Thesalon Pakhatnak 5:1-28
5 Unau hna, rikhiahmi ni le caan kong he aa tlaiin nan sinah cakuat ṭial a herh lo.
2 Zeicahtiah Jehovah* ni cu zan ah mifir a rat bantuk in a ra lai ti kha nanmah hrimhrim nih ṭha tein nan hngalh ko.
3 “A dai cang, a him cang!” tiah mi nih an ti lio te ah fapawimi nu nih ruahlopi in nau nganfah a tuar bantuk in an i ruahchan lomi rawhnak cu ruahlopi in an cung ah a tlung lai. Zeiti lam hmanh in an luat kho lai lo.
4 Asinain unau hna, nannih cu muihnak chung ah a ummi nan si lo. Cucaah mifir cu niceu nih ruahlopi in a phak bantuk in cu ni nih cun aan phak hna awk a si lo.
5 Zeicahtiah ceunak fa le chun fa nan si. Kannih cu zan fa le muihnak fa kan si lo.
6 Cucaah midang bantuk in i hngilh hna hlah u sih, hliphlau tein le lungfim tein um hna u sih.
7 Zeicahtiah aa hngilhmi cu zan ah an i hngilh i a rimi cu zan ah an ri.
8 Asinain chun fa a simi kannih cu lungfim tein um hna u sih. Zumhnak le dawtnak kha ṭangphaw bantuk in i hruk hna u sih law khamhnak ruahchannak kha luchin bantuk in i chinh hna u sih.
9 Pathian nih a thinhunnak in awkah si loin kan Bawipa Jesuh Khrih thawng in khamhnak hmuh awkah a kan thim.
10 Jesuh kan caah a thihmi cu kan i hlauh ah siseh, kan i hngilh ah siseh* amah he kan umṭi khawh nakhnga caah a si.
11 Cucaah atu ah nan tuah bantuk in pakhat le pakhat i hnem u law thazaang i pe lengmang u.
12 Unau hna, nan lak i rian aa zuammi hna, Bawipa rian ah aan hruaitu hna le ruahnak aan cheutu hna cung ah upatnak langhter awkah kan in nawl hna.
13 Cun an ṭuanmi rian ruang ah a hleiin daw hna u law hmaizah hna u. Pakhat le pakhat rem tein um u.
14 Unau hna, ningcang loin khua a sami kha ralrin pek awk, a lung a dongmi kha hnemh awk, a tha a dermi kha bawmh awk le mikip cung ah lungsaunak langhter awkah kan in forh hna.
15 Ṭhatlonak kha ṭhatlonak in lehrulh lo awkah i ralring u. Pakhat le pakhat cung ah siseh, mi vialte cung ah siseh ṭhatnak tuah awkah i zuam peng u.
16 A zungzal in i lawm u.
17 A zungzal in thlacam u.
18 Zeizong vialte caah lawmhnak bia chim u. Mah cu Khrih Jesuh zultu a simi nan caah Pathian duhnak a si.
19 Thiang thlarau mei kha hmit hlah u.
20 Profet bia kha zei rel loin um hlah u.
21 Zeizong vialte kha a hmaan le hmaan lo dothlat u; cun a ṭhami kha fek tein i tlaih u.
22 Ṭhatlonak a phunphun kha hrial u.
23 Daihnak Pathian nih tling tein in thianter ko hna seh. Kan Bawipa Jesuh Khrih a rat tikah nan lungthin, nan nunnak le nan pum cu a zeilei paoh in a ṭhami le soisel awk a um lomi a si nakhnga in kilveng ko hna seh.
24 Nanmah aan autu hna cu zumhawk a tlakmi a si caah cutin a tuah hrimhrim ko lai.
25 Unau hna, kan caah thla kan campiak peng u.
26 Unau vialte kha a thiangmi hnamhnak in chawnbia hna u.
27 Hi cakuat hi unau vialte sinah relpiak ding in Bawipa min in kaan forh hna.
28 Kan Bawipa Jesuh Khrih vel cu nan cung ah um ko seh.
