Korin Pakhatnak 2:1-16
2 Unau hna, nan sinah ka ratmi cu Pathian i a thiangmi biathli kong phuan awkah a si, bia sangsang le minung fimnak bia hmang in ka chim lo.
2 Zeicahtiah Jesuh Khrih kong le tung cung ah thah a sinak kong lawng kha lungthin pekter ding in bia ka khiah caah a si.
3 Derthawm ngai in le ṭih le therphang ngai in nan sinah ka rak phan.
4 Ka biachim le ka cawnpiaknak ah mifim mi hna hmanmi bia dawhdawh kha ka hmang lo. Pathian thiang thlarau ṭhawnnak a langhtermi bia tu ka hman.
5 Mah lawng ah nan zumhnak cu minung fimnak ah si loin Pathian fimnak cung ah hram aa bunh kho lai.
6 Atu, nutling patling a simi hna sinah fimnak kong kha kan chim. Mah cu hi vawlei fimnak a si lo, a lotlau dingmi hi vawlei* uktu hna fimnak zong a si lo.
7 A thiangmi biathli, Pathian i aa thupmi fimnak kong kha kan chimmi a si. Pathian nih sunparnak kan hmuh nakhnga mah fimnak ning in tuah awkah hi vawlei a um hlan in bia a rak khiah cang.
8 Mah fimnak kha hi vawlei* uktu pakhat hmanh nih an hngal lo. Rak hngal hna seh law cu sunparnak in a khatmi Bawipa kha an rak that hnga lo.*
9 “Ahohmanh nih an hmuh bal lomi, an theih bal lomi le an ruah bal lomi thil kha Pathian nih amah a dawmi hna caah a timhtuah” tiah cathiang ah aa ṭial bang khan a si.
10 Pathian nih a thiang thlarau hmang in mah kong hna kha kan sinah a phuan. Zeicahtiah thiang thlarau nih zeizong vialte kha a kherhhlai. Pathian i a thukmi biathli hmanh kha a kherhhlai dih.
11 Mi pakhat lungthin chung ah a ummi ruahnak kha amah theng nih dah ti lo cun aho nih dah a hngalh? Cu bantuk in Pathian ruahnak zong Pathian thiang thlarau nih dah ti lo cun ahohmanh nih an hngal kho lo.
12 Kan hmuhmi cu vawlei thlarau si loin Pathian sinin a rami thiang thlarau a si. Mah cu Pathian nih dawtnak in a kan pekmi thil kong kan hngalh khawh nakhnga caah a si.
13 Mah kong kan chim tikah minung fimnak in cawnpiakmi bia kha si loin thiang thlarau cawnpiakmi bia kha kan hman. Thlaraulei kong kha thlaraulei bia in kan fianter.
14 Pumsa duhnak a zulmi nih Pathian thiang thlarau phuanmi thil kha a cohlang lo. Mah cu a caah sullam a ngei lomi a si. Thiang thlarau bawmhnak lawng in mah thil hna cu kherhhlai khawh a si caah a hngal kho lo.
15 Thiang thlarau lamhruainak a zulmi nih cun zeizong vialte kha a kherhhlai. Asinain amah tu cu ahohmanh nih an kherhhlai kho lo.
16 “Jehovah* kha cawnpiak khawh awkah aho nih dah a lungthin cu a hngalh?” tiah cathiang ah aa ṭial. Kannih tu cu Khrih lungthin a ngeimi kan si.
Footnotes
^ Asiloah “hi chan.” Biafang Fianternak ah zoh.
^ Asiloah “hi chan.” Biafang Fianternak ah zoh.
^ Asiloah “tung cung ah an rak that hnga lo.”
^ Biafang Fianternak ah zoh.
