Korin Pakhatnak 12:1-31
12 Unau hna, thlaraulei laksawng kong kha hngalhter kaan duh hna.
2 Zumtu nan si hlanah a holh kho lomi siasal kha nan rak biak hna, an in hruai hnanak paoh ah nan rak zulh hna i lam nan pial.
3 Pathian thlarau thawng in bia a chimmi paoh nih “Jesuh cu chiatserh si ko seh!” tiah an chim lo i thiang thlarau thawng in dah ti lo cun ahohmanh nih “Jesuh cu Bawipa a si!” tiah an chim kho lo ti kha hngalhter kaan duh hna.
4 Laksawng a phunphun a um, asinain mah laksawng a petu thlarau cu pakhat a si.
5 Pathian rian a phunphun a um, asinain mah vialte cu Bawipa pakhat caah a si.
6 Rianṭuannak a phunphun a um, asinain mi vialte cutin a ṭuantertu cu Pathian pakhat lawng a si.
7 Asinain thiang thlarau bawmhnak cu pakhat cio cung ah fiang tein hmuh khawh a si i Pathian nih mi vialte ṭhatnak caah a pekmi hna a si.
8 Thiang thlarau nih mi pakhat kha fimnak bia chim khawhnak a pek i mah thiang thlarau ṭhiamṭhiam nih a dang pakhat kha hngalhnak bia chim khawhnak a pek.
9 Mah thiang thlarau nih a dang pakhat kha zumhnak a pek i mah thiang thlarau ṭhiamṭhiam nih a dang pakhat kha damter khawhnak laksawng a pek.
10 A dang pakhat kha khuaruahhar thil tuah khawhnak, a dang pakhat kha profet bia chim khawhnak, a dang pakhat kha Pathian sinin a rami bia a si le si lo thleidan khawhnak, a dang pakhat kha holh dangdang in holh khawhnak, a dang pakhat kha holh leh khawhnak a pek.
11 Cu thil vialte cu thlarau pakhat nih a tuah dihmi an si i a duh ning in pakhat cio kha cutin tuah khawhnak a pek hna.
12 Pum cu pakhat lawng a si nain pum ṭengnge cu tampi a um, pum ṭengnge cu tampi a um nain pum cu pakhat lawng a si. Khrih zong cutin a si ve.
13 Zeicahtiah Judah mi siseh, Greek mi siseh, sal siseh, miluat siseh, kan dihlak in pumkhat si awkah thlarau pakhat in tipil kan ing i kan dihlak in mah thlarau kha kan hmuh.
14 A tak ti ahcun pum cu nge pakhat lawng a ngei lo, nge tampi a ngei.
15 Ke nih “Kei cu kut ka si lo caah pum ah kaa tel lo” tiah a ti ahcun cutin a chim ruang ah pum ah aa tel lo tinak a si hlei lo.
16 Hna nih “Kei cu mit ka si lo caah pum ah kaa tel lo” tiah a ti ahcun cutin a chim ruang ah pum ah aa tel lo tinak a si hlei lo.
17 Pum hi a ningpi in mit a si ahcun zeitindah khua kan theih khawh lai? Pum hi a ningpi in hna a si ahcun zeitindah rim kan theih khawh lai?
18 Asinain atu cu Pathian nih a duh ning in pum ṭengnge hna kha anmahle hmun cio ah a chiah hna.
19 Pum ṭengnge dihlak hi phunkhat lawng a si ahcun pum cu a um ti hnga maw?
20 Pum ṭengnge cu tampi a um, asinain pum cu pakhat lawng a si.
21 Mit nih kut kha “Nang cu kaan herh lo” tiah a ti kho lo. Lu zong nih ke kha “Nang cu kaan herh lo” tiah a ti kho lo.
22 A tak ti ahcun a biapi tuk lo tiah ruahmi pum ṭengnge hna cu a herhmi an rak si.
23 Hmaizah awk tlak ah kan ruah theng lomi pum ṭengnge kha ṭha tein kan zohkhenh hna i aa dawh theng lo tiah kan ruahmi pum ṭengnge kha an i dawh deuh nakhnga kan ṭamh hna.
24 Aa dawh ciami pum ṭengnge cu ṭamh a hau lo. Asinain hmaizah awkah ruah theng lomi pum ṭengnge nih hmaizahnak an hmuh deuh nakhnga Pathian nih pum ṭengnge cu a fonh hna.
25 Cucaah pum chung ah i ṭhencheunak a um ti lo. Pum ṭengnge hna cu pakhat le pakhat an zawn an i ruah cio awk a si.
26 Pum ṭengnge pakhat nih fahnak a in ahcun a dang pum ṭengnge vialte zong nih an inpi ve; pum ṭengnge pakhat nih thangṭhatnak a hmuh ahcun a dang pum ṭengnge vialte zong nih an lawmhpi ve.
27 Nannih cu Khrih pum nan si, pakhat cio cu pum ṭengnge nan si.
28 Pathian nih Khrihfabu ah pakhat cio kha rian a pek hna: pakhatnak ah, lamkaltu; pahnihnak ah, profet; pathumnak ah, cawnpiaktu; cun khuaruahhar thil a tuah khotu; damter khawhnak laksawng a hmutu; midang a bawmtu; lam a hruai khotu; holh dangdang in a holh khotu tiin rian a pek hna.
29 An dihlak in lamkaltu an si maw? An dihlak in profet an si maw? An dihlak in cawnpiaktu an si maw? An dihlak in khuaruahhar thil a tuah khotu an si maw?
30 An dihlak in damter khawhnak laksawng a hmutu an si maw? An dihlak in holh dangdang in a holh khotu an si maw? An dihlak in holh a let khotu an si maw?
31 Cucaah a ṭha deuhmi laksawng hmuh awkah i zuam zungzal u. A ṭha bikmi lam kha kaan hmuhsak rih hna lai.
