Music cu Jehovah sinin kan hmuhmi aa dawh tukmi laksawng a si. Mah nih kan ruahnak le kan lungthin kha a thlen khawh i kan lung a thawhter khawh. Mah cu a hmaan ti kha original kan hla nih a langhter. Mah lengah original hla nih Jehovah he zong a kan naihter khawh.

 2014 thawkin original hla cu 70 leng chuah a si cang i atu ah mah hla hna lak i fungkhat cu holh phun 500 lengin hmuh khawh a si! Asinain ‘Mah hla hna cu ahote nih dah an tuah i zeitindah chuah a si?’ tiah nan ruah men ko lai.

 Original hla cu Audio/Video Rianṭuannak i music phu nih an tuahmi a si, mah rian kha Uktu Bu i Cawnpiaknak Kawmiṭi nih an tlangtlak. Music phu cu unau 13 in dirhmi a si i mah ah hla phantu, music a tuahtu le a dang a herhmi rian hna a ṭuantu ti in an um. Cun Cawnpiaknak Kawmiṭi nih hla phantu, music tumtu le hla satu hna i telin vawleicung pumpi i mah lungtho tein aa pemi hna kha mah rian bawmh awkah an awnh hna. Mah unau hna nih anmah pumpak minṭhatnak kha kawl loin toidornak he an thiamnak kha an hman.

 Original hla fungkhat cu zeitindah chuah a si? Pakhatnak ah, Cawnpiaknak Kawmiṭi nih mah hla cu zei Baibal cungah dah hrambunh ding a si ti le hla ngaitu cungah zeitindah huham a ngeih awk a si ti kha bia an khiah. Cun music phu nih hla bia kha an ṭial i music kha an bunh. Cuticun aw i khumh chunh awkah timhtuah a si. Mah kha Cawnpiaknak Kawmiṭi nih an ngaih hmasa i lamhruainak an pek chap hna. Mah hnuah music phu nih hla kha an remh i hmanung bik aw an i khumh ṭhan. Mah hla hna cu zung ṭengnge le studio inn hna i telin hmun tampi ah awkhumh a si.

 Original hla phannak le awkhumhnak ah unau pawl nih computer program a phunphun an hman. Mah rian ah music tumnak thilri hna, mixing tuahnak, amplifier, speaker le microphone hna zong hman a hau. Microphone pakhat ah $100 in $1,000 (U.S ) leng tiang a dih. 2020 ah music awkhumhnak caah $116,000 (U.S) kan hman.

 Zeinihdah thawhlawm kha a tloter deuh? Bethel ah music phu nganpi chiah canah mah lungtho tein aa pemi unau tampi kha an hman hna. Mah lengah music tumtu hna cu hmunkhat ah i tong in aw khumh canah music aw tampi aa telmi computer program hmangin music kha an tuah.

 Unau pawl nih original hla ngaih kha an duh tuk. Germany ah a ummi Tara nih hitin a chim: “Ka lungre a theih caan ah mah hla hna nih lungdaih awkah a ka bawmh. Kanmah holh tein hla ka ngaih tikah Jehovah nih a ka kuh bantukin ka ruah.” Kazakhstan i unaupa Dmitry zong nih hitin a ti: “Baibal phunglam he aa tlak hnga maw ti thinphan hau loin mah hla pawl ngaih khawh a simi kha ka duh tuk. Mah lengah mah hla hna nih thlaraulei thil ah lungthin pek peng awkah a ka bawmh.”

 Thlanglei Africa i Delia nih original hla he aa tlaiin a hmuh ning kha hitin a chim: “Mah hla hna cu ka zumhnak a fehtermi hla an hung si. Ka ngaih a chiat tik asiloah zuamcawhnak ka ton tikah ka sining he aa tlakmi hla fungkhat a um zungzal. A music lawng hmanh nih ka intuarnak kha a thlen khawh!”

 Original hla cheukhat cu unau pawl nih an duh bikmi hla an hung si. Thlanglei Africa i Lerato zong nih hitin a chim: “‘A Nai Tuk Cang’ timi le ‘Vawlei Thar Muithlam’ timi hla hna nih ka dawt tukmi ka nu a thawh ṭhan tik i don lai caan kha mitthlam cuanter awkah a ka bawmh. Mah hla hna ka ngaih fatin keimah kuh dingin ka sinah a rak tlimi ka nu kha ka mitthlam ah a cuang peng.”

 Original hla fungkhat cu Sri Lanka i a ummi kumhra fai ngakchianu te caah a hleiin bawmtu a si. Hitin a ti: “Science kan sayamah nih Jehovah Tehte pakhat ka si ruangah ka khaan mi hna hmaiah fakpi in a ka sik. Ka ṭih tuk i zeihmanh chim ding ka hngal lo. Inn ka ṭin tikah ka nu nih ‘Hlathlainak Nih Aan Ṭhawnter’ timi hla ngaih dingin tha a ka pek. Mah hla nih hlathlainak tuah le a phi ca i timh a herhnak kong hngalh awkah a ka bawmh. A thaizing ah ka sayamah kha bia ka va ruah. Ka bia kha a ka ngaihpiak i atu cu Jehovah Tehte Hna zumhnak kong kha ka hngalhthiam cang tiah a ka ti. Mah bantuk thazaang a pemi hla hna a kan timhtuahpiak caah Jehovah bupi cungah kaa lawm tuk.”

 Mah bantuk hla hna chuahnak caah a dihmi tangka kha khoika in dah kan hmuh? Vawleicung pumpi rianṭuannak caah pekmi thawhlawm in a si. donate.pr418.com ah thawhlawm pek khawh ning lam tampi a um. Siang ngaiin nan pekmi thawhlawm cungah kan i lawm tuk.