Kum fatin mi thong tampi cu tipil an in caah Jehovah biak khawh awkah inn hna kha tam deuh a hau. Cucaah vawleicung pumpi ah a ummi Hmunhma Design/Innsaknak Department nih 2020 rianṭuannak kum chungah biakinn 2,700 sak awk le remh awkah timhtuahnak an ngei. a

 Asinain COVID-19 rai ruangah an i timhtuahnak ningin an tuah kho colh lo. Uktu Bu i Cauk Chuahnak Kawmiṭi nih unau pawl kilven awk le cozah nawlchuahmi dingrep ningin zulh awkah vawleicung pumpi ah a ummi biakinn saknak rian hna kha an ngol chung. Asinain pul rai a tlun hlan 2020 rianṭuannak kum chungah biakinn 1,700 leng kha an sak i an remh. Mah lengah zung ṭengnge project 100 leng zong an dih. Biakinn saknak rian pahnih cu unau pawl caah zeitindah ṭhathnemhnak a ngeih timi kong kha zohhmanh hna u sih.

 Cameroon zung ṭengnge. Douala khua ah a ummi zung ṭengnge a hlun cu a fat deuh caah tampi remh a hau. Cauk Chuahnak Kawmiṭi nih zung ṭengnge kha remh dingin an timhtuah ko nain remh man cu atu lio i zung ṭengnge man nakin a tam deuh. A thar sak awk asiloah inn pakhat kha cawk in remh ṭhan awkah an timh. Asinain cutin tuah awkah thil sining nih a pe lo.

 Mah caan chungah cozah nih Douala khua chaklei ah a ummi Biakinn hmai i lam kha an phah lai tiah unau pawl nih an hngalh. Mah lam a ṭhat ahcun umkalnak le thil phorhnak ah a fawi deuh lai. Zung ṭengnge nih an herhmi cu mah kha a si. Cucaah Biakinn hmun chungah zung ṭengnge a thar sak dingin Uktu Bu nih nawl an awnh hna.

 Mah project cu unau pawl le hlanmi innsatu pawl nih an ṭuan. Mah nih a caan le tangka a dihmi kha a tlawmter. Mah project caah a dihmi tangka cu an ruahmi nakin dollar (U.S.) nuai hnih leng a tlawm deuh. COVID-19 zawtnak a um hlanah Bethel chungkhar hna cu mah sak tharmi inn ah an i ṭhial kho.

 Cameroon Bethel i unau hna cu umnak le rianṭuannak ah an tlam a tling cang. An caah zung ṭengnge thar cu Jehovah sinin hmuhmi laksawng a si. Nuva tuahkhat nih “mah laksawng kha kan sunsak tuk caah fakpi in rian i zuam kha kan duh” tiah an ti.

 Tojolabal Calehnak Zung, Mexico. Tojolabal i holhlettu hna cu Mexico Khua pawng, Central America zung ṭengnge ah kum tampi chung rian an rak ṭuan. Asinain kilometer 1,000 (meng 620) a hlatnak hmun Altamirano le Las Margaritas khua ah a bik in Tojolabal holh kha an hman. Cucaah mah holh aa thlen ningin leh cu holhlettu pawl caah a fawi lo. Zung ṭengnge ca zongah Tojolabal holh in holhleh awk le awkhumh awkah a bawm khotu unau pawl kawl cu a har tuk.

 Cucaah Uktu Bu i Caṭialnak Kawmiṭi nih holhlettu hna kha Tojolabal holh a hmangmi hna hmun ah ṭhialter an duh hna. Mah tikah zung ṭengnge nih inn pakhat kha cawk in remh ṭhan awkah bia an khiah. Mah cu a thar sak asiloah inn hlan nakin a dihmi a tlawm deuh.

 Holhlettu pakhat nih ṭhathnemhnak a hmuhmi kong he aa tlaiin hitin a ti: “Zung ṭengnge ah holhlettu in kum hra hrawg rian ka ṭuan cang ko nain kan holh a hmangmi chungkhar pakhat he hmanh kan i tong bal lo. Atu cu Tojolabal holh a hmangmi hna khua ah kan um cang. Cun Tojolabal holh a hmangmi hna he nifatin kan i tong. Biafang thar hna ka hun thiam deuh caah holh lehnak rian zongah ka ṭhangcho deuh.”

 2021 rianṭuannak kum ah thil sining nih a pek ahcun RTO 75 le Baibal tinṭan caah inn hna sak dingin timhtuahnak a um. New York, Ramapo ah a ummi vawleicung zungpi project i telin Argentina le Italy zung ṭengnge umnak hmun ṭhialnak le a ngan deuhmi zung ṭengnge project pariat zong an ṭuan lai. Cun Biakinn thar 1,000 leng a herh. Atu ah a ummi Biakinn 6,000 leng cu i pumhnak caah a tlam a tlin ti lo caah thlennak tuah a hau. Cun a dang Biakinn 4,000 leng zong remh a hau.

 Mah bantuk Biakinn saknak le remhnak caah a herhmi tangka kha khoika in dah an hmuh? Central America Zung Ṭengnge Kawmiṭi chungtel Unaupa Lázaro González nih Tojolabal Calehnak Zung project ca i meeting an tuah lioah hitin a ti. “Zung ṭengnge a umnak hmunhma ah thilri hna cu a tlam a tling tuk lo. Cucaah vawleicung pumpi i unau pawl bawmhnak tel loin cuka khua i unau pawl caah holhlehnak zung sak ding cu a si kho lomi a si. Vawleicung pumpi i unau pawl pekmi thawhlawm ruangah holhlettu pawl cu anmah holh a hmangmi hna he naih deuh in an um kho. Atu bantukin siang ngaiin thawhlawm a pemi vawleicung i unau pawl nan dihlak cungah kan i lawm tuk.” Vawleicung pumpi rianṭuannak caah donate.pr418.com in nan pekmi thawhlawm ruangah mah inn hna kha kan sak khawhmi a si.