Korin Pakhatnak 5:1-13
5 Nan lakah nupa sualnak* a tuahmi pa pakhat a um tiah ka theih. Anih cu a pa nupi he an umṭi. Cu bantuk tuahsernak cu miphun dang hna lak hmanh ah a um lo.
2 Mah cu maw nan i uanthlarpi? Nan ngaih a chiat awk tu a si lo maw? Cu bantuk thil a tuahmi pa cu bu chung in nan chuah awk a si lo maw?
3 Ka mipum in cun nan sinah ka um lo nain ka lungthin cu nan sinah a um. Nan sinah a um taktakmi bantuk in mah thil a tuahmi pa kha bia ka ceih cang.
4 Kan Bawipa Jesuh min in hmunkhat i nan i pumh tikah kan Bawipa Jesuh ṭhawnnak he ka lungthin cu nan sinah a um ve ti kha hngal u.
5 Khrihfabu cung ah a ṭhalomi huham a ngeihmi kha hloh awkah mah pa kha Satan kut ah nan chanh awk a si. Cuticun Bawipa ni ah Khrihfabu lungput kha nan kilven khawh lai.
6 Nan i porhlawtmi cu a ṭha lo. Thilnu tlawmte nih chang hlum kha a ningpi in a thawhter ti kha nan hngal lo maw?
7 Nannih cu thilnu phulh lomi changvut hlum thar bantuk nan si khawh nakhnga thilnu hlun kha hlonh u. Zeicahtiah Lanhtak tuufa Khrih cu raithawinak ah pek a si cang.
8 Cucaah sualnak le ṭhatlonak thilnu, thilnu hlun kha si loin lungthin thiannak le biatak timi thilnu phulh lo changreu kha hmang in puai tuah hna u sih.
9 Nupa sualnak* a tuahmi hna he i kom ti hlah u tiah ca ka rak in kuat hna.
10 Hi vawleicung i nupa sualnak* a tuahmi, a hak a kaumi, mi thil a chutmi le siasal a biami hna he nan i kom hrimhrim lai lo ka ti duhnak a si lo. Cutin a si ahcun hi vawlei hi nan chuahtak a hau hnga.
11 Asinain unau tiah ti ṭung i nupa sualnak* a tuahmi, a hak a kaumi, siasal a biami, volhpamh a hmangmi, zu a rimi le mi thil a chutmi a si ahcun amah he i hawikomh cu chim lo, rawl hmanh eiṭi hlah u tiah ca ka rak ṭialmi a si.
12 Zeicahtiah bu leng i a ummi cu keimah nih bia ka ceih hna awk a si lo. Asinain bu chung i a ummi cu nanmah nih bia nan ceih hna awk a si ko lo maw?
13 Bu leng i a ummi cu Pathian nih bia a ceih te hna lai. Cathiang nih “Ṭhatlonak a tuahmi kha bu chung in chuah u” tiah a ti.
Footnotes
^ Greek, por·nei′a. Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
