Korin Pakhatnak 8:1-13
8 Siasal sinah pekchanhmi rawl kong he aa tlaiin ca ka rak ṭial: Mah kong kha kan dihlak in kan hngalh ko. Hngalhnak nih mi lung a puamter, dawtnak nih cun mi kha thazaang a pek hna.
2 A kong pakhatkhat he aa tlaiin ka hngalh ko tiah a ruatmi nih a hngalh awk tluk in a hngal rih lo.
3 Asinain Pathian a dawmi a si ahcun mah pa kha Pathian nih a hngalh.
4 Siasal sin i pekchanhmi rawl einak kong he aa tlaiin chim ahcun siasal cu zeihmanh a si lo ti le a hmaanmi Pathian dah ti lo cu pathian dang an um lo ti kha kan hngalh.
5 Mi nih “pathian” le “bawipa” tiah an ruahmi tampi an um bantuk in vancung ah siseh, vawleicung ah siseh pathian tiah auhmi tampi an um.
6 Asinain kannih caah cun Pa Pathian pakhat lawnglawng a um. Amah nih zeizong vialte kha a ser i kannih cu amah caah kan nung. Jesuh Khrih timi Bawipa pakhat lawnglawng a um. Zeizong vialte cu amah thawng in ser an si i kannih cu amah thawng in kan nung.
7 Asinain mikip nih mah kha an hngal lo. Mi cheukhat cu siasal a rak biami an si, cucaah siasal sin pekchanhmi rawl ei kha siasal biak ah an ruah i a dermi an chiaṭha thleidannak lungthin cu a thur.
8 Rawl nih Pathian he kan i pehtlaihnak kha a ṭhatter deuh hlei lai lo. Kan ei lo zong ah zeihmanh kan sung hlei lo i kan ei zong ah zeihmanh kan miak hlei lo.
9 Asinain thimnak nawl nan ngeihmi cu a chiaṭha thleidannak lungthin a dermi hna caah lam khatkhat in tlukrilhtertu a si sual nakhnga lo i ralring zungzal u.
10 Mah kong na hngalh buin siasal biakinn ah rawl na ei ahcun mah kha a chiaṭha thleidannak lungthin a dermi nih aan hmuh tikah siasal sin pekchanhmi rawl kha a hun ei ngam ve lai, a si ko lo maw?
11 Cutin a si ahcun na hngalhnak ruang ah a dermi pa zumhnak cu a rawk lai. Anih cu Khrih nih a thih hnawhchan vemi na unau a si.
12 Cutin na unau cung ah sualnak na tuah i a dermi an chiaṭha thleidannak lungthin a ralchanhmi thil tuah awkah na forh hna ahcun Khrih cung ah sualnak na tuah a si.
13 Cucaah rawl nih ka unau kha a tlukrilhter ahcun cutin a tlukrilh nakhnga lo zeitik hmanh ah sa ka ei ti lai lo.