Jesuh nih a zultu pawl kha hitin a ti hna: “Vawleicung khuazakip ah ka tehte nan si lai.” (Lamkaltu 1:8) Tuchan ah, Jehovah Tehte Hna nih mah rian kha lungtho tein an ṭuan. Asinain mi an tamnak hmun cheukhat ahcun ṭha tein tehte khaan a si rih lo. Hmun cheukhat ahcun Jehovah Tehte tlawmpal lawng an um. (Matthai 9:37, 38) Mi tam khawh chung tam sinah tehte kan khaan nakhnga zei hna dah kan tuah?

 Jesuh nawlpekmi rian ṭuan khawh awkah Jehovah Tehte Hna i Uktu Bu, Rianṭuannak Kawmiṭi nih missionary pawl kha rian an pek hna i a herh deuhnak hmun ah an thlah hna. Atu ah, vawleicung pumpi lohmun ah missionary rian a ṭuanmi cu 3,090 an si. a An lak i tam deuh cu Pennak Kong Chimtu hna caah Tinṭan ti bantuk, Baibal sianginn ah cawnpiak cangmi an si. An inn le an lo kha kaltak in ramdang ah lungtho tein aa ṭhialmi an si. Annih cu nutling patling, thiamnak a ngeimi le hmuhtonnak a ngeimi an si i thawngṭha karhternak rian ah zultu thar hna caah zohchunh awk ṭha an si.

 Zung ṭengnge kawmiṭi nih Rianṭuannak Department i Lohmun Phungchimntu Phu hmangin missionary pawl i an herhmi inn man le siithlopnak man ti bantuk kha an bawmh hna. 2020 chungah missionary pawl caah US dollar nuai 27 hman a si. Cutin an bawmh hna caah missionary pawl nih lohmun kha lungthin an pek khawh i Khrihfabu zong thazaang an ngeihter khawh hna.

 Missionary pawl thawngin phungchimnak rian ah zei ṭhathnemhnak dah kan hmuh? Malawi Zung Ṭengnge Kawmiṭi chungtel a simi unaupa Frank Madsen nih hitin a ti: “Missionary pawl i an ralṭhatnak le an thiamnak ruangah Khrihfabu nih cawngtu an umnak inn le holh dang a hmangmi hna sang ti bantuk phungchim a harnak sang hna hmanhah phung kan chim khawh. An umnak hmun holh le nunphung hna cawn awkah an i zuammi hmuh cu thazaang petu taktak a si. Anmah an hmuh hna tikah mino pawl zong nih caantling rian ṭuan kha an hun duh ve. Mah bantuk missionary pawl a kan pek caah Jehovah cungah kaa lawm tuk.”

 Ram dang i Zung Ṭengnge kawmiṭi chungtel pakhat zong nih hitin a ti: “Vawleicung pumpi ah a ummi Jehovah miphun cu an lung aa rual ti kha Missionary pawl nih an langhter. An nunphung aa khah lo ruangah an i ṭhen cheu lo. Baibal cawnpiaknak an zulh caah lung aa rualmi unau an si ti kha Jehovah Tehte a si lomi hna hmanh nih an hngalh.”

 Mah hmun ah a ummi thawngthanhtu pawl tah missionary pawl nih zeitindah an bawmh hna? Timor-Leste ah a ummi unaupa Paulo nih an Khrihfabu ah a phanmi missionary nuva hna cungah aa lawmhnak kong kha hitin a chim. “Kan umnak hmun cu a lin tuk. Missionary nuva cu a kihnak hmun in a rami an si ko nain khua caan ruangah phungchim rianṭuannak kha an i dawnhkhanhter lo. Zing fatin lohmun tonnak ah an kal. Ni a linh tuk lio caan chun lai le chun hnu zong ah lennolh ah an kal. Anmah bawmhnak thawngin keimah i telin mi tampi nih biatak kha kan hun hngalh. An i zuamnak le an lungthawhnak nih Khrihfabu dihlak kha Jehovah rian ah tam deuh in i tel awkah thazaang a kan pek.”

 Malawi ah a ummi hmaanhmaan hmaikal Ketti nih missionary pawl nih an chungkhar pawl an bawmh ning kong kha hitin a chim: “Kan Khrihfabu i missionary pawl an phanh lioah kan chungkhar ah keimah lawng Jehovah Tehte ka si. An ka bawmh pah in ka chungkhar pawl he zong an hun i kawm hna. Anmah pawl an hmuh hna tikah Jehovah rian ṭuan cu a nuam tukmi nunnak a si ti kha ka fanule nih an hun hngalh. Zohchunhawk ṭha a simi missionary pawl thawngin ka fanule pathum cu hmaanhmaan hmaikal an ṭuan cang i ka vapa zong a hun i pum ve cang.”

 Lohmun ah rian a ṭuanmi missionary pawl caah a dihmi tangka cu khoika in dah hmuh a si? Vawleicung pumpi rianṭuannak caah pekmi thawhlawm tam deuh cu donate.pr418.com in pekmi a si. Siang ngaiin nan pekmi thawhlawm cungah kan i lawm tuk.