Korin Pakhatnak 7:1-40
7 Ca nan rak ṭialmi kong he aa tlaiin chim ahcun pa nih nu kha tawnghtham* loin um seh law a ṭha deuh.
2 Asinain nupa sualnak* a karh tuk caah pa kip nih nupi ngei hna seh law nu zong nih va ngei hna seh.
3 Pa nih a nupi kha a lung diriamhter seh,* nu zong nih a va kha a lung diriamhter seh.
4 Nu cu amah pum cung ah nawl a ngei lo, nawlngeitu cu a va a si; cu bantuk in pa zong amah pum cung ah nawl a ngei lo, nawlngeitu cu a nupi a si.
5 Pakhat le pakhat nan duhnak kha i al hlah u. Thlacamnak ca i hman awkah nan pahnih hnatla in ri nan khiahmi caan chung lawng ah umṭinak kha hrial u. Mah hnuah umṭi ṭhan ko u. Cutin a si lo ahcun i sum khawh lo ruang ah Satan nih aan tukforh sual hna lai.
6 Asinain mah cu nawlbia kaan pekmi hna a si lo, nan tuah khawhmi kha ka chimmi a si.
7 A tak ti ahcun mikip kha keimah bantuk in umter kaan duh hna. Asinain kan dihlak in Pathian sinin kan hmuhmi laksawng cu aa dang cio.
8 Nupi, va a ngei lomi le nuhmei hna sinah chim ka duhmi cu keimah bantuk in nupi, va ngei loin um peng u law a ṭha deuh lai.
9 Asinain nan i sum khawh lo ahcun ngei ko u. Duhnak a alh in alh nakin cun nupi, va ngeih ah a ṭha deuh.
10 Aa ṭhium cangmi hna sinah keimah nih si loin Bawipa nih a pekmi hna lamhruainak cu nu nih a va kha kaltak hlah seh.
11 Asinain a kaltak ahcun va ngei ṭhan ti hlah seh, asiloah a va he i fonh ṭhan ko hna seh. Pa zong nih a nupi kha a kaltak awk a si lo.
12 Asinain midang kha Bawipa nih si loin keimah nih hitin kaan ti hna: Unaupa pakhat nih zumlotu nupi a ngeih i a nupi nih amah he umṭi a duh ko ahcun a nupi kha kaltak hlah seh.
13 Cu bantuk in nu pakhat nih zumlotu va a ngeih i a va nih amah he umṭi a duh ko ahcun a va kha kaltak hlah seh.
14 Zeicahtiah zumlotu va cu a nupi thawng in thianter a si i zumlotu nupi cu a va thawng in thianter a si. Cutin a si lo ahcun an fale cu a thiang lomi an si lai, asinain atu cu an thiang.
15 Zumlotu a simi nih kaltak a duh ahcun kaltak ko seh. Cu bantuk thil sining ah unaupa siseh, unaunu siseh a innchunghawi he um peng ding in rian a ngei lo. Pathian nih nannih cu daihnak in um awkah aan auhmi hna a si.
16 Nupile hna, nan vale he nan um peng ahcun nan vale kha nan khamh khawh men ko hna. Vale hna, nan nupile he nan um peng ahcun nan nupile kha nan khamh khawh men ko hna.
17 Jehovah* nih aan pekmi hna covo ning in le Pathian nih aan auh hna lio i nan sining in khan um peng ko u. Khrihfabu dihlak ah mah lamhruainak hi ka pek hna.
18 Auh nan si lioah cuarpar aa tan cangmi nan um maw? Nan um ahcun mah ning in um ko u. Auh nan si lioah cuarpar aa tan rih lomi nan um maw? Nan um ahcun i tan duh ti hlah u.
19 Cuarpar tan le tan lo cu a biapimi a si lo. A biapimi cu Pathian nawlbia zulh kha a si.
20 Ahopaoh auh an si lio i an sining tein khan um peng ko hna seh.
21 Sal nan si lioah auh nan si maw? Nan si ahcun nan zei poi hlah u; asinain luatnak caanṭha nan hmuh ahcun luat awkah i zuam u.
22 Sal a si lioah Bawipa zultu si ding in auh a simi cu luatnak a hmu i Bawipa ta a si. Cu bantuk in miluat a si lioah auh a simi cu Khrih sal a si ve.
23 A man in cawkmi nan si caah minung sal si ti hlah u.
24 Unau hna, auh nan si lio i nan sining te khan Pathian hmaiah um peng ko u.
25 Nungak, tlangval hna he aa tlaiin Bawipa nih zei nawl hmanh a ka pe lo nain Bawipa zaangfahnak a hmumi, zumhawk tlakmi pakhat in ka hmuhnak kha chim ka duh.
26 Harnak caan ah kan nun caah ahopaoh atu an sining tein um hna seh law a ṭha bik tiah ka ruah.
27 Nupi a ngeimi na si maw? Na si ahcun kaltak i tim hlah. Nupi a ngei lomi na si maw? Na si ahcun va kawl ti hlah.
28 Asinain nupi, va na ngeih hmanh ah sualnak na tuah a si lo. Nungak, tlangval nih nupi, va an ngeihmi cu sual a si lo. Asinain nupi, va a ngeimi cu an nunnak ah harnak tampi an tong lai. Mah harnak in khan luatter kaan duh hna.
29 Unau hna, ka chim duhmi cu caan tlawmpal te lawng a taang cang. Cucaah atu thawk in nupi a ngeimi cu a ngei lomi bantuk in um ko hna seh.
30 A ṭapmi cu a ṭap lomi bantuk in, aa nuammi cu aa nuam lomi bantuk in, thil a cawmi cu mah thil a ngei lomi bantuk in um ko hna seh.
31 Vawlei thil a hmangmi cu tling tein a hmang lomi bantuk in um hna seh. Zeicahtiah hi vawlei thil sining cu aa thleng lengmang.
32 Lungretheihnak in luatter kaan duh hna. Nupi a ngei lomi pa cu Bawipa mithmai ṭha hmuh awkah Bawipa rian lawng ah a lungthin a pek.
33 Asinain nupi a ngeimi pa cu a nupi lungton awkah vawlei thilri kong lawng ah a lungthin a pek.
34 A lungthin cu aa ṭhencheu. Va a ngei lomi nu le nungak pawl cu Bawipa rian lawng ah an lungthin an pek caah an pum le an lungthin cu a thiang. Asinain va a ngeimi nu cu a va lungton awkah vawlei thilri kong lawng ah a lungthin a pek.
35 Asinain mah bia ka chimmi cu khenkham awkah si loin nanmah ṭhatnak caah a si. Aa tlakmi thil kha nan tuah khawh nakhnga le lungvaivuan loin Bawipa rian kha lungthin dihlak in nan ṭuan khawh zungzal nakhnga forh kaan duh hna caah a si.
36 Asinain nupi ka ngeih lo ahcun ka pumsa duhnak kaa uk kho lai lo tiah a ruah i a no saling caan* zong a liam cang ahcun a duh ning in nupi ngei ko seh; mah cu sual a si lo. I ṭhium ko hna seh.
37 Asinain nupi ngeih a hau lo, ka lungthin kaa uk khawh ko tiah a ruah i nupi ngeih lo ding in bia a khiah ahcun mah ning in um ah a ṭha ko.
38 Cucaah nupi, va ngeih zong ah a ṭha ko. Asinain nupi, va ngeih lo ah a ṭha chinchin.
39 Nu cu a va a nun chung paoh phung nih a va he a ṭem hna. Asinain a va a thih ahcun a duhmi paoh he an i ṭhium kho. Asinain Bawipa zultu a simi he lawng an i ṭhitum awk a si.
40 Asinain ka hmuhnak ah atu a sining tein a um ahcun aa nuam deuh lai. Kei zong Pathian thiang thlarau ka ngei tiah ka zumh.
Footnotes
^ Mah cu nupa umṭinak kha a chim duhmi a si.
^ Biafang Fianternak ah zoh.
^ Mah cu nupa umṭinak kha a chim duhmi a si.
^ Biafang Fianternak ah zoh.
^ Nupa umṭi duhnak a ṭhawn saling, no lio caan kha a chim duhmi a si.
