Thesalon Pakhatnak 3:1-13
3 Nan kong kan theih lo caah kan um kho ti lo. Cucaah Athens khua ah taanta ah a ṭha lai tiah kan ruah i,
2 Timote kha nan sinah kan rak thlah. Anih cu kan unau le Khrih kong thawngṭha chimnak ah Pathian rianṭuantu* a si. Nan zumhnak fehter awk le nanmah hnemh awkah kan rak thlahmi a si.
3 Nan tonmi harnak ruang ah ahohmanh nan zumhnak a der nakhnga lo* caah a si. Cu bantuk harnak hna cu hrial khawh an si lo ti kha nan hngalh ko.
4 Harnak kan tong te lai tiah nan sin kan um lioah kan in chimhchung cang hna i cutin a hung si taktak ti kha nan hngalh ko.
5 Cucaah ka um kho ti lo i nan zumhfehnak kong hngalh duh ah Timote kha ka rak thlah. Tukforhtu nih lam khatkhat in aan tukforh hna lai i kan rianṭuannak cu pakpalawng ah a cang sual lai ti zong ka phang.
6 Atu ah Timote cu a rak phan ṭhan cang. Nan zumhfehnak le nan dawtnak kong, nanmah he caanṭha kan hmanṭimi nan i cinken zungzalnak kong le kanmah nih hmuh kan in duh hna bantuk in hmuh nan kan duh venak kong thawngṭha kha a kan chimh.
7 Cucaah unau hna, lungretheihnak le harnak a phunphun kan tong ko nain nanmah ruang ah le nan langhtermi zumhfehnak ruang ah hnemhnak kan hmu.
8 Bawipa zultu in fek tein nan um chung paoh cu kannih zong thazaang thar in kan khat ve.*
9 Nanmah ruang ah Pathian hmaiah lunglawmhnak in kan khah caah Pathian sinah kan i lawmhnak kha zeitindah kan langhter khawh lai?
10 Kan mipum in kan i ton khawh nakhnga le nan zumhnak fehter awkah a herhmi kan in bawmh khawh hna nakhnga chun he, zan he lungtak tein thla kan cam peng.
11 Kan Pa Pathian hrimhrim le Bawipa Jesuh nih nan sin kan rat khawh nakhnga lam kan awnpiak hram ko hna seh.
12 Cun kanmah nih kan in dawt hna bantuk in pakhat le pakhat nan i dawtnak le mi vialte nan dawt hnanak cu Bawipa nih karhter seh law ṭhanter chin ko seh.
13 Cuticun nan lungthin cu a ṭhawng lai i Bawipa Jesuh cu a mithiang mi vialte he a rat tikah kan Pa Pathian hmaiah soi awk um loin a thiangmi nan si kho lai.
Footnotes
^ Asiloah “Pathian rianṭuanṭi hawi” ti zong a si kho.
^ A hrampi, “nan i hnin nakhnga lo.”
^ A hrampi, “kan nung ve.”
