2020, March ah Vawlei Pumpi Ngandamnak Phu nih COVID-19 pulrai kong an thanh lioah mi nih vawleicung pumpi ah mah virus hi kumkhat leng kan tong lai tiah an ruat lo. Mah pulrai ruangah Jehovah Tehte Hna i telin mi nuai tampi cu pumsalei, lungthinlei le tangkalei in harnak an tong. Mah bantuk harnak caan chungah Jehovah Tehte Hna nih hartongmi hna bawmhnak kha zeitindah an timhtuah?

 Uktu Bu i Khuakhangtu Kawmiṭi lamhruainak tangah Hartongmi Hna Bawmhnak Kawmiṭi (DRC) 950 leng dirh a si i vawleicung pumpi i COVID-19 caah rian an ṭuan. Hmun cheukhat ahcun mahle hmunhma ah bawmhnak pek dingin an timhtuah i a dang hmun ahcun cozah sinin bawmhnak an hmu. Hartongmi Hna Bawmhnak Kawmiṭi (DRC) zong nih bawmhnak rian kha biatak tein an ṭuan ve.

 Tahchunhnak ah, Paraguay i thil sining hi ruathmanh u. Thawngzamhnak pakhat ah pulrai ruangah chawlehnak hna a ṭumchuk caah “Paraguay mi hna cu ei awk a za in an ngei lo” tiah a ti. Asinain DRC nih zarhhnih ca ei dingmi rawl, thianhhlimhnak thilri le pumpak ca hman dingmi thilri hna aa telmi thilfun kha chungkharmi pali ah pakhat in an phawt hna. Thilfun pakhat ah US dollar 30 hrawng a si.

 Hartongmi hna bawmhnak rian ah aa telmi hna nih COVID-19 pulrai an i chawnh nakhnga lo zeitindah an i runven? Hmaihuh an i hruk i pakhat le pakhat hlatpi in an um. Eidin pawl kha a thiangmi hmun ah an timhtuah i runvennak he aa tlaimi lamhruainak ṭha tein a zulmi company hna ah eidin pawl kha an cawk. Thilfun pawl a timhtuahtu hna zong nih i runvennak thilri kha tling tein an i hruk. Mawṭaw kha virus thahnak sii an kah i sii kahnak hmun ah thilfun pawl kha an chiah. Cun thilri a petu hna zong nih a cohlangtu unau pawl he hlatpi in an um.

 2021, January ah Khuakhangtu Kawmiṭi nih COVID-19 hartongmi hna bawmhnak caah US dollar nuai 25 leng hman dingin an hna a tla. Zung ṭengnge le DRC nih thawhlawm kha fimkhur tein an hman i a herhmi thilri pawl man fawi tein cawk khawh awkah an i zuam. Tahchunhnak ah, Chile ah hartongmi hna bawmtu unaupa pawl nih pe sentete kha pawng 1,653 (kilogram 750) cawk dingin an timhtuah. Asinain thlakhat chungah a man cu lethnih in a kai. Mah a man ningin cawk awkah an hna a tla. Asinain suimilam pahnih a rauh hnuah thil zuartu nih a ka caw tawntu pakhat nih a order ciami a let ṭhan caah a hmasa kan zuarmi man ningin i lak u tiah thawng a thanh hna i man fawi tein an cawk.

 Asinain unaupa pawl nih pe lak dingin an kal tikah a dang phu bantukin a miak in an zuar ṭhan lai tiah a ruah caah kaan zuarh ṭhan hna lai lo tiah a ti hna. Unaupa pakhat nih tawi tein thla a cam hnuah bawmh a herh taktakmi hna min cazin kha Khrihfabu kip ah kan lak cang tiah a zuartu kha a ti. Cun kan bawmh dingmi hna cu hnulei sining a phunphun a ngeimi an si i an chungkhar caah a herh taktakmi a si lainak kong, Jehovah Tehte Hna nih mah lungtho tein an pekmi thawhlawm le thazaang in ṭuanmi a sinak kong kha a chimh. Mah tikah thil zuartu cu a lung a suk tuk i a man a ṭhumh hna lengah a hnu an order ṭhan tik zongah pe sentete kha pawng 882 (kilogram 400) leng a hlut hna.

 Liberia ah a ummi, kum upa nuhmei unaunu Lusu te cu chungkhar panga an si. Nikhat cu zing rawl an ei pah in nicaang Baibal an rel lioah kum sarih a simi a tupate nih inn ah eidin zeihmanh a um ti lo ti kha a hngalh. Mah tikah “zeidah kan ei hna lai” tiah a ti i Lusu nih thla ka cam cang caah Jehovah nih a kan bawmh lai ti kha ka zumh tiah a leh. Chun ah Khrihfa upa pakhat nih Lusu kha phone a chawnh i eidin rak i lak u tiah a ti. Lusu nih hitin a ti: “Jehovah nih ka thlacamnak a ka leh caah Jehovah nih thlacamnak kha a theih i a leh ti kha ka hngalh cang tiah ka tupa nih a ti.”

 Congo Democratic Republic ah nu pakhat i a inn pawngah Jehovah Tehte chungkhar pakhat an um. Mah chungkhar kha zumtukhat an unau pawl nih eidin an pekmi hna kha mah nu nih a hmuh tikah “pulrai a dih in cun kei zong Jehovah Tehte ka si ve cang lai. Annih cu harnak an ton caan ah pakhat le pakhat an i bawm” tiah a ti. A vapa nih “facang tunkhat ruangah maw Jehovah Tehte na si lai?” tiah a hal tikah “mah ruangah a si lo, mah facang cu dawtnak taktak langhternak a si” tiah a ti.

 Jehovah Tehte Hna nih pulrai chungah cutin kan i bawmh khawh colhmi cu siang ngaiin nan pekmi thawhlawm ruangah a si. Donate.pr418.com in nan pekmi thawhlawm caah kan i lawm tuk.