Jehovah Tehte Hna cu zumtukhat an unau pawl cungah siaherhnak taktak an ngei. (1 Peter 2:17) Kan lak i tam deuh cu Kenya ah a ummi unaunu Tannis bantuk ruahnak kan ngei. Hitin a ti: “Vawleicung pumpi i ka dawtmi unau pawl nih an tonmi thil kong kha hngalh ka duh tuk.” Tannis i telin a dang Jehovah Tehte nuai tampi nih zeitindah thawnpang an theih khawh? 2013 thawkin kan ngeihmi jw.org website i Newsroom timi ṭhen thawngin a si.

 Newsroom ah Baibal chuahnak, har tongmi hna bawmhnak, innsaknak project le a dang a biapimi kong ti bantuk Jehovah Tehte Hna he aa tlaimi, zumhawk a tlakmi thawngpang hna a um. An zumhnak ruangah thong a tlami unau pawl kong zong a kan hngalhter. Newsroom ah phungchimnak campaign le Ruahnolhnak tuahnak he aa tlaimi, thazaang a pemi hmuhtonnak kong zong aa tel. Mah thawngpang he aa tlaimi capar pawl kha ahote nih dah an kawl i zeitindah timhtuah a si?

 Newsroom cu Thawngpang Laknak Zung (OPI) nih an tlangtlak. Mah department cu vawleicung pumpi zungpi ah a um i Uktu Bu i Khuakhangtu Kawmiṭi lamhruainak tangah ṭuanmi a si. OPI cu unau 100 lengin dirh a si i mah ah ca a ṭialtu, a hlathlaitu, hman a thlatu le holh a lettu hna an um. An lak i tam deuh cu lam hla ah a um i mah lungtho tein aa pemi an si. A dang nih cozah nawlngeitu hna, professor le saya te, cun media ti bantuk hna kha pehtlaihnak an tuah hna i thawngpang an lak. OPI cu vawleicung pumpi ah a ummi zung ṭengnge hna i Thawngpang Laknak Department (PID) 80 leng nih an bawmh hna.

 Thawngpang timhtuahnak ah OPI le PID cu naih tein rian an ṭuanṭi. Unau pawl nih thawngpang pakhat cu langhter awkah aa tlak tiah bia an khiah tikah mah konglam kha ṭha tein an hlathlai i zumh awk a tlakmi a konglam hna kha an khawmh. Mah ah biahalnak tuahnak le mifim pawl he bia i ruahnak hna aa tel kho. A konglam pawl an khawmh dih hnuah mah thawngpang hna kha an ṭial, edit an tuah, an rel ṭhan, hmanthlak hna he an langhter i hnatlaknak pek awkah Khuakhangtu Kawmiṭi sinah an kuat.

 Kan unau pawl nih Newsroom kha zeitindah an hmuh? Philippines i unaunu Cheryl nih hitin a ti “Jehovah bupi le a miphun kong he aa tlaimi thawngpang pawl relnak in ka ni ka thawkmi kha ka duh tuk.”

 Careltu tampi nih jw.org i Newsroom le a dang media i thawngpang pawl aa thleidannak kong kha an chim. Kazakhstan i Tatiana timi nu nih hitin a chim: “JW.ORG i thawngpang pawl cu zumh awk a tlakmi an si caah kaa lawm tuk. Mah cu zumhawk a tlakmi le a hmaanmi an si.” Mexico i unaunu Alma nih hitin a chim: “Kan hmunhma i media hna nih an chuahmi thawngpang chia hna he tahchunh ahcun Newsroom cu thazaang petu taktak a si.”

 Newsroom cu zumhawk a tlakmi a si lengah mah nih kan zumhnak zong a fehter. Kenya ah a ummi Bernard nih hitin a chim: “Khoika i a ummi an si hmanhah vawleicung pumpi i unau pawl kha ka chungkhar bantukin hmuh awkah Newsroom nih a ka bawmh. Ka thlacamnak ah an min le an tonmi thil sining te kha ka telh khawh cang.” Kenya i unaunu Bybron zong nih hitin a ti: “A dang holh in Baibal an chuahnak kong capar ka hmuh fatin ka lung a cawlcang tuk peng! Mah capar hna nih Jehovah cu duhdanhnak a ngei lo ti kha a ka hngalhter ṭhan.” 

 Hremnak a tongmi unau pawl an thawngpang hmanh nih thazaang a kan ngeihter khawh. Kenya i a ummi Jackline nih hitin a ti: “An ralṭhatnak kong ruahnak nih ka zumhnak a fehter. Inkhawhnak ngeih awkah zeinihdah a bawmh hna ti kha hngalh dingin kaa zuam peng. Mi nih a ‘sawhsawh’ ah an ruahmi thlacamnak, Baibal relnak le hla saknak ti bantuk tuahsernak hna cu unau pawl an zumhnak fehternak ah a biapi tukmi an si ti kha ka hun hngalh.”

 Costa Rica i unaunu Beatriz nih leiser ral kong he aa tlaimi thawngpang kha a sunsak tuk. Hitin a ti: “Bupi nih bawmh a herhmi unau pawl kha khulrang in, hmualngei tein le dawtnak in an bawmh hna ning kong hngalh awkah Newsroom nih a ka bawmh. Mah nih Jehovah bupi a si hrimhrim ti kha a ka zumhter.”

 Vawleicung pumpi kan unau pawl kong he aa tlaimi, hmanung bik thawngpang hna kan hmuh khawhmi cu zeitluk lunglawmh awk dah a si! Mah cu vawleicung pumpi rianṭuannak caah nan pekmi thawhlawm thawngin a si, tam deuh cu donate.pr418.com hmangin pekmi an si. Siang ngaiin nan pekmi thawhlawm cungah kan i lawm tuk.