um. Mah ah a ummi unau pawl zong ralchanhnak an tong ve. 2014 ah unau pawl nih a herhmi permit dihlak kha an lak i Biakinn an sak. Asinain tlangbawi pakhat nih minung 100 leng aa ratpi hna i biakinn saknak rian kha hramhram in an ngolter hna. Khuami pawl zong nih pumhnak tuah ti hlah u tiah an ti hna.

 Biaknak zalonnak nawl an buar nakhnga lo Ecuador zung ṭengnge le vawleicung pumpi zungpi ah a ummi upadilei department pawl cu an i fonh i biaceihnak zungah an report hna. Mah tikah Jehovah Tehte Hna kha ralchanh lo awk, Khrihfabu pumhnak tuah ṭhan awk le Biakinn a dihlak in sak awkah biaceihnak zung nih khuami pawl kha nawl an pek hna. Mah lengah hmailei zong ah unau pawl zalonnak kilven a si nakhnga aiawhtu pawl nih ramkomh zalonnak kha miphun tete hna nih an upat maw, upat lo timi a biapimi biahalnak kong he aa tlaiin biakhiahnak tuah awk zongah biaceihnak zung kha an hal hna.

 2020, July 16 ah Ecuador ram i a sang bikmi biaceihnak zung a simi Phunghrampi Biaceihnak Zung nih mah kong kha an tawnghtham. Ecuador ram ah a ummi sihni a simi unaupa pawl nih Khrihfabu aiawh in mah kong kha an tawnghtham. Cun hmuhtonnak a ngeimi ramkomh sihni a simi unaupa pali nih mah kong kha biaceihnak zungah an chuahpi. COVID-19 khenkhamnak ruangah ram tampi in video coference call in mah kong kha an ceih. Biaceihnak zung nih hi bantukin video coference call hmangin tawngtham awkah vawleicung pumpi Jehovah Tehte Hna bu a aiawhmi phu kha an awnhmi hna hi a voikhatnak a si. c Miphun tete hna cu miphun dihlak fonhmi an si ruang men ah minung zalonnak an sung lo timi kong kha fehter awkah biaceihtu phu nih ramkomh chimmi upadi kong hna kha an cherhchan.

 Otavalo Nelrawn ah a ummi unau pawl nih Phunghrampi Biaceihnak Zung i biakhiahnak kha lungtho tein an hngah. Mah caan chungah an hmuhmi bawmhnak caah an i lawm tuk. Ilumán Quichua holh a hmangmi Khrihfa upa César nih hitin a ti: “Mi tlawmte caah a bupi hmangin mahtluk tiang thil a kan tuahpiakmi cu Jehovah lawng a si.”

 Mah kong a tawngthammi hna cu Jehovah Tehte lawngte an si i man loin an bawmhmi hna a si. Asinain mah kong report tuah awk, i timhtuah awk le biaceihnak zung i chuah awkah tangka tampi a dih. Sihni unaupa pawl le a dang unaupa pawl nih biaceihnak zung i chuah awkah suimilam 380 leng an hman i Mexico ram ah a cangmi kong tawnghtham awk le ca hna leh awkah suimilam 240 leng an hman. Ecuador ah a cangmi kong tawnghtham awkah vawleicung pumpi ah a ummi sihni 40 hrawng nih suimilam a za leng an hman. Unau pawl kilven awkah a dihmi tangka kha khoika in dah an hmuh? Internet i donate.pr418.com ah hmuhmi lam tampi kha hmangin nan pekmi thawhlawm in a si. Nan siannak cungah kan i lawm tuk.