Korin Pakhatnak 1:1-31
1 Pathian duhnak in Khrih Jesuh lamkaltu si awkah thimmi keimah Paul le kan unau Sosthenes nih,
2 Korin khua i Pathian Khrihfabu sinah cakuat kan rak ṭial. Nannih cu Khrih Jesuh he lungthin khat tein um awkah thiantermi* le mithiang mi si awkah thimmi nan si. Kan zapi Bawi, Jesuh Khrih min a aumi, khuazakip i a ummi vialte sin zong ah cakuat kan rak ṭial:
3 Kan Pa Pathian le Bawipa Jesuh Khrih vel le daihnak cu nan cung ah um ko seh.
4 Khrih Jesuh thawng in Pathian nih aan pekmi hna a velngeihnak ruang ah Pathian cu ka lawmh zungzal ko.
5 Khrih he lungthin khat tein nan um caah Pathian nih biachimnak lei in siseh, hngalhnak lei in siseh zeizong vialte ah aan rumter cang hna.
6 Mah cu Khrih kong tehte khaannak kha fek tein nan zumh caah a si.
7 Kan Bawipa Jesuh Khrih phuan a si lai caan kha lungtho tein nan hngah lioah Pathian pekmi laksawng nan chambaumi pakhat hmanh a um lo.
8 Kan Bawipa Jesuh Khrih a rat ni ah sualphawt awk zeihmanh nan ngeih nakhnga lo Pathian nih a dongh tiang fek tein aan umter hna lai.
9 Pathian cu zumhawktlak a si i a Fapa, kan Bawipa Jesuh Khrih he hawikomhnak ngeih awkah aan thim hna.
10 Unau hna, kan Bawipa Jesuh Khrih min in forh kaan duhmi hna cu lungnge tein bia chim u, nan lakah ṭhencheunak umter hlah u. Mah canah lungthin khat le ruahnak khat in lungrual tein um u.
11 Unau hna, nan lakah lung i khah lonak a um tiah Khalawi chungkhar mi nih an ka chimh.
12 Cutin ka chimmi cu a cheu nih “Kei cu Paul zultu ka si,” a cheu nih “Kei cu Apollo zultu ka si,” a cheu nih “Kei cu Sefas* zultu ka si,” a cheu nih “Kei cu Khrih zultu ka si” tiah nan ti caah a si.
13 Khrih cu aa ṭhencheu maw? Nan caah thingtung cung i thah a simi cu Paul maw a si? Asiloah Paul min in maw tipil nan in?
14 Krispas le Gaius dah ti lo cu nan lakah tipil ka pekmi ahohmanh nan um lo caah Pathian kha ka lawmh.
15 Cucaah keimah min in tipil kan ing tiah ahohmanh nih nan chim kho lai lo.
16 Mah leng ah Stefenas te chungkhar zong tipil ka pek hna. Midang tu cu tipil ka pek hna le pek hna lo ka hngal ti lo.
17 Khrih nih a ka thlahmi cu tipil pek awkah a si lo, thawngṭha chim awkah a si. Mifim mi hna bia in chim awkah a si lo. Cutin ka chim ahcun hremnak tung* cung i Khrih a thihmi cu pakpalawng ah a cang lai.
18 Hremnak tung* he aa tlaimi bia cu hrawh a si dingmi hna caah hruh bia a si nain khamh a simi kannih caah cun Pathian ṭhawnnak a si.
19 “Mifim mi hna an fimnak kha ka hrawh lai i mithiam mi hna an thiamnak kha ka hlawt lai” tiah cathiang ah aa ṭial.
20 A fimmi cu khoika ah dah a um? Phungphai a hngalmi cu khoika ah dah a um? Hi vawlei* i bia al a thiammi cu khoika ah dah a um? Pathian nih hi vawlei fimnak kha hruhnak ah a canter, a si ko lo maw?
21 Vawlei nih amah fimnak in Pathian kha a hngal kho lo. Kan chimmi thawngṭha cu vawlei mi hna hmuhnak ah hruh bia a lo nain mah thawngṭha a zummi kha a khamh hnanak thawng in Pathian nih a fimnak a langhter.
22 Judah mi nih khuaruahhar thil hmuhsak awkah an hal i Greek mi nih fimnak an kawl.
23 Asinain kannih tu cu Khrih tung cung ah thah a sinak kong kha kan chim. Mah cu Judah mi caah tlukrilhnak a si i miphun dang caah hruhnak a si.
24 Asinain Judah mi he, Greek mi he thim a simi hna caah cun Khrih cu Pathian ṭhawnnak le Pathian fimnak a si.
25 Zeicahtiah Pathian hruhnak tiah ruahmi thil cu minung fimnak nakin a fim deuh, Pathian derthawmnak tiah ruahmi thil cu minung ṭhawnnak nakin a ṭhawng deuh.
26 Unau hna, thim nan rak si lio kong kha ruat ṭhan hmanh u. Minung hmuhnak in cun mi tampi cu mifim, mi lianngan le bawi hrin nan rak si lo.
27 Pathian nih mifim mi hna ningzahter awkah vawlei nih mihrut tiah a ruahmi kha a thim hna; a ṭhawngmi hna ningzahter awkah vawlei nih a derthawm tiah a ruahmi kha a thim hna.
28 Vawlei nih thilpipa ah a ruahmi kha pakpalawng i canter awkah vawlei nih a nautatmi, zei i a rel lomi le biapi ah a chiah lomi thil kha Pathian nih a thim hna.
29 Mah cu ahohmanh Pathian hmaiah an i porhlawt khawh nakhnga lo caah a si.
30 Nannih cu Pathian thawng in Khrih Jesuh he lungthin khat tein nan um cang. Khrih nih Pathian fimnak le dinnak kong kha a langhter. Jesuh thawng in mi cu a thiangmi an hung si i tlanhnak man thawng in luatnak an hmu.
31 Cucaah “Aa porhlawmi cu Jehovah* ah i porhlaw ko seh” tiah cathiang ah aa ṭial bang in si ko seh.
Footnotes
^ Asiloah “Pathian caah a dang tein chiahmi.”
^ Peter.
^ Biafang Fianternak ah zoh.
^ Biafang Fianternak ah zoh.
^ Asiloah “hi chan.” Biafang Fianternak ah zoh.
^ Biafang Fianternak ah zoh.
