Korin Pakhatnak 4:1-21
4 Kannih cu Khrih rian a ṭuantu le Pathian i a thiangmi biathli a zohkhenhtu in mi nih kan hmu hna seh ti kan duh.
2 Thilri zohkhenhtu a simi nih cun zumhawktlak tein a um awk a si.
3 Nanmah nih siseh, biaceihnak zung nih siseh bia nan ka ceihmi cu ka caah a biapi tuk lo. A tak ti ahcun keimahle keimah hmanh bia kaa ceih lo.
4 Ka chiaṭha thleidannak lungthin cu a thiang. Asinain cutin ka ti tikah ka ding ka ti duhnak a si lo; keimah bia a ka ceihtu cu Jehovah* a si.
5 Cucaah a caan a phanh hlan tiang ahohmanh bia va ceih hna hlah u, Bawipa a rat tiang hngak ko u. Muihnak ah thuhmi biathli hna kha ceunak ah a phuan lai i mi nih an lungthli in an i tinhmi kha a langhter lai. Mah tikah mikip nih an i tlakmi thangṭhatnak kha Pathian sinin an hmuh lai.
6 Unau hna, nanmah ṭhatnak ding caah keimah le Apollo kong kha hmang in mah thil vialte hi kaan chimh hna. “Cathiang ah aa ṭialmi leng in lonh hlah u” timi phung kha nan cawn khawh nakhnga caah a si. Cutin nan tuah ahcun nan hun i porhlaw lai lo i mi pakhat kha midang nakin mithmai ṭha nan pe deuh lai lo.
7 Midang nakin a sang deuh ah aho nih dah aan ser? Na ngeihmi vialte cu Pathian sinin na hmuhmi a si. Pathian sinin na hmuhmi a si ahcun a hmu lo bantuk in zeicah naa porhlawt?
8 Nan herhmi paoh nan ngei cang ko lo maw? Nan rum cang ko lo maw? Siangpahrang in nan uk cang ko lo maw? Nanmah he siangpahrang in kan uk khawh ve nakhnga siangpahrang in hei uk taktak u law ti ka hei duh dah!
9 Kannih lamkaltu hna hi thah awkah biaceihmi in Pathian nih puai ah hmanung bik a chuahtermi bantuk kan si tiah ka ruah. Zeicahtiah kannih cu vawlei, vancungmi le minung caah zoh nuam men kan hung si.
10 Kannih cu Khrih ruang ah mihrut in hmuh kan si, nannih cu Khrih ruang ah nanmahle nanmah mifim in nan i hmu; kannih cu kan derthawm i nannih cu nan ṭhawng; nannih cu thangṭhatmi nan si i kannih tu cu thangchiatmi kan si.
11 Atu tiang hrimhrim hi rawlṭam tihal in kan um, thilpuan kan ngei lo, an kan tuk, an kan velh, inn le lo loin kan um i,
12 kan kut in rian fakpi in kan ṭuan. An kan serhsat tikah thluachuah kan pek hna; an kan hrem tikah lungsau tein kan in;
13 thangchiat kan si tikah nem tein kan leh hna. Kannih cu atu tiang hi vawlei hnawm bantuk, mikip nih hlonhmi hmunthur bantuk kan si.
14 Atu bantuk in ca ka rak ṭialmi cu nan ningzahter awkah a si lo, ka dawtmi ka fale bantuk in chimhhrinh kaan duh hna caah a si.
15 Khrih hnu zulh awkah cawnpiaktu* 10,000 hmanh hei ngei hna u law pa tu cu tampi nan ngei lo. Asinain kei cu Khrih Jesuh kong thawngṭha kaan chimh hnanak thawng in nan pa ka hung si.
16 Cucaah keimah hi rak ka zohchunh u tiah kaan nawl hna.
17 Mah ruang ah nan sinah Timote kha ka rak thlahmi a si. Anih cu ka dawtmi ka fapa le zumhawktlak tein Bawipa rian a ṭuanmi a si. Khrih Jesuh rian ka ṭuannak ah ka zulhmi lam kha aan chimh hna lai. Mah lam hna kha khuazakip i Khrihfabu ah ka rak cawnpiak hna.
18 Kan sinah a ra lai lo tiah nan ka ruah i mi cheukhat cu nan i porhlaw.
19 Asinain Jehovah* duhnak a si ahcun nan sinah ka ra colh ko lai. Mah aa porhlawmi hna kha hmuh ka duh hna, an chimmi bia kha si loin Pathian ṭhawnnak an ngei maw, ngei lo timi tu kha hngalh ka duh caah a si.
20 Pathian Pennak cu bia he aa pehtlai lo, Pathian ṭhawnnak he tu aa pehtlai.
21 Zeidah nan duh deuh? Fungfek he maw ka rat lai? Asiloah dawtnak le nemnak lungthin he dah ka rat lai?
