Korin Pakhatnak 6:1-20
6 Nan lakah pakhat le pakhat i siknak a um tikah mithiang mi hna sinah si loin biaceihnak zung i a ding lomi hna sinah zeitindah nan chuah ngam?
2 Mithiang mi hna nih vawlei hi bia an ceih lai ti kha nan hngal lo maw? Nanmah nih vawlei hi bia nan ceih ding a si ahcun thil hmetete kong kha nan ceih kho lo maw?
3 Vancungmi khi bia kan ceih hna lai ti kha nan hngal lo maw? Cutin a si ahcun hi nunnak i buaibainak tete cu bia kan ceih chinchin awk a si lo maw?
4 Biaceih a herhmi cu bantuk buaibainak a um tikah Khrihfabu nih zei ah an rel lomi hna kha zeicah bia nan ceihter hna?
5 Nan ningzahter awkah ka chimmi a si. Unau karlak ah bia a ceih khotu mifim pakhat tal nan lakah an um lo maw?
6 Cutin tuah canah biaceihnak zung ah nan kal i zumlotu hna hmaiah unau pakhat le pakhat taza nan i cuai.
7 Pakhat le pakhat taza nan i cuaimi cu nan caah sunghnak a si cang. Mah canah a palhmi si tu a ṭha deuh lo maw? Hlenmi si tu a ṭha deuh lo maw?
8 Asinain nannih nih cutin tuah loin nan unau cung ah palhnak nan tuah i nan hlen hna.
9 A ding lomi cu Pathian Pennak chung ah an lut lai lo ti kha nan hngal lo maw? Nanmahle nanmah i hleng hlah u. Nupa sualnak* a tuahmi, siasal a biami, a zuangzammi, pa hlawhhlang,* pa le pa sualnak a tuahmi,
10 a firmi, a hak a kaumi, zu a rimi, volhpamh a hmangmi le mi thil a chutmi cu Pathian Pennak chung ah an lut lai lo.
11 Nan lak i mi cheukhat cu a hlanah cu bantuk mi nan rak si. Asinain atu cu Pathian nih aan ṭawl hna i aan thianter cang hna; Bawipa Jesuh Khrih min le Pathian thiang thlarau thawng in miding ah rel nan si cang.
12 Zeizong vialte hi tuahnak nawl awnh ka si ko nain zeizong vialte cu an ṭhahnem dih lo. Zeizong vialte hi tuahnak nawl awnh ka si ko nain zeihmanh kha kaa ukter lo.
13 Rawl cu paw caah a si i paw cu rawl caah a si, asinain Pathian nih a pahnih in pakpalawng ah a canter lai. Pum cu nupa sualnak* caah si loin Bawipa rian caah a si, Bawipa nih pum kha a zohkhenh.
14 Pathian nih a ṭhawnnak in Bawipa kha a thawhter i kannih zong thihnak in a kan thawhter ve lai.
15 Nan pum cu Khrih pum ṭengnge a si ti kha nan hngal lo maw? Khrih pum ṭengnge kha la in hlawhhlangnu pum ṭengnge ah ka fonh lai maw? Ka fonh hrimhrim lai lo!
16 Hlawhhlangnu he aa fonmi cu hlawhhlangnu he pumkhat an si ti kha nan hngal lo maw? Zeicahtiah “Cu hna pahnih cu pumkhat an si lai” tiah Pathian nih a rak ti.
17 Asinain Bawipa he aa fonmi cu Bawipa he lungthin khat tein an um.
18 Nupa sualnak* kha zamtak u! Mi pakhat nih sualnak dang a tuah ahcun a pum kha a hnorsuang lo, asinain nupa sualnak a tuah ahcun amah pum cung hrimhrim ah sualnak a tuah a si.
19 Nan pum cu Pathian sinin hmuhmi, nan chung ah a ummi thiang thlarau biakinn a si ti kha nan hngal lo maw? Nannih cu nanmah ta nan si lo.
20 Zeicahtiah nannih cu a man in cawkmi nan si. Cucaah nan pum kha Pathian thangṭhatnak ah hmang ko u.
Footnotes
^ Biafang Fianternak ah zoh.
^ Pa le pa umṭi tikah nu zaka in a ummi pa kha a chim duhmi a si kho.
^ Greek, por·nei′a. Biafang Fianternak ah zoh.
^ Greek, por·nei′a. Biafang Fianternak ah zoh.
