“Nai ah digital in thlarau rawl kan hmuhmi cu khuaruahhar taktak a si.” Mah bia cu na hna a tla ko lo maw? Mah cu 2020, Uktu Bu Thawngpang #6 ah Geoffrey Jackson i thazaang a pemi a phungchimnak ah aa telmi a si. Hitin a ti chap: “Atu ah JW Library bantuk hriamnam hi um hlah sehlaw mah pulrai hi zeitindah kan tei khawh hnga tiah kan ruah men ko lai. Jehovah nih mah bantuk thil hmannak caah timhcia kan si nakhnga kum tampi chung a rak kan timhtuah cang.”

 Jehovah nih zeitindah a kan timhtuah? JW Library app sernak ah zei hna dah aa tel, mah kha kilven in tharchuah cu zeicah a herh?

 2013, May ah Uktu Bu nih vawleicung pumpi zungpi i MEPS Programming department kha remh ṭhanmi Vawlei Thar Lehnak Baibal aa telmi app kha ser awkah an fial hna. “Mah caan tiangah app stores ah mobile app pakhat hmanh kan chuah rih lo” tiah MEPS Programming ah a ṭuanmi Paul Willies nih a chim. “Asinain phu pakhat kan dirh i project cheukhat kha kan ngol, cun app sernak le app ah telh dingmi hna design suai awkah a dang department he rian kan ṭuanṭi. Thla kan cam lengmang i Jehovah bawmhnak thawngin thlanga a rauh hnu, rian kong meeting ah mah app kha kan chuah khawh!”

 A dang zuamcawhnak pakhat cu mah app kha cauk tampi le holh phun tampi aa telmi library taktak in thlen ding kha a si. 2015, January ah kan cauk tam deuh kha Mirang holh in mah app ah hmuh khawh a si i thlaruk a rauh hnuah a dang holh phun tampi in download tuah khawh a si.

 Mah caan thawkin unau pawl nih mah app kha lam tampi in an tharchuah, video an telh chap i Khrihfabu pumhnak caah hmanmi cauk le media hna kha hmunkhat ah an fonh, cun Baibal caang pakhat in cherhchanmi Hlathlainak Ca Lamhruainak zong zoh khawh a si.

 JW Library cu nifate electronic thilri in nuai 8  hrawng awn a si i thla fatin nuai 15 leng awn a si! Electronic thilri hna ah mah app cu tluang tein rian a ṭuan khawh nakhnga zeidah a herh? Unaupa Willies nih hitin a chim: “Mobile app pakhat cu zeitikhmanh ah a dong cang ti a um lo. Mah app ah feature a thar pawl bet chap awk le a hmangtu caah a fawimi le bawmtu si awkah kan i zuam peng. Digital thilri caah chawlehnak rian a kal ning cu tharchuah lengmang a si caah hmanung bik system he aa tlak ningin app kha remh zong a hau. JW Library ah cauk le awkhumhmi hna cu a karh chin lengmang caah a chunglei software kha kilven in tharchuah a hau.” JW Library ah holh lehmi dihlak fonh ah cauk 200,000 hrawng a um i audio le video 600,000 leng a um!

 Mah app ṭha tein rian a ṭuan khawh nakhnga computer hardware lawng a herhmi a si lo. License a ummi software tampi zong cawk a herh. License pakhat ca lawngah kumkhat ah $1,500 (U.S.) a dih. Mah lengah MEPS Programming nih computer, tablet le phone a thar hna ah mah app ṭha tein rian a ṭuan khawh nakhnga kum fatin $10,000 (U.S.) hrawng an hman.

 JW Library nih cauk namnak, ṭhitnak le kuatnak caah a dih dingmi tangka kha tampi a tloter. Tahchunhnak ah, Cathiang kha Nifate Ṭha tein Rel timi cauk hmemi kong kha ruathmanh. Cathiang kha Nifate Ṭha tein Rel—2013 kha uk nuai 12 hrawng nam a si. Asinain vawleicung pumpi ah thawngthanhtu 700,000 leng kan um ko nain kum 2020 caah uk nuai 5 hrawng lawng nam a si. Zeicah? Atu ah unau tampi cu nicaang Baibal kha JW Library ah an rel cang. a

 JW Library cu a hmangtu caah lam tampi in bawmtu a si. Canada ah a ummi Geneviève cu mah app thawngin hlathlainak hmaan tein a tuah khawh. Hitin a ti: “Hmaan tein chim ahcun hlathlainak caah cauk pakhatkhat zoh a hauh ahcun zingfa te hlathlainak ka tuah lai tiah ka zum lo. Asinain mah app thawngin ka tablet chungah ka herhmi vialte a um dih. Cutin hmaan tein hlathlainak ka tuahmi nih ka zumhnak a fehter i Jehovah he a ka naihter chin.”

 COVID-19 pulrai chungah mah app cu a hleiin bawmtu taktak a si. United States i Charlyn nih hitin a ti: “Vawleicung pumpi ah a tlungmi COVID-19 pulrai ruangah bupi chuahmi nammi cauk pakhat hmanh ka hmuh lonak kumkhat leng a si cang. Asinain JW Library ah dawtnak in thlarau rawl ṭha tein a kan timhtuahpiak caah Jehovah cungah kaa lawm tuk.”

 Philippines ah a ummi Faye bantukin mi tampi zong nih an ruah ve. Hitin a ti: “Jehovah he naih tein um khawh peng awkah mah a ṭha tukmi app hi ka hman. Mah hi zingka ah hmasa bik ka zohmi a si. Inn rian ka ṭuan pahin awkhumhmi ka ngai. Pumhnak ca hlatlainak caah ka hman. Baibal cawnpiaknak ca timhtuahnak ah ka hman. Kaa manh caan ah mahka i a ummi video kha ka zoh. Thil pakhatkhat ka hngah lioah mah app i capar asiloah Baibal kha ka rel. Mah cu man a ngei tukmi a si.”

 Mah app cu phungchimnak ca zongah man a ngei tukmi a si. Tahchunhnak ah, Cameroon i unaunu pakhat nih phung a chim lioah a hmasa zarh ah unaunu pakhat nih a hmanmi Baibal caang kha hman a duh. Asinain Baibal caang kha aa cinken ti lo. Hitin a ti: “Tonṭhat ah mah Baibal caang i biafang rual pakhat kha kaa cinken. Cucaah mah app kha ka awn i Baibal ah ka kal, cun mah biafang kha ka kawl. Mah Baibal caang kha ka hmuh colh. Mah app ka hmannak thawngin ka philhmi Baibal caang tampi kha ka kawl khawh.”

 Vawleicung pumpi i unau pawl caah JW Library app sernak, kilvennak le tharchuahnak ah donate.pr418.com ah langhtermi lam hna ningin thawhlawm nan pekmi kha hman a si. Nan langhtermi siannak cungah kan i lawm tuk.

1. 2013, October —Remh ṭhanmi Vawlei Thar Lehnak Baibal aa telmi app chuah a si

2. 2015, January —A dang cauk hna kha Mirang holh lengah holh dang tampi zongin hmuh khawh a si

3. 2015, November —A rong rinnak feature telh chap a si

4. 2016, May —Meetings tab telh chap a si

5. 2017, May —Chingchiahnak feature telh chap a si

6. 2017, December —Baibal Hlatlainak caah bawmtu a simi hna telh chap a si

7. 2019, March —Awkhumhmi download tuahnak, video stream zohnak le Hlathlainak Ca Lamhruainak zohnak hna telh chap a si

8. 2021, January —Nunnak Kha Zungzal In I Nuamhpi! caah tharchuahmi feature telh chap a si