Korin Pakhatnak 15:1-58
15 Unau hna, ka rak in chimhmi hna thawngṭha kha hngalhter ṭhan kaan duh hna. Mah thawngṭha kha nan cohlan i nan zulh peng.
2 Kaan chimhmi hna thawngṭha kha fek tein nan i tlaih caah khamh nan si. Cutin a si lo ahcun zumtu nan hung simi cu pakpalawng a si hnga.
3 Keimah theng nih ka cawn i kaan chimh chinmi hna a biapi bikmi kong cu, Cathiang nih a chim bantuk in Khrih cu kan sualnak caah a thi.
4 Cun vui a si i Cathiang nih a chim bantuk in a nithumnak ni ah a tho ṭhan.
5 Khrih cu Sefas* sinah a lang, cun lamkaltu 12 sinah a lang.
6 Mah hnuah unau 500 leng sinah caankhat te ah a lang, an lak i tam deuh cu an nung rih. Asinain cheukhat cu thihnak ah an i hngilh cang.
7 Mah hnuah Jeim sinah a lang, cun lamkaltu dihlak sinah a lang.
8 A donghnak ah, thla tling loin hrinmi bantuk a simi keimah sin zong ah a lang.
9 Kei cu lamkaltu hna lakah a nauta bik ka si, Pathian Khrihfabu kha ka rak hrem caah lamkaltu tiah auh awk hmanh ah kaa tlak lo.
10 Asinain Pathian velngeihnak thawng in mah rian hi ka hmuhmi a si. Ka hmuhmi velngeihnak cu a lak a si lo. Lamkaltu dang nakin rian kaa zuam deuh. Asinain mah cu keimah thazaang thawng in si loin ka hmuhmi Pathian velngeihnak thawng in a si.
11 Keimah ka si ah, anmah an si ah mah kong kha kan chim i nannih zong nih nan zumh.
12 Kan chimmi thawngṭha cu Khrih cu thihnak in a tho ṭhan cang timi kong a si. Cu a si ah nan lak i a cheu nih mithi thawhṭhannak a um lo tiah zeicah nan ti?
13 Mithi thawhṭhannak a um lo ahcun Khrih zong a rak tho ṭhan hnga lo.
14 Khrih cu rak tho ṭhan hlah seh law kan phungchimnak cu pakpalawng a si hnga i nan zumhnak zong pakpalawng a si hnga.
15 Mah leng ah mithi an thawh ṭhan lo ahcun Pathian nih Khrih a thawhter lomi kha a thawhter tiah tehte kan khaan caah Pathian kong lih in tehte a khangmi kan si hnga.
16 Zeicahtiah mithi cu an thawh ṭhan lo ahcun Khrih zong a tho ṭhan hnga lo.
17 Mah leng ah Khrih cu a thawh ṭhan lo ahcun nan zumhnak cu pakpalawng a si hnga i sualnak chung ah nan um rih ko hnga.
18 Cun Khrih zultu in thihnak ah aa hngilhmi hna zong an loral beh ko hnga.
19 Khrih kan i ruahchannak cu hi kan nunnak ca lawng ah a si ahcun kannih cu zaangfah awk a tlak bikmi kan si hnga.
20 Asinain Khrih cu thihnak in a tho ṭhan cang. Thihnak ah aa hngilhmi hna lakah thawhter hmasa bikmi a si.*
21 Mipa pakhat thawng in thihnak a um bantuk in mipa pakhat thawng in thawhṭhannak zong a um ve.
22 Adam ruang ah mi vialte an thih bantuk in Khrih ruang ah mi vialte cu nunter an si lai.
23 Asinain aa changchang in an tho ṭhan lai: Khrih cu hmasa bik ah thawhter a si.* Mah hnuah Khrih ta a simi hna cu Khrih a rat caan chung ah an tho ṭhan lai.
24 A donghnak ah, Khrih nih uknak le nawlngeihnak le ṭhawnnak vialte kha a hrawh lai i Pennak kha Pa Pathian sinah a pek lai.
25 Pathian nih ral vialte kha Khrih ke tang ah a chiah dih hlan tiang Khrih nih siangpahrang in a uk lai.
26 Cun hmanung bik ral a simi thihnak cu hrawh a si lai.
27 Zeicahtiah Pathian nih “zeizong vialte kha Khrih ke tang ah a chiah.” Asinain ‘zeizong vialte a chiah’ ti tikah zeizong vialte a chiatu Pathian bel aa tel lo ti cu a fiang ko.
28 Zeizong vialte cu Khrih tang i chiah a si tikah Fapa thengte zong zeizong vialte a tang ah a chiatu Pathian tang ah aa chia ve lai. Mah tikah Pathian nih zeizong vialte kha a uk lai.
29 Cu a si ah thihnak ah tipil a ingmi hna tah zeitin? Mithi an thawh ṭhan lo ahcun cu bantuk tipilnak cu zeicah an in kun?
30 Zeicah kannih zong thil ṭihnung kan ton zungzal kun?
31 Unau hna, kan Bawipa Khrih Jesuh zultu a simi nannih kaan uanthlarpi hnanak kha chalh in ka chim, nifate thihnak ka tong deng lengmang.
32 Midang bantuk in* Efesa khua ah sahrang he ka rak i dohmi cu ka caah zeidah a ṭhahnem? Mithi an thawh ṭhan lo ahcun “ei u sih law ding u sih, thaizing ah pei kan thih ko lai cu.”
33 Ahohmanh i hlenter hna hlah u. Hawi ṭhalo nih ziaza ṭha a hrawh.
34 Nan lungfim u law a dingmi thil kha tuah u, sualnak tuah ti hlah u. Cheukhat nih Pathian kha an hngal lo. Cutin ka chimmi cu nan ningzahter awkah a si.
35 Asinain pakhatkhat nih “Mithi cu zeitindah thawhter an si lai? Zei bantuk pum in dah an thawh ṭhan lai?” tiah nan ti ko lai.
36 Khuaruahnak a ngei lomi hna! Nan tuhmi thlaici cu a thut* hmasa lo ahcun a keuh ṭung lo.
37 Nan tuhmi cu a keuh cangmi a kung a si lo. Changvut a si ah, a dang thlaici a si ah a ci kha pei nan tuh ko cu.
38 Pathian nih thlaici kha a duh ning in a keuhter hna. Thlaici an keuh tikah an kung cu an i lo cio lo.
39 Taksa pum zong hi phunkhat lawng a um lo, minung nih phun dang, saṭil nih phun dang, va nih phun dang, nga nih phun dang tiin an um cio.
40 Van pum an um i vawlei pum zong an um. Van pum i an i dawhnak cu phun dang, vawlei pum i an i dawhnak zong phun dang a si ve.
41 Nika aa dawhnak zong phun dang, thlapa aa dawhnak zong phun dang, arfi hna i an i dawhnak zong phun dang a si ve. Arfi pakhat le pakhat hmanh ah an i dawhnak aa lo lo.
42 Mithi thawhṭhannak zong cutin a si ve. A thimi pum cu a thu; asinain a tho ṭhanmi pum cu a thu kho lo.
43 Zei rel loin a thi i sunparnak in thawhter a si. Derthawmnak in a thi i ṭhawnnak in thawhter a si.
44 Taksa pum in a thi i thlarau pum in thawhter a si. Taksa pum a um ahcun thlarau pum zong a um ve lai.
45 “A hmasa bik Adam cu a nungmi a hung si” tiah cathiang ah aa ṭial. Hmanung bik Adam cu nunnak petu thlarau a si.
46 A um hmasami cu thlarau pum a si lo. Taksa pum tu a um hmasa, mah hnuah thlarau pum a hung um.
47 A hmasa bik pa cu vawlei in a rami a si i leidip in sermi a si. A pahnihnak pa cu vancung in a rami a si.
48 Vawlei i a ummi cu leidip in sermi pa bantuk kha an si. Vancung ah a ummi cu vancung in a rami pa bantuk kha an si.
49 Atu ah leidip in sermi pa he kan i lawh bantuk in vancung in a rami pa he zong kan i lo ve te lai.
50 Unau hna, chimh kaan duhmi hna cu thi le sa nih Pathian Pennak a co kho lo. A thu khomi zong nih a thu kho lomi kha a co kho ve lo.
51 A thiangmi biathli pakhat kaan chimh hna lai: Kan dihlak in thihnak ah kan i hngilh lai lo, asinain kan dihlak in kan i thleng lai.
52 Hmanung bik muko tum a si lioah chikkhat te ah, mitṭhep karah kan i thleng lai. Muko tum a si tikah mithi cu a thu kho lomi pum in an tho ṭhan lai, kannih tu cu kan i thleng lai.
53 A thu khomi cu a thu kho lomi ah aa thleng lai, a thi khomi cu a thi kho lomi ah aa thleng lai.
54 A thu khomi cu a thu kho lomi ah, a thi khomi cu a thi kho lomi ah aa thlen tikah “Thihnak cu zungzal ca in hloh a si” timi cathiang bia cu a tling lai.
55 “Thihnak, na mi teinak cu khoika ah dah a um? Thihnak, na siivai cu khoika ah dah a um?” timi cathiang bia zong a tling lai.
56 Thihnak a chuahtermi siivai cu sualnak a si, sualnak i a ṭhawnnak cu Nawlbia in a ra.
57 Asinain kan Bawipa Jesuh Khrih thawng in teinak a kan petu Pathian cu lawm u sih!
58 Cucaah dawtmi unau hna, fek tein dir u law ṭhial khawh lomi si u. Bawipa rian ah nan rian tam zungzal u law Bawipa caah rian fakpi in nan ṭuanmi cu a lak a si bal lai lo ti kha hngal ko u.
Footnotes
^ Peter.
^ A hrampi, “theitlai hmasa bik a si.”
^ A hrampi, “theitlai hmasa bik a si.”
^ Asiloah “Minung hmuhnak in chim ahcun.”
^ A hrampi, “a thih.”
