Jehovah Tehte Hna nih a hlan nakin thlarau rawl kha digital in tampi an hmuh. Asinain vawleicung hmun cheukhat ah a ummi unau pawl cu Internet a ngah lonak hmun ah an um. Cheukhat cu Internet line a tlak lengmangnak, line a nuarhnak asiloah a ngah hrimhrim lonak hmun ah an um.

 Asinain atu ah unau tampi nih Internet line a ngah lo hmanhah digital cauk hna kha download an tuah khawh. Mah cu zeitindah a si khawh?

 JW Box cu Internet line a ngah lonak hmun ah a ummi Khrihfabu hna caah timhtuahmi thilri fate a si. Mah ah company pakhat sinin cawkmi router, Bethel i Computer Department nih sermi software, jw.org ah taarmi digital ca le video hna aa tel. Box pakhat ah U.S. $75 man hrawng a si.

 Unau pawl nih Biakinn ah an phone kha wireless in JW Box he an join i cauk le video pawl kha download an tuah. A hlun tuk cangmi asiloah a man a fawimi electronic thilri a ngeimi hmanh nih an i join khawh. Cu a si ah Internet line a ngah lonak Khrihfabu nih zeitindah JW Box in hmanung bik chuahmi ca hna kha an hmuh khawh? Zung ṭengnge nih pakhat ah U.S. $4 man hrawng a simi, USB kha a caan hmaan tein an kuat hna, mah ah JW Box ah rawn khawhmi, jw.org ah taarmi a kong thar pawl aa tel.

 JW Box cu unau pawl caah zeitindah bawmtu a si? Democratic Republic of Congo ah a ummi, fa a ngeimi Nathan Adruandra nih hitin a ti: “‘Maw Jehovah, . . . Nangmah Cu Kaan Bochan’ timi le Lot Nupi Kha Va Philh Hlah U timi drama kha download ka tuah lengmang nain ka tuah kho bal lo. Cucaah ka lung a dong tuk. Asinain atu cu mah video hna kha download ka tuah khawh cang i mah nih kan fale cawnpiaknak ah a kan bawmh.”

 Nigeria i Khrihfabu pawl kha JW Box bunh awkah a bawmmi unaupa pakhat nih hitin a ti: “Unau pawl nih JW Box kha Jehovah sinin hmuhmi, a hleikhunmi laksawng in an hmuh. Atu cu Cawnpiaknak Hriamnam chung i cauk le video pawl kha fawi tein download an tuah khawh cang caah an i lawm tuk.”

 Africa, Pacific Rili i Tikulh hna le Thlanglei America ah a ummi unau pawl sinah JW Box 1,700 leng an kuat i Khrihfabu tampi sinah kuat rih dingin an timhtuah. Mah timhtuahnak caah a dihmi tangka cu khoika in dah hmuh a si? Vawleicung pumpi rian caah pekmi thawhlawm in a si i mah thawhlawm tam deuh cu donate.pr418.com ah pekmi a si. Siang ngaiin nan pekmi thawhlawm cungah kan i lawm tuk.