Vawleicung pumpi ah a ummi cozah tampi nih pakhat le pakhat a hlat in um dingin le hmunkhat ah i pumh lo dingin nawl an chuah. Jehovah Tehte Hna nih cozah nawlngaih lawng si loin hmunkhat ah him tein pumhnak tuah peng ding zongin biakhiahnak an tuah. Cucaah pumhnak an tuah khawh nakhnga Khrihfabu nih Zoom ti bantuk video call a ngahmi app hna kha an hman.

 Hmaan tein i pumh khawh awkah Uktu Bu nih thawhlawm hmangin Khrihfabu caah Zoom account kha cawk dingin an hna a tla. Mah cu $15-$20 asiloah mahnak tam dih in video call account a caw kho lomi cheukhat Khrihfabu caah bawmtu taktak a si. Cucaah mah Khrihfabu hna nih mi tlawmte lawng join khawh a simi asiloah a caan ri a ngeimi free app kha an hman tawn. Asinain atu ahcun Khrihfabu kip nih bupi Zoom account kha fawi tein an hman khawh i mi tampi zong an i join kho cang. Atu tiang ah ram 170 leng ah Khrihfabu 65,000 leng nih mah account kha an hman cang.

 Indonesia, Chaklei Sulawesi, Manado i Kairagi Khrihfabu nih free in hmanmi video call app kha hman ti loin bupi Zoom account kha an hman cang. Unaupa Hadi Santoso nih hitin a ti: “Electronic thilri hman a thiam tuk lomi unau pawl hmanh atu ahcun pumh chungah atu le atu luh ṭhan a hauh lo caah ṭha tein an i pum kho cang.”

 Ecuador, Guayaquil khua, Guayacanes Oeste Khrihfabu i Khrihfa upa Lester Jijón, Jr nih hitin a ti: “Unau tampi cu tangka tlawmte lawng an ngeih caah pumhnak dihlak i pumh khawh awkah Zoom laisen cawk cu cheukhat Khrihfabu caah a si kho lomi a lo. Atu ah mi tampi join khawh a simi Zoom account hmannak nawl a kan pek caah bupi cungah kan i lawm tuk. Cucaah pumhnak ah i tel dingin midang kha kan sawm khawh hna i Zoom hmannak ah a caan rikhiahmi he aa tlaiin thinphan awk zong a um lo.”

 Zambia, Lusaka, Ngwerere Chaklei Khrihfabu i Khrihfa upa Johnson Mwanza nih hitin cakuat a ṭial: “Unau tampi nih ‘bupi timhtuahpiakmi Zoom nih unau pawl kha a kan naihter lawng si loin Jehovah dawtnak le zohkhenhnak zong a kan hmuhter’ tiah an ti lengmang.”

 Mah bupi account cu har tongmi hna bawmhnak caah an pekmi thawhlawm in cawk a si. Mah tangka cu vawleicung pumpi rian caah mah lungtho tein an pekmi thawhlawm a si. Mi tampi nih thawhlawm kha donate.pr418.com in an pek. Siang ngaiin thawhlawm nan pek caah kan i lawm tuk. Mah nih vawleicung pumpi i a dang rian zong a bawmh.—2 Korin 8:14.