Thesalon Pakhatnak 2:1-20
2 Unau hna, kan in tlawnmi hna cu pakpalawng a si lo ti kha nanmah hrimhrim nih nan hngalh.
2 A hmasa ah Filipi khua ah harnak kan tong i puarhrangpi in pehtlaih kan si ti kha nan hngalh ko. Asinain ralchanhnak tampi lakah Pathian nih ralṭhatnak a kan pek i nan sinah thawngṭha kha kan chim.
3 Kan in forhfial hnanak cu a hmaan lomi a si lo, a ṭhalomi lungput he zong a si lo i kan in hlenmi hna zong a si lo.
4 Thawngṭha chimnak rian hmuh awkah aa tlakmi in Pathian nih a kan ruah caah thawngṭha kan chim tikah minung lungton awkah si loin kan lungthin a dothlattu Pathian lungton awk tu ah kan i zuam.
5 Faaknak bia kha kan chim bal lo i hakkauhnak lungput ruang ah kan sining taktak zong kan thup bal lo ti kha nan hngalh i Pathian zong nih a hngalh.
6 Khrih lamkaltu in thilrit tampi kan in khinh khawh ko hna nain nan sinin siseh, midang sinin siseh thangṭhatnak hmuh awkah kan i zuam bal lo.
7 Mah canah hnuk dinh liomi nu nih a fa kha nem tein dawtnak he a zohkhenh bantuk in kannih zong nih nem tein kan in pehtlaih ve hna.
8 Kan in dawt tuk hna caah Pathian sinin a rami thawngṭha lawng si loin kan nunnak tiang hmanh hrawm kan in duh hna.
9 Unau hna, fakpi in rian kan ṭuanmi le kan retheihmi kha ṭha tein nan hngalh ko. Pathian sinin a rami thawngṭha nan sin kan chim tikah aho nan ca hmanh ah thilrit kan si nakhnga lo chun he, zan he rian kan ṭuan.
10 Zumtu a simi nan cung ah zeitluk in dah zumhawktlak in kan um, kan dinfel i soi awk um loin kan nun ti kha nan hngalh i Pathian zong nih a hngalh.
11 Pa nih a fale a pehtlaih hna bantuk in pakhat cio kha kan in forh hna, kan in hnemh hna i ruahnak kan in cheuh peng hna ti kha ṭha tein nan hngalh.
12 Mah cu a Pennak chung luh awk le sunparnak hmuh awkah aan autu hna Pathian duhmi nunning in nan nun khawh nakhnga caah a si.
13 Nannih nih Pathian bia kha kan sinin nan theih tikah minung bia in si loin Pathian bia in nan cohlan. Pathian bia cu a si taktak ko. Cu bia cu zumtu hna nan lungthin chung ah rian a ṭuan caah Pathian kha kan lawmh zungzal.
14 Unau hna, nannih cu Khrih Jesuh he lungthin khat tein a ummi, Judea ram i Pathian Khrihfabu hna aa zohchunhmi nan hung si. Zeicahtiah annih cu Judah mi hna sinin harnak an in bantuk in nannih zong nan rammi hna sinin harnak nan ing ve.
15 Judah mi nih profet hna le Bawipa Jesuh hmanh kha an rak thah hna i kanmah zong an kan hrem ve. Annih cu Pathian lung an tong lo i mi ca ṭhatnak tuah kha an duh lo.
16 Miphun dang zong khamh an si ve nakhnga phung kan chimmi kha an kan kham. Cuticun an sualnak kha an chap chin lengmang. Asinain a donghnak ah Pathian thinhunnak cu an cung ah a phan.
17 Unau hna, kan mipum in caan tawite chung cu kan i ṭhen nain kan lungthin in cun kan i ṭhen lo. Hmuh kan in duh tuk hna caah nanmah he i ton awkah fakpi in kan i zuam.
18 Nan sin rat kan duh tuk caah keimah Paul cu voikhat lawng si loin voihnih tiang rat kaa zuam. Asinain Satan nih lam a kan kham.
19 Kan Bawipa Jesuh a rat ṭhan tikah a hmai i kan i ruahchannak, kan i lawmhnak le kan i uanthlarnak bawiluchin cu zeidah a si? Nanmah hi nan si lo maw?
20 Nanmah hrimhrim hi kan sunparnak le kan i lawmhnak cu nan si.
