Kum fatin vawleicung pumpi ah caantling rian a ṭuanmi cheukhat cu New York, Patterson ah a ummi Vennak Innsang Fimcawnnak Sianginn (Watchtower Educational Center) ah tuahmi Vennak Innsang Baibal Gilead Tinṭan ah kai dingin sawm an si. a Mah tinṭan ah siangngakchia pawl nih Jehovah bupi nih an pekmi hna rian a phunphun kha hmualngei deuh in ṭuan khawh ning kong kha an cawn. Mah tinṭan nih vawleicung pumpi i Khrihfabu le zung ṭengnge pawl kha fehter awk le thazaang pek awkah siangngakchia pawl kha a bawmh hna.

 Gilead tinṭan cu vawleicung pumpi a huapmi tinṭan a si. Tahchunhnak ah, 2019 ah tuahmi voi 147nak tinṭan ah ram 29 in unau 56 an i tel. Gilead tinṭan a kaimi hna cu Bethel, peng zohkhenhtu, missionary asiloah special hmaikal a ṭuanmi pawl an si.

 Tinṭan an thawk hlanah a hlankan in caan saupi chung timhtuahnak an ngei. Tahchunhnak ah, Vawleicung Pumpi Zungpi Khualtlawnnak Department (WHQ Travel) nih tinṭan kai dingin sawm a simi hna kha vanlawng ticket an cawkpiak hna. Voi 147nak Gilead tinṭan a kaimi pakhat cio caah an ram in Patterson tiang ah buaktlak in a dihmi cu US dollar 1,075 a si. Solomon Tikulh in a rami hna cu Patterson phanh khawh awkah valawng voili an i thleng i an ram an kir tikah cun vanlawng voithum an i thleng. Mah an khualtlawnnak cu a dihlak ah kilometer 35,400 (meng 22,000) leng a si. Pakhat caah vanlawng man US dollar 2,300 a dih. WHQ Khualtlawnnak Department nih tangka a dihmi a tlawm deuh nakhnga computer i booking tuahnak hriamnam kha hmangin a man a fawi deuhmi ticket kha an kawl. Ticket an booking hnu hmanhah mah computer program kha hmangin ticket man a tlak le tlak lo hngalh awkah a zarhzarh in le a thla hmanhin an kawl. WHQ Khualtlawnnak Department nih ticket cawknak ah thawhlawm an pekmi vanlawng voucher hna zong kha an hman.

 Tinṭan a kai dingmi unau tampi nih United States ah an luh khawh nakhnga visa an herh. Cucaah Vawleicung Pumpi Zungpi Upadi Lei Department nih student visa an hmuh nakhnga an bawmh hna. Visa le cazin chung min khumhnak ding caah buaktlak in pakhat caah US dollar 510 a dih.

 Tinṭan a kaimi hna i an cawnpiakmi hna in zeitindah ṭhathnemhnak kan hmuh? Hendra Gunawan cu Thlanglei Asia ah Khrihfa upa rian a ṭuanmi a si. An Khrihfabu ah Gilead tinṭan a dihmi nuva tuahkhat an um. Hitin a ti: “A hmasa ah cun kan Khrihfabu ah hmaanhmaan hmaikal a ṭuanmi an um lo. Asinain anmah an phanh hnuah cun an i zuamnak le an lungthawhnak nih unau pawl kha hmaikal ṭuan awkah biakhiahnak tuah dingin a forh hna. A hnuah kan Khrihfabu i unaunu pakhat cu Pennak Kong a Chimtu Hna caah Tinṭan hmanh a rak kai.”

 Thlanglei Asia ram i Bethel pakhat ah Sergio Panjaitan cu Gilead tinṭan a dihmi unau pawl he caan saupi rian an ṭuanṭi. Hitin a ti: “Tinṭan i an cawnpiakmi hna cu anmah ca lawngah si loin kanmah ca zongah thluachuah a si. A kong tampi an cawn. Asinain midang nakin kan biapi deuh ti langhter canah an cawnmi kong tu kha midang sinah an chimh hna. Mah nih thazaang a kan ngeihter i kanmah zong nih midang kha thazaang kan pek ṭhan ve hna.”

 Mah tinṭan caah a dihmi tangka kha khoika in dah hmuh a si? Vawleicung pumpi rianṭuannak caah mi tampi nih donate.pr418.com i thawhlawm pek khawhnak lam pakhat kha hmangin an pekmi thawhlawm thawngin hmuhmi a si. Vawleicung pumpi i unau pawl nih an kaimi mah tinṭan caah siang ngaiin thawhlawm nan pek caah kan i lawm tuk.