Jehovah Tehte Hna nih ram 200 lengah a biapi tukmi midang bawmhnak rian kha an ṭuan. Asinain ram 35 hrawng lawng nih a dihmi caah thawhlawm a za in an hmuh. A herh baumi ram hna zohkhenh awkah tangka kha zeitindah an hman?

 Uktu Bu nih vawleicung pumpi ah Jehovah Tehte Hna nih Jehovah an biak khawh nakhnga le thawngṭha an chim khawh nakhnga a herhmi thil hna kha ṭha tein an timhtuah. Zung ṭengnge pakhat nih an hmunhma herhmi nakin thawhlawm tam deuh an hmuh ahcun mah kha a herh deuhnak hmun ah an hman. Mah timhtuahnak kha a hmasa Khrihfa hna zong nih an rak zulh i ‘an i ruan’ nakhnga pakhat le pakhat an i bawm. (2 Korin 8:14) Thil tampi a ngeimi hna nih a herhbaumi unau pawl kha an rak bawmh hna.

 A dang zung ṭengnge in tangka bawmhnak an hmuh tikah unau pawl cu zeitindah an um. Tahchunhnak ah Tanzania ah a ummi milu a cheu nak tam nih nikhat ah dollor 2nak tlawm in khua an sa kho. Cucaah Mafinga Khrihfabu nih Biakinn remhnak caah mah bawmhnak tangka kha an hman. Mah Khrihfabu nih hitin an ti: “Biakinn kan remh hnu in aa pummi cu kan tam deuh. Jehovah bupi le vawleicung pumpi unau hna nih siannak an langhtermi cungah kan i lawm tuk. Cun aa dawh tukmi biakinn ah kan i pumh khawh ca zongah kan i lawm tuk.”

 Sri Lanka ah a ummi unau cheukhat cu COVID-19 zawtnak ruangah rawl ei awk an ngei lo. Mah lakah Imara Fernando le a fapa, Enosh zong an i tel ve. Asinain a dang ram in harnak a tongmi hna caah bawmhnak an hmuh caah an i lawm tuk. Cakuatnak card ah hitin an ṭial: “Mah bantuk harnak caan chungah kan cungah dawtnak a langhtermi unau pawl cungah kan i lawm tuk. Cun mah chungkhar chungah kan i tel khawh ca zongah kan i lawm tuk. Hi donghnak caan chungah Jehovah nih in bawm hna seh tiah thla kan cam zungzal.”

 Unau pawl cu khoika a ummi an si hmanhah an ngeihmi kha an i hrawm hna. Tahchunhnak ah, Enosh nih a herhmi chungkhar pawl bawmh khawh awkah amah tein thawhlawm kuang fate aa ser. Guadalupe Álvarez zong nih siannak a rak langhter ve. Anih cu Mexican ram ah a ummi a si i thla fatin a hmuhmi tangka cu tlawmpal lawng a si. Asinain a si khawh chungin thawhlawm kha a pek. Hitin a ti: “Jehovah ṭhatnak le a fekmi a dawtnak caah kaa lawm tuk. Cun ka pekmi thawhlawm cu a dang unau pawl nih an pekmi he aa fonh lai i mah nih a herhmi unau pawl kha a bawmh khawh hna lai ti kha ka hngalh.”

 Zung ṭengnge pawl nih a herhnak hmun ah cutin tangka an kuat khawh hna caah kan i lawm. Brazil, Zung Ṭengnge Kawmiṭi ah rian a ṭuanmi unaupa Anthony Carvalho nih hitin a ti: “Kum tampi chung kan ram i rianṭuannak caah a dang ram in tangka lei bawmhnak kan herh. Mah bawmhnak ruangah kan rianṭuannak a ṭhanchomi kha kan hmuh. Asinain atu ah cun tangka kong he aa tlaiin kan sining aa thlen cang caah midang bawmh khawhnak tinvo sung zong kan hmu. Brazil unau pawl nih vawleicung pumpi phungchim rianṭuannak kong an hlathlai tikah midang pawl bawmh khawh awkah an tuah khawhmi kong zong kha an hun hngalh.”

 Jehovah Tehte Hna nih bawmh a herhmi unau pawl kha zeitindah a ṭha bik in an bawmh khawh hna? Ramdang zung ṭengnge ah dairek in tangka kuat si loin vawleicung pumpi rian caah thawhlawm kan peknak thawngin a si. “Vawleicung Pumpi Rianṭuannak” tiah min aa bunhmi Khrihfabu thawhlawm kuang asiloah donate.pr418.com ah thawhlawm kan peknak thawng zongin kan bawmh khawh hna. Mah bantuk lam hna hmangin pekmi thawhlawm kha kan sunsak tuk.