Korin Pakhatnak 16:1-24
16 Mithiang mi hna ca i thawhlawm kholhnak he aa tlaiin Galati ram i Khrihfabu hna sinah ka pekmi lamhruainak kha rak zul ve u.
2 Ka rat tikah thawhlawm kholh chom a hauh nakhnga lo zarh i a nikhatnak ni ah nan si khawh tawk cio in nan ngeihmi kha a dang tein rak khong u.
3 Nan sin ka phanh tikah nan cakuat i nan lung a tlingmi pa hna kha lungtho tein nan pekmi thawhlawm phorhter ding in Jerusalem ah ka thlah te hna lai.
4 Asinain keimah zong kal ve a herh ahcun kan kalṭi te lai.
5 Masidonia ram ah tlawn kaa tim i cuka ka tlawn dih in nan sinah ka ra te lai.
6 Nan sinah sau nawn ka caam kho men, khuasik a dih tiang hmanh ka caam kho men. Mah hnuah ka kalnak ding hmun ah tlawmpal tiang nan ka thlah te lai.
7 Pal pah men in i hmuh cu ka duh lo. Jehovah* duhnak a si ahcun nan sinah caan sau nawn caam ding in kaa ruahchan.
8 Asinain Pentekos Puai tiang cu Efesa khua ah ka um rih lai.
9 Zeicahtiah rianṭuan awkah kutka nganpi ka caah aa hung. Asinain ralchanhtu tampi an um.
10 Nan sinah Timote a rak phanh ahcun thinphannak zeihmanh a ngeih nakhnga lo rak bawm u. Anih cu keimah bantuk in Jehovah* rian a ṭuanmi a si.
11 Cucaah ahohmanh nih rak zohchuk hlah u. Ka sinah a rat khawh nakhnga a kalnak lam ah him tein rak thlah te u. Zeicahtiah unau hna he amah cu kan hngah ko.
12 Kan unau Apollo kha unau dang hna he nanmah tlawn awkah fakpi in ka forh. Asinain atu ah cun rat aa tim rih lo. Caanrem a hmuh tikah a ra te ko lai.
13 Hliphlau tein um u, zumhnak ah fek tein dir u, ralṭha tein um u law ṭhawng ngai in um u.
14 Nan tuahmi zeipaoh kha dawtnak he tuah u.
15 Unau hna, Stefenas te chungkhar cu Akhaia ram i zumtu hmasa bik* an si i mithiang mi hna ca rianṭuannak ah fakpi in aa pemi an si ti kha nan hngalh.
16 Cu bantuk mi hna le anmah he rian a ṭuanṭi i rian aa zuammi hna kha an nawl ngai peng hna u tiah forh kaan duh hna.
17 Nan um lo lioah Stefenas, Fortunatas le Akhaikas nih tampi an ka bawmh caah kaa lawm tuk.
18 Annih nih keimah he, nanmah he hrimhnak an kan pek. Cucaah cu bantuk mi hna kha sunsak hna u.
19 Asia peng ah a ummi Khrihfabu hna nih nan kut an in tlaih hna. Akuila le Priska* le an inn ah aa pummi Khrihfabu zong nih Khrihfa dawtnak an in kuat hna.
20 Unau dihlak nih nan kut an in tlaih hna, a thiangmi hnamhnak in pakhat le pakhat i biachawn u.
21 Mah hi keimah Paul nih keimah kut tein ka ṭialmi chawnhbiaknak a si.
22 Bawipa a daw lomi cu chiatserh si ko seh. Maw Bawipa, ra cang ko!
23 Bawipa Jesuh vel cu nan cung ah um ko seh.
24 Khrih Jesuh he lungthin khat tein a ummi nan dihlak in dawtnak kaan kuat hna.
Footnotes
^ Biafang Fianternak ah zoh.
^ Biafang Fianternak ah zoh.
^ A hrampi, “theitlai hmasa bik.”
^ Prisilla.
